ഇന്‍റർമിറ്റന്‍റ് ഫാസ്റ്റിംഗ്: അറിഞ്ഞിരിക്കണം ഈ കാര്യങ്ങൾ - Intermittent fasting Benefits

ദിവസത്തിൽ 12 മണിക്കൂറോ അതിൽ കൂടുതലോ ഉപവസിക്കുന്ന രീതിയാണ് ഇന്‍റർമിറ്റന്‍റ് ഫാസ്റ്റിംഗ്. സ്ഥിരമായി പിന്തുടരാൻ സാധിച്ചില്ലെങ്കിൽ വീണ്ടും ശരീരഭാരം വർധിക്കാൻ ഇടയാകും. ഇന്‍റർമിറ്റന്‍റ് ഫാസ്റ്റിംഗ് പിന്തുടരുന്നവർ പോഷക സമ്പന്നമായ ഭക്ഷണം തെരഞ്ഞെടുക്കേണ്ടത് പ്രധാനമാണ്.

അമിതവണ്ണമുള്ളവർ ഏറ്റവും കൂടുതൽ ആഗ്രഹിക്കുന്ന ഒന്നായിരിക്കും ശരീരഭാരം കുറക്കുകയെന്നത്. അതിനായി പല വഴികളും പരീക്ഷിക്കുന്നവരായിരിക്കും മിക്ക ആളുകളും. അതിൽ ഒന്നാണ് ഇന്‍റർമിറ്റന്‍റ് ഫാസ്റ്റിംഗ്. ഈ ഫാസ്റ്റിംഗ് പിന്തുടരുന്നതിന് മുൻപ് ഇതിന്‍റെ ഗുണങ്ങൾ, ദോഷങ്ങൾ, എന്നിവയെ കുറിച്ച് അവബോധം ഉണ്ടായിരിക്കേണ്ടത് പ്രധാനമാണ്. ഇന്‍റർമിറ്റന്‍റ് ഫാസ്റ്റിംഗ് ആരംഭിക്കുന്നതിന് മുൻപ് അറിഞ്ഞിരിക്കേണ്ടത് എന്തൊക്കെയെന്ന് യുസി ഡേവിസ് ഹെൽത്ത് രജിസ്‌ട്രേഡ് ഡയറ്റീഷ്യൻ മെലിൻഡ ഗോംഗ് വിശദീകരിക്കുന്നു.

ഇന്‍റർമിറ്റന്‍റ് ഫാസ്റ്റിംഗ് എങ്ങനെയാണ് പ്രവർത്തിക്കുന്നത്?

ഇടവിട്ട് ഉപവസിക്കുന്ന ഒരു രീതിയാണ് ഇന്‍റർമിറ്റന്‍റ് ഫാസ്റ്റിംഗ്. ഭക്ഷണം പരിമിതപ്പെടുത്തി ശരീരത്തിന്‍റെ പ്രവർത്തനത്തിന് ആവശ്യമായ ഊർജം ലഭിക്കുന്നതിനായുള്ള കൊഴുപ്പ് കൂടുതൽ വേഗത്തിലും കാര്യക്ഷമമായും ശേഖരിക്കാൻ കഴിയുന്നു എന്നതാണ് ഇന്‍റർമിറ്റന്‍റ് ഫാസ്റ്റിംഗ് പിന്നിലെ ആശയം. കാർബോഹൈഡ്രേറ്റിൽ നിന്നുള്ള ഗ്ലൂക്കോസാണ് ശരീരത്തിന്‍റെ പ്രധാന ഊർജ സ്രോതസ്. എന്നാൽ ഗ്ലൂക്കോസ് വേണ്ട അളവിൽ ലഭിക്കാതെ വരുമ്പോൾ കൊഴുപ്പ് ഊർജ്ജമായി പ്രവർത്തിക്കും. കൊഴുപ്പ് എത്രവേണമെങ്കിലും സംഭരിക്കാനുള്ള കഴിവ് ശരീരത്തിനുണ്ട്. ഇത് തന്നെയാണ് ശരീരഭാരം വർധിക്കാനുള്ള പ്രധാന കാരണവും. ആവശ്യത്തിന് ഭക്ഷണം ലഭിക്കാതെ വരുമ്പോൾ നേരെത്തെ സംഭരിച്ചു വച്ചിട്ടുള്ള കൊഴുപ്പ് ഇന്ധനമായി പ്രവർത്തിക്കും. ഇതിലൂടെ അടിഞ്ഞുകൂടിയ കൊഴുപ്പിന്‍റെ അളവ് കുറയ്ക്കാൻ സാധിക്കും.

അതേസമയം ഈ ഉപവാസം വിവിധ രീതികളിൽ പിന്തുടരാവുന്നതാണ്. ഒരു കൃത്യമായ ഉപവാസ ക്രമമൊന്നും ഇതിനില്ലെന്നുള്ളതാണ് മറ്റൊരു പ്രത്യേകത. ഒരു ദിവസത്തിൽ 12 മണിക്കൂറോ അതിൽ കൂടുതലോ ഉപവസിക്കുക എന്നതാണ് ഒരു രീതി. ഉദാഹരണത്തിന് ദിവസത്തിൽ 8 മണിക്കൂർ ഭക്ഷണം കഴിക്കുകയും അടുത്ത 16 മണിക്കൂർ ഉപവസിക്കുകയും ചെയ്യുന്ന രീതി. രാത്രി 7 മണിയോടെ ഭക്ഷണം കഴിച്ചു കഴിഞ്ഞാൽ പിന്നീട് അടുത്ത ദിവസം 11 മണിയ്ക്കാണ് ഭക്ഷണം കഴിക്കേണ്ടത്. ഇതിലൂടെ ശരീരത്തിൽ അടിഞ്ഞുകൂടിയ കൊഴുപ്പ് കാര്യക്ഷമമായി കത്തിയ്ക്കാൻ സഹായിക്കും. ലഘുവായി അത്താഴം കഴിക്കുന്ന ഒരാളിൽ ഇത് വളരെ വേഗത്തിൽ ഫലം ഉണ്ടാക്കുന്നു.

ഇന്‍റർമിറ്റന്‍റ് ഫാസ്റ്റിംഗിന്‍റെ മറ്റൊരു രീതിയാണ് ഒരു ദിവസം മുഴുവനുള്ള ഉപവാസം. ആഴ്‌ചയിൽ അഞ്ച് മുതൽ 6 ദിവസം വരെ നിങ്ങൾക്ക് ഇഷ്‌ടമുള്ളതെന്തും കഴിക്കാം. ബാക്കിയുള്ള ഒന്നോ രണ്ടോ ദിവസം ഉപവാസത്തിനായും തെരഞ്ഞെടുക്കാം. എന്നാൽ പ്രത്യേകം ശ്രദ്ധിക്കേണ്ട കാര്യം നിർജ്ജലീകരണം സംഭവിക്കാതെ നോക്കണമെന്നതാണ്. അതിനാൽ ധാരാളം വെള്ളവും ജ്യൂസുകളും കുടിക്കാം.

ഇന്‍റർമിറ്റന്‍റ് ഫാസ്റ്റിംഗ് നിങ്ങൾക്ക് അനുയോജ്യമാണോ?

ഇതിന് കൃത്യമായ ഉത്തരം നല്‌കാൻ പ്രയാസമാണ്. എന്താണ് ഇന്‍റർമിറ്റന്‍റ് ഫാസ്റ്റിംഗ് പരീക്ഷിക്കാനുള്ള കാരണം ? ഇത് എന്നന്നേക്കുമായി പിന്തുടരാൻ ഉദ്ദേശമുണ്ടോ ? എന്നതിന്‍റെയൊക്കെ അടിസ്ഥാനത്തിലാണ് ഇന്‍റർമിറ്റന്‍റ് ഫാസ്റ്റിംഗ് നിങ്ങൾക്കാ അനുയോജ്യമാണോ അല്ലയോ എന്നൊക്കെ നിർണയിക്കുന്ന ഘടകം. അതേസമയം ഇന്‍റർമിറ്റന്‍റ് ഫാസ്റ്റിംഗ് പിന്തുടരാൻ ആഗ്രഹിക്കുന്ന ഒരാളാണ് നിങ്ങളെങ്കിൽ പോഷക സമ്പന്നമായ ഭക്ഷണം തെരഞ്ഞെടുക്കേണ്ടത് വളരെ പ്രധാനമാണ്.

പഴങ്ങൾ, പച്ചക്കറികൾ, ധാന്യങ്ങൾ, മെലിഞ്ഞ മാംസം, സസ്യ പ്രോട്ടീനുകൾ, കൊഴുപ്പ് കുറഞ്ഞതോ അല്ലാത്തതോ ആയ പാലുൽപ്പന്നങ്ങൾ എന്നിവ ആഹാരത്തിൽ ഉൾപ്പെടുത്താൻ പ്രത്യേകം ശ്രദ്ധിക്കണം. ശരീരഭാരം കുറയ്ക്കാൻ ഉപവസിക്കുന്നവരാണ് പലരും. എന്നാൽ ഇത് നിങ്ങൾക്ക് എന്നെന്നേക്കുമായി പിന്തുടരാൻ സാധിക്കുന്നില്ലെങ്കിൽ വീണ്ടും ശരീരഭാരം വർധിക്കാൻ ഇടയാക്കുകയും ചെയ്യും.

ഇന്‍റർമിറ്റന്‍റ് ഫാസ്റ്റിംഗ് ശ്രദ്ധിക്കേണ്ടത് എന്തൊക്ക ?

ഇടവിട്ടുള്ള ഉപവാസം വിട്ടുമാറാത്ത രോഗങ്ങൾ (ക്രോണിക് കണ്ടീഷൻസ്) അകറ്റാൻ സഹായിക്കുമോ എന്നത് സംബന്ധിച്ച് വേണ്ടത്ര ഗവേഷണങ്ങൾ ഇപ്പോഴും നടന്നിട്ടില്ല. ഇന്‍റർമിറ്റന്‍റ് ഫാസ്റ്റിംഗ് തെരഞ്ഞെടുക്കുന്നതിന് മുൻപ് ആരോഗ്യ വിദഗ്‌ധരുടെ ഉപദേശം സ്വീകരിക്കണം. ഏതെങ്കിലും തരത്തിലുള്ള ആരോഗ്യ പ്രശ്‌നങ്ങൾ ഉള്ളവരോ മരുന്നുകൾ കഴിക്കുന്നവരോ ഒരു തരത്തിലുള്ള ഉപവാസവും പിന്തുടരാൻ പാടില്ല. ആരോഗ്യ വിദഗ്‌ധരെ സമീപിക്കുന്നത് വഴി നിങ്ങളുടെ ആരോഗ്യ ചരിത്രം അവലോകനം ചെയ്‌ത് വേണ്ട മാർഗനിർദേശം നൽകാൻ അവർക്ക് കഴിയും.

ശ്രദ്ധിക്കേണ്ട മറ്റൊരു കാര്യം നിങ്ങൾക്ക് ആസ്വദിക്കാൻ കഴിയുന്നതും മനസിനും ശരീരത്തിനും പ്രയാസം ഉണ്ടാക്കാത്തതുമായ രീതികൾ പരീക്ഷിക്കുക എന്നത് പ്രധാനമാണ്. ഭക്ഷണം കഴിക്കുന്ന സമയം നിങ്ങളെ സമ്മർദ്ദത്തിലാക്കുന്നുവെങ്കിൽ ഇന്‍റർമിറ്റന്‍റ് ഫാസ്റ്റിംഗ് നിങ്ങൾക്ക് യോജിച്ച രീതിയല്ല. അതേസമയം ഏതെങ്കിലും വിധത്തിലുള്ള ഡയറ്റോ ഫാസ്റ്റിംഗോ തെഞ്ഞെടുക്കുന്നതിനു മുൻപ് ഒരു ഡയറ്റീഷ്യനെ സമീപിക്കാൻ പ്രത്യേകം ശ്രദ്ധിക്കണം.

ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.