ഇന്ത്യന്‍ സംഗീത ലോകത്ത് പകരം വയ്‌ക്കാനില്ലാത്ത വ്യക്തിയാണ് ഇളയരാജ. 80ാം വയസിലും അദ്ദേഹം സംഗീത ലോകത്ത് സജീവമാണ്. അതുപോലെ സംഗീത ലോകത്ത് നിറഞ്ഞു നില്‍ക്കുന്ന വ്യക്തിയാണ് സംഗീത സംവിധായകനും ഗായകനുമായ മകന്‍ യുവന്‍ ശങ്കര്‍ രാജയും. തന്‍റെ ജീവിതത്തിലുണ്ടായ പ്രതിസന്ധികളെ കുറിച്ചും ഇസ്‌ലാം മതം സ്വീകരിച്ചതിനെ കുറിച്ചും വെളിപ്പെടുത്തിയിരിക്കുകയാണ് യുവന്‍. അടുത്തിടെ ഒരു തമിഴ് ചാനലിന് നല്‍കിയ അഭിമുഖത്തിലാണ് യുവന്‍ ശങ്കറിന്‍റെ വെളിപ്പെടുത്തല്‍.
2014 ലാണ് യുവന്‍ ശങ്കര്‍ രാജ ഇസ്‌ലാം മതം സ്വീകരിച്ചത്. തുടര്‍ന്ന് അബ്‌ദുല്‍ മാലിക് എന്ന പേരും മാറ്റി. എന്നാല്‍ സംഗീത രംഗത്ത് യുവന്‍ ശങ്കര്‍ രാജ എന്ന പ്രഫഷണല്‍ പേരില്‍ തന്നെ തുടരുമെന്ന് അദ്ദേഹം വ്യക്തമാക്കിയിരുന്നു. തന്‍റെ ഉള്ളുലച്ച സംഭവത്തെ കുറിച്ച് യുവന്‍ ശങ്കര്‍ പറഞ്ഞതിങ്ങനെ.
അമ്മയുടെ അപ്രതീക്ഷിത വിയോഗം തന്നെ തകര്‍ത്തു കളഞ്ഞുവെന്ന് സംഗീത സംവിധായകന്‍ പറയുന്നു. 2011 ലാണ് അമ്മ മരണപ്പെടുന്നത്. ഇതോടെ ദു:ഖം താങ്ങാനാവാതെ താന്‍ തികഞ്ഞ മദ്യപാനിയായെന്നും പുകവലിയും ശീലമാക്കിയെന്നും അദ്ദേഹം വെളിപ്പെടുത്തി. അമ്മയെ തേടിയുള്ള അന്വേഷണമാണ് തന്നെ ഇസ്‌ലാം മതം സ്വീകരിക്കുന്നതിലേക്ക് എത്തിച്ചതെന്നും യുവന്‍ ശങ്കര്‍ പറഞ്ഞു.
"എല്ലാവരേയും പോലെ എനിക്കും എന്‍റെ അമ്മ വളരെ വലുതാണ്. അമ്മയെ എവിടെ കണ്ടെത്തും എന്ന അന്വേഷണത്തിനൊടുവില്‍ നമുക്കെല്ലാം അതിന് ഒരു അവസാനമുണ്ടെന്ന് ഞാന്‍ മനസ്സിലാക്കി. അതെപ്പോഴാണെന്ന് നമുക്കറിയില്ല. പക്ഷേ നമ്മള്‍ അതിലേക്ക് എത്തും. അമ്മയുടെ മരണ ശേഷം ഞാന്‍ ആരുമില്ലാത്ത ഒരു കുട്ടിയെ പോലെയായി. ഇടയ്‌ക്കിടെ അമ്മയെ സ്വപ്‌നം കാണും. പക്ഷേ അമ്മയെ എവിടെ കണ്ടെത്തും എന്ന് എനിക്ക് അറിയുമായിരുന്നില്ല. അമ്മ എവിടെയോ ഉണ്ട്. എവിടെയാണെന്നറിയില്ല. ആ അന്വേഷണം നടത്തികൊണ്ടിരുന്നു. അതെന്നെ വല്ലാതെ പിടിച്ചുലച്ചു. അമ്മയെ തേടിയുള്ള അന്വേഷണത്തില്‍ മദ്യപാനം, പുകവലി പോലുള്ളു ദുശ്ശീലങ്ങളെല്ലാം ജീവിതത്തിന്‍റെ ഭാഗമായി. അതിന് മുന്‍പ് പാര്‍ട്ടികളില്‍ പോയിരുന്നെങ്കിലും മദ്യപിക്കുകയോ പുകവലിക്കുകയോ ചെയ്‌തിരുന്നില്ല.