മദിരാശിയുടെ തെരുവുകൾ ദക്ഷിണേന്ത്യൻ ചലച്ചിത്ര ലോകത്തിന്‍റെ കഴിഞ്ഞകാല സുഗന്ധം പേറുന്നുണ്ട്. ദക്ഷിണേന്ത്യൻ സിനിമയുടെ ഈറ്റില്ലമായ കോടമ്പക്കത്തിന് ഇന്നൊരുപക്ഷേ കൂറ്റൻ ബഹുനില കെട്ടിടങ്ങളുടെയും ആധുനികതയുടെയും മുഖച്ചാർത്താകും. സിനിമാമോഹവുമായി ആ തെരുവീഥികളിൽ അത്രപേർ അലഞ്ഞിട്ടുണ്ടാകുമല്ലേ!
ഇന്ന് ചെന്നൈ നഗരത്തിൽ ഒരു ദിവസം സിനിമയ്‌ക്കായി എത്ര ഓഡിഷനുകൾ നടക്കുന്നുണ്ടാകും, എത്ര അഭിനയ കളരികൾ സംഘടിപ്പിക്കുന്നുണ്ടാവും എന്നത് കണക്ക് കൂട്ടുക പ്രയാസമാകും. ഇതിനിടയിൽ വ്യാജൻമാരും ഉണ്ടായേക്കും. അഭിനയ കളരികളിലേക്ക് കടന്നുചെല്ലുമ്പോൾ നമ്മൾ ട്യൂട്ടറിൽ നിന്നും കേൾക്കുന്ന ഒരു പ്രയോഗമുണ്ട്.
'എന്താ സൂര്യ നീ ഉറങ്ങുകയാണോ' എന്നതാണത്. തമിഴിൽ പറഞ്ഞാൽ 'എന്നാടാ സൂര്യ നീ തൂങ്കിറിയാ' എന്നും. എന്താവും ഈ പ്രയോഗത്തിന് പിന്നിലെ കഥയെന്നല്ലേ. ഇതിന്‍റെ വേരുകൾ അന്വേഷിച്ച് പോയാൽ നമ്മൾ എത്തിച്ചേരുക വർഷങ്ങൾക്ക് മുൻപുള്ള നടൻ സൂര്യയുടെ ഒരു ടെലിവിഷൻ അഭിമുഖത്തിന്‍റെ ശകലങ്ങളിലാവും. സൂര്യ തമിഴിലെ ഒരു മുൻനിര മാധ്യമത്തിന് നൽകിയ അഭിമുഖത്തിൽ പറയുന്ന, തന്‍റെ സിനിമ കരിയറിലെ നിർണായകമായ ഒരു സംഭവത്തെകുറിച്ചുള്ള ഓർമകളിലാണ് ഈ പ്രയോഗം ചുറ്റിപ്പിണഞ്ഞ് കിടക്കുന്നത്.
തെന്നിന്ത്യയുടെ തന്നെ ഹരമായി മാറിയ നടനാണ് തമിഴകത്തിന്‍റെ അഭിമാന താരമായ സൂര്യ. 'നടിപ്പിൻ നായകനെ'ന്ന് ആരാധകർ സ്‌നേഹപൂർവം വിളിക്കുന്ന താരത്തിന്‍റെ സിനിമാ യാത്ര അത്ര എളുപ്പമായിരുന്നില്ല. ഇക്കാര്യം സൂര്യ തന്നെ തുറന്ന് പറഞ്ഞിട്ടുമുണ്ട്.
വിമർശനങ്ങൾ ഏറ്റുവാങ്ങിയായിരുന്നു സൂര്യയുടെ തുടക്കം. ഡാൻസ് അറിയില്ല, ഫൈറ്റ് ചെയ്യാൻ വശമില്ല, നടപ്പും ചിരിയും ഭംഗിയില്ല എന്നിങ്ങനെ സിനിമാലോകത്തേക്ക് ഒരുപാട് സ്വപ്‌നങ്ങളുമായി എത്തിയ ഒരു പുതുമുഖ നടൻ നേരിട്ട വിമർശനങ്ങൾ ചെറുതൊന്നുമായിരുന്നില്ല. സൂര്യയുടെ അച്ഛൻ ശിവകുമാർ 70കളിലെ തമിഴ് സിനിമയുടെ മുടിചൂടാമന്നനായിരുന്നു. എന്നാൽ ആ വിലാസം മാത്രം മതിയായിരുന്നില്ല സൂര്യയ്‌ക്ക് സിനിമയുടെ വാതിലുകൾ എളുപ്പം തുറന്നു കിട്ടാൻ.
പ്രകടനം കൊണ്ടും സിനിമയുടെ നിലവാരമില്ലായ്‌മ കൊണ്ടും സൂര്യയുടെ ആദ്യ ചിത്രങ്ങൾ തികച്ചും പരാജയമായിരുന്നു. അച്ഛൻ ഉണ്ടാക്കിയ പേരും പ്രശസ്‌തിയും മകനിലൂടെ നഷ്‌ടപ്പെടുമോ എന്നുള്ള ഭയം, കുറ്റപ്പെടുത്തലുകൾ, ഒരുപക്ഷേ അധികം വൈകാതെ സിനിമ കരിയർ അവസാനിക്കും... അങ്ങനെ കലുഷിതമായിരുന്നു സൂര്യയുടെ തുടക്കകാലം.
അങ്ങനെയിരിക്കെ ഒരിക്കൽ തീവണ്ടിയിൽ യാത്ര ചെയ്യുകയായിരുന്നു സൂര്യ. ക്ഷീണംകൊണ്ട് വിൻഡോ സൈഡിൽ തല വച്ച് മയങ്ങുകയായിരുന്നു നടൻ. ഇതിനിടെ തിടുക്കത്തിൽ ഒരാൾ സൂര്യയെ തട്ടിയുണർത്തി. നോക്കുമ്പോൾ സാക്ഷാൽ രഘുവരൻ.
സൂര്യയോട് പരിചയ ഭാവത്തിൽ എന്തെങ്കിലും സംസാരിക്കുന്നതിന് മുൻപ് രഘുവരൻ ചോദിച്ച വാക്കുകളായിരുന്നു 'എന്താ സൂര്യ നീ ഉറങ്ങുകയാണോ' എന്ന്. 'നിനക്ക് എങ്ങനെ ഉറങ്ങാൻ സാധിക്കുന്നു? നിന്‍റെ കാലിനടിയിലെ മണ്ണ് ഒലിച്ചു പോകുന്നത് നീ ശ്രദ്ധിക്കുന്നുണ്ടോ? സിനിമയോടുള്ള നിന്‍റെ അഭിനിവേശം ഇത്ര മാത്രമാണോ?
സിനിമ കരിയർ ഇങ്ങനെ ആശങ്കയിൽ നിൽക്കുമ്പോൾ നിനക്ക് ഉറക്കം വന്നത് ആലോചിച്ചിട്ട് എനിക്ക് സമചിത്തത നഷ്‌ടമാവുന്നു. സിനിമയോട് അഭിനിവേശമുള്ള ഒരാൾക്ക് ഇങ്ങനെ ഉറങ്ങാൻ സാധിക്കില്ല. നീയുറങ്ങ്... മതിവരുവോളം ഉറങ്ങ്. നിനക്ക് ചുറ്റും നടക്കുന്നത് ഒന്നും നിന്നെ ബാധിക്കുന്നില്ലല്ലോ, ഭാഗ്യവാൻ...'. ഇത്രയും പറഞ്ഞ് രഘുവരൻ പിൻവാങ്ങി.
ആകെ വിറങ്ങലിച്ച അവസ്ഥയിലായിരുന്നു മറുവശത്ത് സൂര്യ. രഘുവരനിൽ നിന്നും ഇത്തരത്തിലുള്ള വാക്കുകൾ കേട്ട സൂര്യയുടെ മാനസികാവസ്ഥ വിവരിച്ചു തരേണ്ട കാര്യമില്ലല്ലോ. ഏതൊരു സിനിമ പ്രേമിയെയും ഉൾക്കിടിലം കൊള്ളിക്കുന്ന, ഉള്ളിലേക്ക് എയ്‌ത് കയറുന്ന വാക് ശരങ്ങൾ. ഇതിൽ കൂടുതൽ എന്തുവേണം സിനിമ സ്വപ്‌നം കാണുന്നവന് ഉള്ളിൽ ഒരു കനലൂതി അഗ്നിയാക്കാൻ.
പിന്നീട് കഠിനാധ്വാനംകൊണ്ട് വളർന്ന സൂര്യ എന്ന അഭിനേതാവിന് തമിഴ് സിനിമ കൽപ്പിച്ചു കൊടുത്ത സിംഹാസനത്തിനും ആ വാക്കുകളുടെ അടിത്തറയുണ്ട്. പിന്നീട് മറ്റൊരു അഭിമുഖത്തിൽ രഘുവരനും ഇതുസംബന്ധിച്ച് ചോദ്യം നേരിട്ടു. താങ്കളുടെ വാക്കുകൾ നടൻ സൂര്യയെ ഊർജം കൊള്ളിച്ചെങ്കിൽ ഒരു നടനെന്ന നിലയിൽ ആഗ്രഹിക്കുന്നതെല്ലാം നേടിയോ എന്നായിരുന്നു ചോദ്യം.
എന്നാൽ താൻ ആഗ്രഹിക്കുന്ന ഒരു ജീവിതമേ അല്ല തനിക്കിപ്പോൾ ഉള്ളതെന്നും സിനിമയായിരുന്നില്ല തന്‍റെ സ്വപ്‌നം എന്നുമായിരുന്നു അദ്ദേഹത്തിന്‍റെ മറുപടി. ഒരു കുഞ്ഞു വീട്, താങ്ങായ, തണലായ ഭാര്യ. വീടിന് മുന്നിലെ കൃഷി, പകലന്തിയോളം പണിയെടുത്ത് താൻ കൃഷി ചെയ്‌ത വിളകൊണ്ടുതന്നെ വിശപ്പകറ്റുന്നു. വീടിന് ചുറ്റും കോഴിയും താറാവും അങ്ങനെ കുറെ ജീവജാലങ്ങളും. അവറ്റകളെ പോറ്റി അവരുടെ സ്‌നേഹം നുകർന്ന് സ്വർഗ തുല്യമായ ഒരു ജീവിതം അതാണ് ഞാൻ ആഗ്രഹിച്ചിരുന്നത്. പക്ഷേ കാലം എന്നെ ഒരു നടനാക്കി. അതിൽ ഖേദമില്ല'- രഘുവരന്‍റെ വാക്കുകൾ ഇങ്ങനെ.
