അമിത്ത് ചക്കാലക്കൽ, കള്ളനും ഭഗവതിയും ഫെയിം മോക്ഷ, വിനയ് ഫോർട്ട്, പുതുമുഖങ്ങളായ ആരതി നായർ, എനാക്ഷി എന്നിവരെ പ്രധാന കഥാപാത്രങ്ങളാക്കി ഈസ്‌റ്റ് കോസ്‌റ്റ് വിജയൻ സംവിധാനം ചെയ്യുന്ന ഏറ്റവും പുതിയ ചിത്രമാണ് 'ചിത്തിനി'. ബിഗ് ബഡ്‌ജറ്റിൽ, ഹൊറർ ഫാമിലി ഇമോഷണൽ ത്രില്ലർ വിഭാഗത്തിലൊരുങ്ങുന്ന ചിത്രം നിർമ്മിക്കുന്നത് " ഈസ്‌റ്റ് കോസ്‌റ്റ് കമ്മ്യൂണിക്കേഷൻസാണ്. ഈസ്‌റ്റ് കോസ്‌റ്റ് നിർമ്മിക്കുന്ന ഏഴാമത്തെ ചിത്രമായ 'ചിത്തിനിയുടെ ഒഫീഷ്യൽ ടീസർ അണിയറ പ്രവർത്തകർ പുറത്തു വീട്ടു.
മലമ്പുഴ, കവ, ധോണി ഫോറസ്‌റ്റ്, പുതുശ്ശേരി, ചിങ്ങഞ്ചിറ, കൊടുമ്പ്, വാളയാർ, ചിറ്റൂർ, തത്തമംഗലം, കൊല്ലങ്കോട്, കലാമണ്ഡലം തുടങ്ങി പാലക്കാടും പരിസര പ്രദേശങ്ങളിലുമായി നിരവധി ലൊക്കേഷനുകളിലായാണ് സിനിമയുടെ ചിത്രീകരണം നടന്നത്. ഈസ്‌റ്റ് കോസ്‌റ്റ് വിജയന്‍റെ സംവിധാനത്തിൽ പുറത്തിറങ്ങിയ കള്ളനും ഭഗവതിയും മികച്ച പ്രേക്ഷക അഭിപ്രായം നേടിയിരുന്നു.
ചിത്രത്തിന്‍റെ പോസ്‌റ്റ് പ്രോഡക്‌ഷൻ ജോലികൾ പുരോഗമിക്കുകയാണ്. കെ വി അനിലിന്‍റെ ആശയത്തിന് ഈസ്‌റ്റ് കോസ്‌റ്റ് വിജയനും, കെ വി അനിലും ചേര്‍ന്നാണ് തിരക്കഥയും സംഭാഷണവും ഒരുക്കിട്ടുള്ളത്. ഈസ്‌റ്റ് കോസ്‌റ്റ് വിജയന്‍, സന്തോഷ്‌ വര്‍മ്മ, സുരേഷ് എന്നിവരുടെ വരികള്‍ക്ക് യുവ സംഗീത സംവിധായകരില്‍ ശ്രദ്ധേയനായ രഞ്ജിൻ രാജാണ് സംഗീത സംവിധാനം നിർവ്വഹിക്കുന്നത്. നാല് ഗാനങ്ങളാണ് ചിത്രത്തിലുള്ളത്. സത്യ പ്രകാശ്, ഹരി ശങ്കർ, കപിൽ കപിലൻ, സന മൊയ്‌തൂട്ടി എന്നിവരാണ് ഗായകർ. ഈ ചിത്രത്തിലെ ഒരു ഫോക്ക് സോംഗിനായി വയനാട്ടിലെ നാടൻ പാട്ട് കലാകാരന്മാരും ഭാഗമായിട്ടുണ്ട്.