ആരാധകര്‍ ഏറെ ആകാംക്ഷയോടെ കാത്തിരിക്കുന്ന ചിത്രമാണ് സൂപ്പര്‍ സ്‌റ്റാര്‍ നായകനായ 'വേട്ടയ്യന്‍'. ചിത്രത്തിലെ മനസിലായോ എന്ന ഗാനം അടുത്തിടെയാണ് റിലീസായത്. ഗാനം പുറത്തിറങ്ങി മണിക്കൂറുകള്‍ക്കുള്ളില്‍ തന്നെ 20 ലക്ഷത്തിലധികം കാഴ്ച്ചക്കാരെ സ്വന്തമാക്കി ട്രെന്‍ഡിങ് ലിസ്‌റ്റില്‍ ഒന്നാമതെത്തി.
രജനീകാന്തിനോടൊപ്പം മലയാളത്തിന്‍റെ ലേഡി സൂപ്പര്‍ സ്‌റ്റാര്‍ മഞ്ജുവാര്യരും ആടിത്തിമര്‍ത്ത 'മനസിലായോ' എന്ന ഗാനം ഒരുക്കിയിരിക്കുന്നത് അനിരുദ്ധ് രവിചന്ദര്‍ ആണ്. ഇപ്പോഴിതാ ചിത്രത്തെ കുറിച്ച് അനിരുദ്ധ് പറഞ്ഞ വാക്കുകളാണ് സോഷ്യല്‍ മീഡിയയില്‍ ശ്രദ്ധ നേടുന്നത്. അനിരുദ്ധിന്‍റെ വാക്കുകള്‍ തരംഗമായതോടെ ചിത്രത്തിനായുള്ള പ്രേക്ഷകരുടെ കാത്തിരിപ്പിനായുള്ള ആകാംക്ഷയും ആവേശവും വര്‍ധിക്കുകയാണ്.
"ശക്തമായ കഥയും തിരക്കഥയുമാണ് വേട്ടയ്യന്‍റേത്. ചിത്രത്തില്‍ സൂപ്പര്‍ സ്‌റ്റാര്‍ അഭിനയിച്ചതോടെ അത് കൂടുതല്‍ ശക്തമായി. സിനിമ പ്രേക്ഷകര്‍ക്ക് ഇഷ്‌ടപ്പെടും. സാമൂഹിക വിഷയം അടിസ്ഥാനമാക്കിയാണ് സിനിമ ഒരുക്കിയിരിക്കുന്നത്.
സൂപ്പര്‍ സ്‌റ്റാറിന്‍റെ പതിവ് സിനിമകളില്‍ നിന്ന് വേട്ടയ്യന്‍ വളരെ വ്യത്യസ്‌തമായിരിക്കും. ഞങ്ങളൊന്നിച്ചെത്തിയ പേട്ട, ജയിലര്‍ തുടങ്ങിയ ചിത്രങ്ങള്‍ വച്ചു നോക്കുമ്പോള്‍ അതില്‍ നിന്നെല്ലാം വേട്ടയ്യന്‍ തികച്ചും വ്യത്യസ്‌തമായിരിക്കും" അനിരുദ്ധന്‍ പറഞ്ഞു.