പ്രശസ്‌ത തെലുഗ് താരം സായ് ദുർഗ തേജ് നയാകനായെത്തുന്ന പുതിയ പാൻ ഇന്ത്യൻ ചിത്രത്തിൽ മലയാളിയും തെന്നിന്ത്യൻ താരവുമായ ഐശ്വര്യ ലക്ഷ്‌മി. ചിത്രത്തിന്‍റെ നായിക കഥാപാത്രത്തിന്‍റെ ഫസ്റ്റ് ലുക്ക് പോസ്റ്റർ പുറത്ത്. 'വിരൂപാക്ഷ', 'ബ്രോ' എന്നീ ബ്ലോക്ക്ബസ്റ്റർ ചിത്രങ്ങൾക്ക് ശേഷം സായി ദുർഗ തേജ് അതിശക്തനായ ഒരു കഥാപാത്രമായാണ് ചിത്രത്തിൽ എത്തുന്നത്.
വലിയ ബഡ്‌ജറ്റിലൊരുക്കുന്ന പീരീഡ് ആക്ഷൻ ഡ്രാമയായ ഈ ചിത്രത്തിന്‍റെ സംവിധായകൻ രോഹിത് കെ പിയാണ്. ഹനുമാൻ്റെ പാൻ ഇന്ത്യ വിജയത്തിന് ശേഷം, നിർമ്മാതാക്കളായ കെ നിരഞ്ജൻ റെഢിയും ചൈതന്യ റെഢിയും ചേർന്ന് പ്രൈംഷോ എന്‍ർടൈൻമെൻ്റിൻ്റെ ബാനറിലാണ് ചിത്രം നിർമ്മിക്കുന്നത്. SDT18 എന്ന് താൽകാലികമായി പേര് നൽകിയിരിക്കുന്ന ചിത്രത്തിൽ, വസന്ത എന്ന് പേരുള്ള ശക്തമായ കഥാപാത്രമായാണ് ഐശ്വര്യ ലക്ഷ്‌മി എത്തുന്നത്.
ഐശ്വര്യയുടെ ജന്മദിനം പ്രമാണിച്ചാണ് നായിക കഥാപാത്രത്തിന്‍റെ ഫസ്റ്റ് ലുക്ക് പോസ്റ്റർ പുറത്ത് വിട്ടിരിക്കുന്നത്. മരുഭൂമിക്ക് സമാനമായ ഭൂപ്രകൃതിയിൽ സജ്ജീകരിച്ചിരിക്കുന്ന ഫസ്റ്റ് ലുക്ക് പോസ്റ്ററിൽ, വളരെ തീഷ്‌ണതയോടെ നോക്കുന്ന ഐശ്വര്യയെകാണാൻ കഴിയും. ഹൈദരാബാദിലെ റാമോജി റാവു ഫിലിം സിറ്റിയിൽ നിർമ്മിച്ചിരിക്കുന്ന ഒരു വലിയ സെറ്റിലാണ് ഇപ്പോൾ സിനിമയുടെ ചിത്രീകരണം പുരോഗമിക്കുന്നത്.