കോട്ട:2025ലെ ദേശീയ യോഗ്യത നിര്‍ണയ പ്രവേശന പരീക്ഷക്കുള്ള (യുജി) സിലബസ് ദേശീയ പരീക്ഷാ ഏജന്‍സി ഔദ്യോഗികമായി പുറത്ത് വിട്ടു. പരീക്ഷയ്ക്കുള്ള വെബ്‌സൈറ്റും പ്രവര്‍ത്തനം തുടങ്ങിക്കഴിഞ്ഞു. പരീക്ഷയ്ക്ക് തയ്യാറെടുക്കുന്ന വിദ്യാര്‍ഥികള്‍ക്ക് neet.nta.nic.in എന്ന വെബ്‌സൈറ്റില്‍ എല്ലാ വിവരങ്ങളും ലഭ്യമാണ്.
ഈ പോര്‍ട്ടല്‍ വഴി വിദ്യാര്‍ഥികള്‍ക്ക് രജിസ്‌ട്രേഷനും അപേക്ഷയും നല്‍കാനും സാധിക്കും. വിവരങ്ങള്‍ സംബന്ധിച്ച ബുള്ളറ്റിനും പരീക്ഷാകേന്ദ്രങ്ങളെക്കുറിച്ചുള്ള വിവരങ്ങളും പ്രവേശന കാര്‍ഡും ഉത്തരസൂചികയും ഫലവും ഈ വെബ്സൈറ്റിലൂടെ തന്നെ അറിയാനാകും.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
ദേശീയ മെഡിക്കല്‍ കമ്മീഷന്‍റെ അണ്ടര്‍ഗ്രാജ്വേറ്റ് മെഡിക്കല്‍ വിദ്യാഭ്യാസ ബോര്‍ഡാണ് (UGMEB) 2025 നീറ്റ് യുജിക്കുള്ള സിലബസിന് അന്തിമരൂപം നല്‍കിയിട്ടുള്ളത്. ഫിസിക്‌സ്, കെമിസ്‌ട്രി, ബയോളജി വിഷയങ്ങളാണ് സിലബസിലുള്ളത്. സിലബസ് പൊതുജനങ്ങള്‍ക്ക് പരിശോധിക്കാനായി ദേശീയ മെഡിക്കല്‍ കമ്മീഷന്‍റെ ഔദ്യോഗിക വെബ്‌സൈറ്റിലും പ്രസിദ്ധീകരിച്ചിട്ടുണ്ട്. വിദ്യാര്‍ഥികള്‍ക്ക് തയാറെടുപ്പിനായി ഇത് ഉപയോഗിക്കാം.
നീറ്റ് യുജി 2025 രാജ്യത്തെ മെഡിക്കല്‍ കോളജുകളില്‍ എംബിബിഎസ് പ്രവേശനത്തിനായുള്ള പരീക്ഷയാണ്. ബിഡിഎസ്, ആയൂര്‍വേദ, വെറ്റിനറി, നഴ്‌സിങ്, ലൈഫ് സയന്‍സ് കോഴ്‌സുകളിലേക്ക് അടക്കം ഇത് വഴിയാണ് പ്രവേശനം നടത്തുന്നത്. 2025 മെയ് നാലിനാണ് പരീക്ഷ. അടുത്തമാസം മുതല്‍ രജിസ്ട്രേഷന് നടപടികള്‍ തുടങ്ങും. കൃത്യമായ തീയതി ഇനിയും പ്രഖ്യാപിച്ചിട്ടില്ല.