ന്യൂഡല്‍ഹി : കുടിവെള്ളം സംബന്ധിച്ച തര്‍ക്കത്തില്‍ ഒരു സ്‌ത്രീയ്ക്ക് ജീവന്‍ നഷ്‌ടമായി. ദേശീയ തലസ്ഥാനമായ ഡല്‍ഹിയിലെ ഷഹദരാസ് ഫാര്‍ഷ് ബസാറിലാണ് സംഭവം. സ്‌ത്രീയെ കുത്തിക്കൊല്ലുകയായിരുന്നു.
സംഭവവുമായി ബന്ധപ്പെട്ട് പതിനഞ്ചുകാരിയെ പൊലീസ് കസ്റ്റഡിയിലെടുത്തു. സോണി (35) എന്ന യുവതിയാണ് കൊല്ലപ്പെട്ടത്. മരിച്ച സ്‌ത്രീയുടെ ഭര്‍ത്താവ് തന്നെയാണ് സംഭവത്തെക്കുറിച്ച് പൊലീസിനെ വിളിച്ചറിയിച്ചത്. ഒരു പെണ്‍കുട്ടി തന്‍റെ ഭാര്യയെ കുത്തി വീഴ്‌ത്തുകയായിരുന്നു എന്നാണ് ഇയാള്‍ പൊലീസില്‍ പറഞ്ഞത്. പൊലീസെത്തുമ്പോള്‍ കയ്യിലും വയറ്റിലും മുറിവേറ്റ നിലയിലാണ് സ്‌ത്രീയെ കണ്ടെത്തിയത്. ഉടന്‍ തന്നെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.