300 അടി താഴ്‌ചയിലേക്ക് സൈനിക വാഹനം മറിഞ്ഞു; അഞ്ച് സൈനികർ മരിച്ചു

ബനോയിയിലേക്ക് പോകുകയായിരുന്ന സൈനിക ട്രക്കാണ് അപകടത്തില്‍പെട്ടത്.

ശ്രീനഗർ: 300 അടി താഴ്‌ചയിലേക്ക് സൈനിക വാഹനം മറിഞ്ഞ് അഞ്ച് സൈനികർ മരിച്ചു. അഞ്ച് പേർക്ക് പരിക്ക്. ലാൻസ് ഹവിൽദാർ അനൂപ്, നായിക് ഘഗ്ഡെ സമദാൻ, സിപോയ് നികുറെ ദിഗംബർ, സുബേദാർ ദയാനന്ദ് തിരക്കണ്ണവർ, ശിപായി മഹേഷ് മാരിഗൊണ്ട് എന്നിവരാണ് മരിച്ചത്. ഇന്നലെ (ഡിസംബർ 24) വൈകീട്ടാണ് അപകടമുണ്ടായത്. ആറ് വാഹനങ്ങളുടെ കൂടെയുണ്ടായിരുന്ന വാഹനമാണ് അപകടത്തില്‍ പെട്ടത്.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക

ബനോയിയിലേക്ക് പോകുകയായിരുന്ന സൈനിക ട്രക്ക് റോഡിൽ നിന്ന് തെന്നി താഴ്‌ചയിലേക്ക് മറിയുകയായിരുന്നു. പൂഞ്ച് സെക്‌ടറിലെ ഡ്യൂട്ടിക്കിടെ വാഹനാപകടത്തിൽ മരിച്ച സൈനികരുടെ മരണത്തിൽ ഇന്ത്യൻ ആർമി സമൂഹമാധ്യമമായ എക്‌സിലൂടെ അനുശോചനം രേഖപ്പെടുത്തി.

അപകടത്തിൻ്റെ കാരണം അന്വേഷിച്ചുവരികയാണെന്ന് പ്രതിരോധ വക്താവ് പറഞ്ഞു. റോഡിലെ വളവിൽ വച്ച് ഡ്രൈവർക്ക് നിയന്ത്രണം നഷ്‌ടപ്പെട്ടതാകാം അപകടത്തിന് കാരണമായതെന്നാണ് പ്രാഥമിക നിഗമനം. സംഭവത്തിന് പിന്നിൽ തീവ്രവാദവുമായി ബന്ധപ്പെട്ട പ്രവർത്തനങ്ങളൊന്നുമില്ലെന്ന് അദ്ദേഹം പറഞ്ഞു.

വാഹനാപകടത്തിൽ അഞ്ച് സൈനികർ മരിച്ചതിൽ അഗാധമായ ദുഃഖമുണ്ടെന്നും അനുശോചനം രേഖപ്പെടുത്തുകയാണെന്നും കോൺഗ്രസ് അധ്യക്ഷൻ മല്ലികാർജുൻ ഖർഗെ പറഞ്ഞു. പരിക്കേറ്റവർ വേഗത്തിൽ സുഖം പ്രാപിക്കട്ടെയെന്നും മരിച്ചവരുടെ കുടുംബങ്ങളോടൊപ്പം ദുഃഖത്തിൽ പങ്കുചേരുന്നുവെന്നും പ്രതിപക്ഷ നേതാവ് രാഹുൽ ഗാന്ധി പറഞ്ഞു.