ന്യൂഡൽഹി :നിതി ആയോഗിന്‍റെ ഒമ്പതാമത് ഗവേണിങ് കൗൺസിൽ യോഗം പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ഇന്ന് (ജൂലൈ 27) ചേരും. 2047 ഓടെ ഇന്ത്യയെ ഒരു വികസിത രാഷ്ട്രമാക്കുക എന്നതായിരിക്കും രാഷ്ട്രപതി ഭവൻ കൾച്ചറൽ സെന്‍ററില്‍ വച്ച് നടക്കുന്ന യോഗത്തിന്‍റെ മുഖ്യ അജണ്ട. പ്രധാനമന്ത്രിയെ കൂടാതെ, എല്ലാ സംസ്ഥാനങ്ങളിലെ മുഖ്യമന്ത്രിമാരും കേന്ദ്ര ഭരണ പ്രദേശങ്ങളിലെ ലെഫ്റ്റനൻ്റ് ഗവർണർമാരും, കേന്ദ്ര മന്ത്രിമാരും, എക്‌സ് ഒഫീഷ്യോ അംഗങ്ങളും മറ്റ് അതിഥികളും യോഗത്തില്‍ പങ്കെടുക്കും.
കേരളം, തമിഴ്‌നാട്, പഞ്ചാബ്, ഡൽഹി സർക്കാരുകള്‍ യോഗം ബഹിഷ്‌കരിച്ചതായി അറിയിച്ചു. എന്നാല്‍ പശ്ചിമ ബംഗാൾ മുഖ്യമന്ത്രി മമത ബാനർജി യോഗത്തില്‍ പങ്കെടുക്കും. 'വികസിത് ഭാരത്@2047' എന്നതാണ് നിതി ആയോഗിൻ്റെ ഈ വർഷത്തെ പ്രമേയം.