തമിഴ്‌നാട്ടിൽ നിർമ്മാണ പ്രവർത്തനത്തിനിടെ മണ്ണിടിഞ്ഞു : അതിഥി തൊഴിലാളി മരിച്ചു, ഒരാൾക്ക് പരിക്ക്

സംരക്ഷണ ഭിത്തി പണിയുന്നതിനിടെ മണ്ണിടിഞ്ഞാണ് അപകടം. ജാർഖണ്ഡ് സ്വദേശികളാണ് അപകടത്തില്‍പ്പെട്ടത്

ചെന്നൈ: തമിഴ്‌നാട്ടിൽ നിർമാണ പ്രവർത്തനത്തിനിടെ മണ്ണിടിഞ്ഞ് ഇതര സംസ്ഥാന തൊഴിലാളി മരിച്ചു (Migrant worker killed in construction site accident at Ooty). റിസ്‌വാൻ (22) ആണ് മരിച്ചത്. ഒരാൾക്ക് പരിക്കേറ്റിട്ടുണ്ട്. ഇരുവരും ജാർഖണ്ഡ് സ്വദേശികളാണ്. ഊട്ടിക്ക് സമീപം ഉദഗമണ്ഡലത്തിലായിരുന്നു അപകടം.

മണ്ണിടിച്ചിൽ തടയാനായി റിസ്‌വാനും സഹ തൊഴിലാളിയും ചേർന്ന് സംരക്ഷണഭിത്തി നിർമിക്കുകയായിരുന്നു. ഇതിനിടെയാണ് അപകടമുണ്ടായത് (Ooty construction site mishap). മണ്ണിടിഞ്ഞ് ഇരുവരും അവശിഷ്‌ടങ്ങൾക്കിടയിൽ കുടുങ്ങിപ്പോയിരുന്നു. സംഭവം അറിഞ്ഞെത്തിയ നാട്ടുകാർ ഫയർഫോഴ്‌സിൽ വിവരം അറിയിക്കുകയായിരുന്നു.

തുടർന്ന് ഫയർഫോഴ്‌സ് സ്ഥലത്തെത്തി രക്ഷാപ്രവർത്തനം ആരംഭിച്ചു. 90 മിനിറ്റ് നീണ്ട പരിശ്രമങ്ങൾക്കൊടുവിലാണ് ഇരുവരെയും പുറത്തെടുത്തത്. ഉടൻ തന്നെ സമീപത്തുള്ള പ്രാദേശിക സർക്കാർ ആശുപത്രിയിൽ എത്തിച്ചെങ്കിലും റിസ്‌വാനെ രക്ഷിക്കാനായില്ല. അശാസ്ത്രീയമായ നിർമ്മാണ പ്രവർത്തനങ്ങളാണ് ദുരന്തത്തിനിടയാക്കിയതെന്ന ആരോപണം ഉയരുന്നുണ്ട്.

അടുത്തിടെ എറണാകുളം ജില്ലയിലെ പിറവത്തും സമാനസംഭവം ഉണ്ടായിരുന്നു. പേപ്പതിയിൽ മാർച്ച് 6നാണ് സംഭവം. കെട്ടിട നിർമാണവുമായി ബന്ധപ്പെട്ട് മണ്ണ് നീക്കുന്നതിനിടെയാണ് അപകടമുണ്ടായത്. അപകടത്തിൽ മൂന്ന് അതിഥി തൊഴിലാളികള്‍ മരിച്ചു. പശ്ചിമ ബംഗാൾ സ്വദേശികളാണ് മരിച്ചത്.

കൊൽക്കത്ത ഭോലഡംഗ ജില്ലയിൽ ബംഗാരിയ സ്വദേശി ഗൗർ മണ്ഡൽ(29), നോർത്ത് 24 ഫർഗാനയിൽ ഹാർബ സ്വദേശി സുകുമാർ ഘോഷ് (45), കുമര കാശിപൂർ സ്വദേശി സുബ്രത കിർത്താനിയ (37) എന്നിവരാണ് മരിച്ചത്. നിർമ്മാണ പ്രവർത്തനങ്ങൾക്കിടെ അൻപതടിയോളം മുകളിൽനിന്നാണ് തൊഴിലാളികളുടെ ശരീരത്തിലേക്ക് മണ്ണിടിഞ്ഞ് വീണത്. മൂന്ന് പേരും മണ്ണിനടിയിൽപ്പെടുകയായിരുന്നു.

അപകട വിവരം അറിഞ്ഞയുടൻ പിറവം, മുളന്തുരുത്തി അഗ്നിരക്ഷാ സേനയും പോലീസുകാരും നാട്ടുകാരും ചേർന്ന് തെരച്ചിൽ നടത്തിയിരുന്നു. തുടർന്ന് ഏഴര മണിയോടെയാണ് തൊഴിലാളികളെ കണ്ടെത്തിയത്. ആശുപത്രിയിലെത്തിച്ചെങ്കിലും മൂവരും മരിച്ചിരുന്നു.