ഒട്ടാവ (കാനഡ) :ഖലിസ്ഥാന്‍ വിഘടനവാദി ഹര്‍ദീപ് സിങ് നിജ്ജാറിനെ കൊലപ്പെടുത്തിയ സംഭവത്തില്‍ നാല് ഇന്ത്യന്‍ പൗരന്മാര്‍ കനേഡിയന്‍ കോടതിയില്‍ ഹാജരായി. കരണ്‍ ബ്രാര്‍ (22), കമല്‍പ്രീത് (22), കരണ്‍പ്രീത് (28), അമന്‍ദീപ് സിങ് (22) എന്നിവരാണ് സറേയിലെ പ്രവിശ്യ കോടതിയില്‍ ഹാജരായത്. ഇവരില്‍ അമന്‍ദീപ് സിങ് വീഡിയോ കോണ്‍ഫറന്‍സ് വഴിയും മറ്റ് മൂന്നുപേര്‍ നേരിട്ടുമാണ് കോടതിയില്‍ ഹാജരായത്.
നിജ്ജാറിന്‍റെ കൊലപാതത്തിന് മുന്‍പുള്ള മറ്റൊരു കേസുമായി ബന്ധപ്പെട്ട് ഒന്‍റാറിയോയില്‍ കസ്റ്റഡിയില്‍ കഴിയുകയാണ് അമന്‍ദീപ് സിങ്. കേസ് ജൂണ്‍ 25ന് വീണ്ടും പരിഗണിക്കും. കോടതിയില്‍ നേരിട്ട് ഹാജരായവര്‍ ജയിലിലെ ചുവന്ന വസ്‌ത്രം ധരിച്ചുകൊണ്ടാണ് കോടതിയില്‍ എത്തിയത്.
സാമുദായിക താത്‌പര്യങ്ങളോടെ കേസിനെ പലരും സമീപിക്കുന്നു എന്നത് പകല്‍പോലെ വ്യക്തമാണെന്നും അതിനാല്‍ ന്യായമായ വിചാരണ നടക്കണമെന്നും കരണ്‍ ബ്രാറിന്‍റെ അഭിഭാഷകന്‍ കോടതിയില്‍ പറഞ്ഞു. അതേസമയം ബ്രാറും സംഘവും കോടതിയില്‍ എത്തിയപ്പോള്‍ പുറത്ത് നിജ്ജാര്‍ അനുകൂലികള്‍ പ്രതിഷേധിച്ചിരുന്നു.