ബെലഗാവി:കർണാടക മന്ത്രി ലക്ഷ്‌മി ഹെബ്ബാൾക്കറും സഹോദരൻ ചന്നരാജ് ഹട്ടിഹോളി എംഎൽഎയും സഞ്ചരിച്ച കാര്‍ അപകടത്തില്‍പ്പെട്ടു. ഇവര്‍ സഞ്ചരിച്ച കാര്‍ ഒരു മരത്തിൽ ഇടിച്ചു കയറുകയായിരുന്നു. ബെലഗാവി ജില്ലയിലെ കിത്തൂരിന് സമീപം ഇന്ന് രാവിലെയാണ് അപകടമുണ്ടായത്. ബെംഗളൂരുവിൽ നിന്ന് മടങ്ങുമ്പോഴായിരുന്നു അപകടം.
അപകടത്തില്‍ മന്ത്രിക്കും സഹോദരനും പരിക്കേറ്റിട്ടുണ്ട്. മന്ത്രിയുടെ കഴുത്തിനും പുറകിലും കൈകൾക്കും പരിക്കുണ്ട്. കാലിനും ഒടിവുണ്ട്. ചന്നരാജ് ഹട്ടിഹോളിയുടെ തലയ്ക്ക് പരിക്കേറ്റു. ഇരുവരും അപകടനില തരണം ചെയ്‌തതായി ആശുപത്രി അധികൃതര്‍ അറിയിച്ചു.
കാറിന്‍റെ ഡ്രൈവർക്കും ഗൺമാനും നിസാര പരിക്കുകളോടെ രക്ഷപെട്ടു. പ്രഥമ ശുശ്രൂഷയ്ക്ക് ശേഷം ഇവരെ ഡിസ്‌ചാർജ് ചെയ്‌തതായി ആശുപത്രി അറിയിച്ചു.