മാണ്ഡി (ഹിമാചൽ പ്രദേശ്) :2024 ലെ ലോക്‌സഭ തെരഞ്ഞെടുപ്പിനുള്ള പ്രചാരണം ആരംഭിച്ച് ബിജെപി സ്ഥാനാർഥിയും നടിയുമായ കങ്കണ റണാവത്ത്. വെള്ളിയാഴ്‌ചയാണ് (29-03-2024) കങ്കണ റണാവത്ത് മാണ്ഡി ലോക്‌സഭ മണ്ഡലത്തിൽ അവരുടെ ആദ്യ റോഡ് ഷോ നടത്തിയത്. വികസനത്തിനാണ് മുൻഗണനയെന്ന് പറഞ്ഞ നടി, തന്നെ അവരില്‍ ഒരാളായി കാണാനും വോട്ടര്‍മാരോട് അഭ്യർഥിച്ചു.
തുറന്ന ജീപ്പിലാണ് കങ്കണ മാണ്ഡിയിലെ ബൽദ്വാരയിലെത്തിയത്. പലയിടത്തും താരത്തിന് ഊഷ്‌മളമായ സ്വീകരണം ലഭിച്ചു. ബിജെപി പ്രവർത്തകരും നാട്ടുകാരും കങ്കണയെ കാണാൻ തടിച്ചുകൂടിയിരുന്നു. ജീപ്പിൽ നിന്ന് തന്നെ മാണ്ഡ്യാലി ഭാഷയിൽ കങ്കണ അവിടെയുണ്ടായിരുന്ന ജനങ്ങളെ അഭിസംബോധന ചെയ്‌തു.
'എന്‍റെ സംസ്ഥാനത്തെ ജനങ്ങൾ എന്നെ എത്രമാത്രം സ്‌നേഹിക്കുന്നു എന്ന് ഇന്ന് രാജ്യം മുഴുവൻ കാണുന്നുണ്ട്. എന്‍റെ മുത്തച്‌ഛൻ ഇവിടുത്തെ എംഎൽഎ ആയിരുന്നു, തന്‍റെ ജീവിതം ജനസേവനത്തിനായി ഉഴിഞ്ഞുവച്ച വ്യക്തിയായിരുന്നു അദ്ദേഹം. ഞാൻ ജയിച്ചാലും അദ്ദേഹത്തിനെ പോലെ തന്നെ ഞാനും ജനസേവനത്തിനായി പ്രവർത്തിക്കും. മാണ്ഡിയിലെ ജനങ്ങൾ എന്‍റെ കുടുംബമാണ്. കങ്കണ ഒരു താരമോ നായികയോ ആണെന്ന് കരുതരുത്. കങ്കണ നിങ്ങളുടേതാണെന്ന് കരുതുക. അവൾ നിങ്ങളുടെ മകളാണ്, കങ്കണ നിങ്ങളുടെ സഹോദരിയാണ്' -എന്ന് ജനങ്ങളെ അഭിസംബോധന ചെയ്‌ത് കങ്കണ റണാവത്ത് പറഞ്ഞു.
റോഡ് ഷോയിൽ മാണ്ഡി ജില്ലയിലെ സർക്കാഘട്ടിൽ നിന്നുള്ള എംഎൽഎ ദലിപ് താക്കൂറും പ്രാദേശിക ബിജെപി നേതാക്കളും പാർട്ടി പ്രവർത്തകരും കങ്കണ റണാവത്തിനൊപ്പം ഉണ്ടായിരുന്നു. കങ്കണ തന്‍റെ റോഡ് ഷോയ്ക്കിടെ ജയ് ശ്രീറാം മുദ്രാവാക്യം ഉയർത്തി വികസനമാണ് തന്‍റെയും ബിജെപിയുടെയും പ്രാഥമിക ലക്ഷ്യമെന്നും കങ്കണ പറഞ്ഞു. മാണ്ഡിയിലെ ജനങ്ങൾ എതിരാളികൾക്ക് മറുപടി നൽകുമെന്നും അവർ കൂട്ടിച്ചേർത്തു.