പണിപാളി... കശ്‌മീരില്‍ കൊടും തണുപ്പ്; റോഡില്‍ നിന്ന് വാഹനങ്ങള്‍ തെന്നിപ്പോകുന്നു, വിനോദ സഞ്ചാരികള്‍ക്ക് മുന്നറിയിപ്പ്

ശ്രീനഗറിലും മറ്റ് പല സ്ഥലങ്ങളിലും സീസണിലെ ഏറ്റവും കുറഞ്ഞ താപനിലയാണ് കഴിഞ്ഞ ദിവസം (ഡിസംബര്‍ 9) രേഖപ്പെടുത്തിയതെന്ന് അധികൃതർ പറഞ്ഞു.

ശ്രീനഗര്‍: കശ്‌മീര്‍ താഴ്‌വരയുടെ വിവിധ ഭാഗങ്ങളിൽ തീവ്രമായ തണുപ്പ് രേഖപ്പെടുത്തി. മിക്ക സ്ഥലങ്ങളിലും കഴിഞ്ഞ ദിവസം രാത്രി സീസണിലെ കൊടും തണുപ്പാണ് രേഖപ്പെടുത്തിയത്. ശ്രീനഗറിലും മറ്റ് പല സ്ഥലങ്ങളിലും സീസണിലെ ഏറ്റവും കുറഞ്ഞ താപനിലയാണ് കഴിഞ്ഞ ദിവസം (ഡിസംബര്‍ 9) രേഖപ്പെടുത്തിയതെന്ന് അധികൃതർ പറഞ്ഞു.

ഈ സീസണിലെ രാത്രിയിലെ താപനില സാധാരണയിൽ നിന്ന് 2.7 മുതൽ 5.7 ഡിഗ്രി വരെ താഴ്‌ന്നു. ശ്രീനഗർ നഗരത്തിൽ കുറഞ്ഞ താപനില മൈനസ് 5.4 ഡിഗ്രി സെൽഷ്യസ് രേഖപ്പെടുത്തിയതായി അധികൃതർ അറിയിച്ചു, കഴിഞ്ഞ രാത്രിയിലെ താപനില മൈനസ് 3.3 ഡിഗ്രി സെൽഷ്യസായി കുറഞ്ഞു.

The upper reaches of Jammu & Kashmir receive fresh snowfall (ANI)

നഗരത്തിൽ ഇതുവരെയുള്ള സീസണിലെ ഏറ്റവും തണുപ്പുള്ള രാത്രിയാണ് കഴിഞ്ഞ ദിവസത്തേതെന്നും, താപനില സാധാരണയിൽ നിന്ന് 4.8 ഡിഗ്രി കുറവാണെന്നും അധികൃതര്‍ പറഞ്ഞു.

താഴ്‌വരയുടെ ചില ഭാഗങ്ങളിൽ ശക്തമായ തണുപ്പ് കാരണം ജലവിതരണ പൈപ്പുകൾ മരവിച്ചതായി അധികൃതർ അറിയിച്ചു. വടക്കൻ കശ്‌മീരിലെ പ്രശസ്‌തമായ സ്‌കീ റിസോർട്ടായ ഗുൽമാർഗിലെ രാത്രി താപനില മൈനസ് 9.0 ഡിഗ്രി സെൽഷ്യസായി കുറഞ്ഞു, ഈ സീസണിലെ ഏറ്റവും താഴ്ന്ന താപനിലയാണ് രേഖപ്പെടുത്തിയത്.

Kashmir snowfall (ANI)

അമർനാഥ് യാത്രയുടെ ബേസ് ക്യാമ്പായി പ്രവർത്തിക്കുന്ന പഹൽഗാമിൽ മൈനസ് 8.4 ഡിഗ്രി സെൽഷ്യസാണ് രേഖപ്പെടുത്തിയത്. കശ്‌മീരിലേക്കുള്ള ഗേറ്റ്‌വേ നഗരമായ ഖാസിഗണ്ടിൽ മൈനസ് 6.4 ഡിഗ്രി സെൽഷ്യസും വടക്കൻ കശ്‌മീരിലെ കുപ്‌വാരയിൽ കുറഞ്ഞത് മൈനസ് 4.5 ഡിഗ്രി സെൽഷ്യസും തെക്കൻ കശ്‌മീരിലെ കോക്കർനാഗിൽ മൈനസ് 4 ഡിഗ്രി സെൽഷ്യസും രേഖപ്പെടുത്തിയിട്ടുണ്ട്. കശ്‌മീരിലെ ഉയർന്ന പ്രദേശങ്ങളിൽ ഞായർ, തിങ്കൾ ദിവസങ്ങളിലെ രാത്രിയിൽ മഞ്ഞു വീഴ്‌ചയും ഉണ്ടായി.

A vehicle is covered in a blanket of snow amid fresh snowfall (ANI)

കശ്‌മീരിലെ വരണ്ട കാലാവസ്ഥ മൂലം ചുമ, ജലദോഷം തുടങ്ങിയ അസുഖങ്ങൾ വർധിക്കാൻ കാരണമായതായി അധികൃതർ പറഞ്ഞു. ജനങ്ങൾ, പ്രത്യേകിച്ച് കുട്ടികളും പ്രായമായവരും മുൻകരുതലുകൾ എടുക്കാനും വീടിനുള്ളിൽ തന്നെ കഴിയാനും ഡോക്‌ടർമാർ നിർദേശിച്ചിട്ടുണ്ട്.

The upper reaches of Jammu & Kashmir receive fresh snowfall (ANI)

ഡിസംബർ 18 വരെ കശ്‌മീരിൽ വരണ്ട കാലാവസ്ഥയായിരിക്കുമെന്നും ഡിസംബർ 12 ന് താഴ്‌വരയുടെ ഉയർന്ന പ്രദേശങ്ങളിലെ ഒറ്റപ്പെട്ട സ്ഥലങ്ങളിൽ നേരിയ മഞ്ഞു വീഴ്‌ചയ്ക്ക് സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം പ്രവചിക്കുന്നു.

Srinagar snow fall (ANI)

യാത്രക്കാര്‍ കുടുങ്ങി; ബ്രേക്ക് കിട്ടാതെ വാഹനങ്ങള്‍ തെന്നിപ്പോകുന്നു

അതേസമയം, മഞ്ഞ് കാരണം കശ്‌മീരിലെ റോഡുകളില്‍ നിന്ന് വാഹനങ്ങള്‍ തെന്നിപ്പോകുന്ന വീഡിയോകള്‍ സോഷ്യല്‍ മീഡിയയില്‍ വൈറലാകുന്നു. കഴിഞ്ഞ ദിവസം നിരവധി യാത്രക്കാര്‍ റോഡില്‍ കുടുങ്ങുന്ന സ്ഥിതിയുണ്ടായി. റോഡില്‍ മഞ്ഞ് നിറഞ്ഞതിനാല്‍ പല ഡ്രൈവര്‍മാരും വാഹനങ്ങള്‍ ഓടിക്കാൻ പാടുപെട്ടു,

പലരും ബ്രേക്കിട്ട് വാഹനങ്ങള്‍ നിയന്ത്രിക്കാൻ ശ്രമിച്ചെങ്കിലും റോഡില്‍ നിന്ന് തെന്നിപ്പോകുന്ന സ്ഥിതിയുണ്ടായി. ഇതിന്‍റെ വീഡിയോ സോഷ്യല്‍ മീഡിയയില്‍ വൈറലാണ്. കശ്‌മീരിലേക്ക് പോകുന്ന വിനോദ സഞ്ചാരികളും നിലവിലെ സാഹചര്യത്തെ കുറിച്ച് മുൻകരുതല്‍ സ്വീകരിക്കണമെന്നും മുന്നറിയിപ്പുണ്ട്.