അഹമ്മദാബാദ് : ഗുജറാത്തില്‍ കനത്ത മഴയില്‍ മൂന്ന് നില കെട്ടിടം ഇടിഞ്ഞുവീണ് വയോധികയും രണ്ട് കൊച്ചുമക്കളും മരിച്ചു. ദേവഭൂമി ദ്വാരക ജില്ലയിലെ ജാം ഖംഭാലിയ പട്ടണത്തില്‍ ഇന്നലെ വൈകുന്നേരമാണ് സംഭവം. കേശർബെൻ കഞ്ചാരിയ (65), പ്രീതിബെൻ കഞ്ചാരിയ (15), പായൽബെൻ കഞ്ചാരിയ (18) എന്നിവരാണ് കൊല്ലപ്പെട്ടത്. അര്‍ധ രാത്രി വരെ നീണ്ട രക്ഷാപ്രവർത്തനത്തിനൊടുവില്‍ മൂവരുടെയും മൃതദേഹങ്ങൾ പുറത്തെടുത്തു.
അവശിഷ്‌ടങ്ങൾക്കിടയിൽ കുടുങ്ങിയ മറ്റ് അഞ്ച് പേരെ നാട്ടുകാർ ചേര്‍ന്ന് രക്ഷപ്പെടുത്തി. മരിച്ചവരുടെ മൃതദേഹങ്ങൾ പോസ്റ്റ്‌മോർട്ടത്തിനായി സർക്കാർ ആശുപത്രിയിലേക്ക് അയച്ചതായി പൊലീസ് പറഞ്ഞു. അതേസമയം, സൗരാഷ്ട്ര, തെക്കൻ ഗുജറാത്ത് ജില്ലകളിൽ കനത്ത മഴ തുടരുകയാണ്. അണക്കെട്ടുകളും നദികളും കവിഞ്ഞൊഴുകുകയാണ്.