മുംബൈ:മദ്യപിച്ചെത്തിയ യാത്രക്കാരന്‍റെ അതിക്രമത്തെ തുടര്‍ന്ന് നിയന്ത്രണം വിട്ട ബസിടിച്ച് ഒമ്പത് കാൽനടയാത്രക്കാർക്ക് പരിക്ക്. മുംബൈയിലെ ലാല്‍ ബാഗ് ഏരിയയിലാണ് സംഭവം. ദക്ഷിണ മുംബൈയിലെ ബല്ലാർഡ് പിയറിൽ നിന്ന് സിയോണിലെ റാണി ലക്ഷ്‌മിഭായ് ചൗവിലേക്ക് പോവുകയായിരുന്ന ബസാണ് അപകടത്തില്‍പ്പെട്ടത്.
മദ്യപിച്ച് ബസില്‍ കയറിയ യാത്രക്കാരന്‍ ഡ്രൈവറോട് തര്‍ക്കിക്കുന്നതിനിടെ ബസിന്‍റെ സ്റ്റിയറിങ് വീലിൽ പിടിച്ച് തിരിക്കുകയായിരുന്നു. നിയന്ത്രണം വിട്ട ബസ് കാല്‍നടയാത്രക്കാരെയും സമീപത്തെ കാറുകളിലും ഇരുചക്രവാഹനങ്ങളിലും ഇടിച്ചാണ് നിന്നത്. പരിക്കേറ്റവരില്‍ മൂന്ന് പേരുടെ നില ഗുരുതരമാണ്.