ന്യൂഡല്‍ഹി:വരാനിരിക്കുന്ന ലോക്‌സഭ തെരഞ്ഞെടുപ്പില്‍ മത്സരിക്കുന്ന സ്ഥാനാര്‍ഥികളെ സംബന്ധിച്ച് ചര്‍ച്ച നടത്തി കോണ്‍ഗ്രസ് തെരഞ്ഞെടുപ്പ് കമ്മിറ്റി (സിഇസി). പാര്‍ട്ടി അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെ നേതൃത്വത്തില്‍ ദേശീയ തലസ്ഥാനത്ത് ചേര്‍ന്ന യോഗത്തില്‍ സോണിയ ഗാന്ധി, കെസി വേണുഗോപാലാല്‍ തുടങ്ങി നിരവധി പേര്‍ പങ്കെടുത്തു. കർണാടക, തെലങ്കാന, പുതുച്ചേരി, മധ്യപ്രദേശ്, ഗുജറാത്ത് എന്നിവിടങ്ങളിലെ ലോക്‌സഭ തെരഞ്ഞെടുപ്പ് സ്ഥാനാര്‍ഥികളെക്കുറിച്ചും, ആന്ധ്രപ്രദേശ്, സിക്കിം എന്നിവിടങ്ങളിലെ നിയമസഭ തെരഞ്ഞെടുപ്പുകളില്‍ മത്സരിക്കുന്ന സ്ഥാനാര്‍ഥികളെക്കുറിച്ചും പാനല്‍ ചര്‍ച്ച നടത്തി.
60 മുതല്‍ 70 സ്ഥാനാര്‍ഥികളെ സംബന്ധിച്ച് യോഗത്തില്‍ ചര്‍ച്ച നടത്തിയതായി നേതാക്കള്‍ അറിയിച്ചു. ഏപ്രിൽ 19 മുതൽ ഏഴ് ഘട്ടങ്ങളിലായി നടക്കുന്ന ലോക്‌സഭ തെരഞ്ഞെടുപ്പിൽ 82 സ്ഥാനാർഥികളെയാണ് കോൺഗ്രസ് ഇതുവരെ പ്രഖ്യാപിച്ചിത്. സ്ഥാനാര്‍ഥികളെക്കുറിച്ച് നടന്ന ചര്‍ച്ചകള്‍ക്ക് പുറമെ കോണ്‍ഗ്രസിന്‍റെ പ്രകടന പത്രികയെക്കുറിച്ചും ചര്‍ച്ചകള്‍ നടത്തിയതായാണ് വിവരം. കോണ്‍ഗ്രസിന്‍റെ അഞ്ച് ന്യായങ്ങളും 25 ഗ്യാരണ്ടികളും ചര്‍ച്ച ചെയ്‌തിട്ടുണ്ടെന്ന് യോഗത്തിന് പിന്നാലെ നേതാവ് രാഹുല്‍ ഗാന്ധി പറഞ്ഞു.