ഹരിദ്വാര്‍ (ഉത്തരാഖണ്ഡ്) : ബാബ ടാര്‍സെം സിങ് കൊലക്കേസ് പ്രതി അമര്‍ജീത് സിങ് കൊല്ലപ്പെട്ടതായി ഉത്തരാഖണ്ഡ് പൊലീസ്. ഇന്ന് (ഏപ്രില്‍ 9) പുലര്‍ച്ചെ ഹരിദ്വാറിലെ ഭഗവാന്‍പൂര്‍ മേഖലയില്‍ ഉത്തരാഖണ്ഡ് സ്‌പെഷ്യല്‍ ടാസ്‌ക് ഫോഴ്‌സുമായുണ്ടായ ഏറ്റുമുട്ടലിലാണ് ഇയാള്‍ കൊല്ലപ്പെട്ടത്. ഒളിവിലായിരുന്ന ഇയാളെ കുറിച്ച് വിവരം നല്‍കുന്നവര്‍ക്ക് ഒരു ലക്ഷം രൂപ പാരിതോഷികം പ്രഖ്യാപിച്ചിരുന്നു.
ഏറ്റുമുട്ടലിനിടെ അമര്‍ജീത് കൊല്ലപ്പെട്ടെങ്കിലും കൂട്ടാളി സരബ്‌ജീത് സിങ് സംഭവ സ്ഥലത്ത് നിന്ന് രക്ഷപ്പെട്ടു. ഇക്കഴിഞ്ഞ മാര്‍ച്ച് 28നാണ് ഉദ്ദംസിങ്‌ നഗര്‍ നാനക്‌മട്ട ഗുരുദ്വാര കര്‍സേവ തലവന്‍ ബാബ ടാര്‍സെം സിങ് കൊല്ലപ്പെട്ടത്. ബൈക്കിലെത്തിയ അക്രമികള്‍ ഗുരുദ്വാരയില്‍ വച്ച് ബാബയ്‌ക്ക് നേരെ നിറയൊഴിക്കുകയായിരുന്നു. കൊലപാതകം നടത്തിയ ശേഷം ഷൂട്ടര്‍മാരായ അമര്‍ജീത് സിങ്ങും സരബ്‌ജീത് സിങ്ങും ഒളിവില്‍ പോയി.