ഹൈദരാബാദ്: കേന്ദ്ര ആഭ്യന്തര മന്ത്രി അമിത് ഷായുടെ വ്യാജ വീഡിയോ പ്രചരിപ്പിച്ച കേസിൽ ഗുജറാത്തിലെ കോൺഗ്രസ് എംഎൽഎ ജിഗ്നേഷ് മേവാനിയുടെ പി എയും ആം ആദ്‌മി പാർട്ടി പ്രവർത്തകനും അറസ്‌റ്റിൽ. സതീഷ് വൺസോള, ആർ ബി ബാരിയ എന്നിവരാണ് അറസ്‌റ്റിലായത്. അമിത് ഷായുടെ പ്രസംഗം തെറ്റായി ചിത്രീകരിച്ചതിനാണ് സൈബർ ക്രൈം പൊലീസ് ഇരുവരെയും പിടികൂടിയത്.
വ്യാജ വീഡിയോ ഫേസ്‌ബുക്കിൽ പങ്കുവച്ചതിനാണ് അഹമ്മദാബാദ് സൈബർ സെൽ നടപടി എടുത്തത്. ഇരുവരും അഹമ്മദാബാദ് പൊലീസിന്‍റെ കസ്‌റ്റഡിയിലാണ്. നിർമിത ബുദ്ധി ഉപയോഗിച്ച് നിർമിച്ച ഇത്തരം വ്യാജ വീഡിയോകൾ തെരഞ്ഞെടുപ്പ് ഫലത്തെ ബാധിക്കുമെന്ന് പ്രധാനമന്ത്രി നരേന്ദ്ര മോദി നേരത്തെ പറഞ്ഞിരുന്നു.