ഹൈദരാബാദ്: സാങ്കേതിക തകരാർ മൂലം ഗൾഫ് എയർ വിമാനം വഴിതിരിച്ചു വിട്ടതിനെ തുടർന്ന് മണിക്കൂറുകളോളം വിമാനത്താവളത്തിൽ കുടുങ്ങി ഇന്ത്യൻ യാത്രക്കാർ. 60 ഓളം ഇന്ത്യൻ യാത്രക്കാരാണ് കുവൈറ്റ് അന്താരാഷ്ട്ര വിമാനത്താവളത്തിൽ കുടുങ്ങിയത്. 13 മണിക്കൂറോളം ഭക്ഷണമോ അടിസ്ഥാന സൗകര്യങ്ങളോ ലഭിക്കാതെ വിമാനത്താവളത്തിൽ കഴിയേണ്ടി വന്നെന്ന് യാത്രക്കാർ പറഞ്ഞു.
മുംബൈയിൽ നിന്ന് മാഞ്ചസ്റ്ററിലേക്ക് പോകുന്ന GF 005 എന്ന ഗൾഫ് എയർ വിമാനം വഴി തിരിച്ചു വിട്ടതോടെയാണ് യാത്രക്കാർ വിമാനത്താവളത്തിൽ കുടുങ്ങിയത്. യുകെ, യുഎസ് പാസ്‌പോർട്ട് ഉടമകൾക്ക് ട്രാൻസിറ്റ് വിസ ഉണ്ടായിരുന്നതിനാൽ പുറത്ത് കടക്കാൻ സാധിച്ചെങ്കിലും, ഇത് ഇല്ലാത്തതിനാൽ ഇന്ത്യൻ യാത്രക്കാർ കുടുങ്ങി പോവുകയായിരുന്നു.