ഹൈദരാബാദ്: അടുത്തിടെ ഇന്ത്യൻ വിപണിയിൽ അവതരിപ്പിച്ച മഹീന്ദ്രയുടെ ഇലക്ട്രിക് എസ്‌യുവി ആയ BE 6e യുടെ പേര് മാറ്റി. BE 6 എന്നാണ് പുതിയ പേര്. പേരിന്‍റെ പകർപ്പാവകാശവുമായി ബന്ധപ്പെട്ട വിഷയത്തിൽ ഇൻഡിഗോ കേസ് ഫയൽ ചെയ്‌തതിനെ തുടർന്നാണ് BE 6e യുടെ പേര് മാറ്റിയത്.
മഹീന്ദ്ര പുതിയ ഇലക്ട്രിക് എസ്‌യുവിക്ക് പേരിട്ടതിനെതിരെ ഇൻഡിഗോ നിയമനടപടി സ്വീകരിച്ചിരുന്നു. ഇൻഡിഗോ ഡൽഹി ഹൈക്കോടതിയിൽ നൽകിയ പരാതിയെ തുടർന്നാണ് പേരുമാറ്റം. സാങ്കേതിക ആവശ്യങ്ങളുമായി ബന്ധപ്പെട്ട വിഭാഗങ്ങളിലാണ് ഇൻഡിഗോ 6e എന്ന പേരിന് പകർപ്പാവകാശം നേടിയത്. ക്ലാസ് 9, ക്ലാസ് 35, 39 എന്നീ വിഭാഗങ്ങളിലാണ് ഇൻഡിഗോ പകർപ്പാവകാശം നേടിയിരിക്കുന്നത്. അതേസമയം മോട്ടോർ വാഹനങ്ങളും അനുബന്ധ ഉപകരണങ്ങളും ഉൾക്കൊള്ളുന്ന ക്ലാസ് 12 വിഭാഗത്തിലാണ് മഹീന്ദ്ര BE 6e രജിസ്റ്റർ ചെയ്‌തിരിക്കുന്നത്.