ಸಾಮಾಜಿಕ ಜಾಲತಾಣ 'ಎಕ್ಸ್‌'ನಲ್ಲಿ ಹೊಸ ಬದಲಾವಣೆ: ಇನ್ಮುಂದೆ ಈ ವಿಷ್ಯ ಮತ್ತೊಬ್ಬರಿಗೆ ತಿಳಿಯದು! - X Starts Hiding This

ಸಾಮಾಜಿಕ ಜಾಲತಾಣದಲ್ಲಿ ಸಾರ್ವಜನಿಕವಾಗಿ ಯಾರು, ಯಾವ ಪೋಸ್ಟ್​​ಗೆ ಲೈಕ್​ ಮಾಡಿದರೆಂಬುದು ಇನ್ನು ಮುಂದೆ ತಿಳಿಯುವುದಿಲ್ಲ. ಹೀಗಾಗಿ, ಬಳಕೆದಾರರು ಮುಕ್ತವಾಗಿ ತಮ್ಮಿಷ್ಟದ ಪೋಸ್ಟ್​​ಗೆ ಲೈಕ್​ ಬಟನ್​ ಒತ್ತಬಹುದು.

ನ್ಯೂಯಾರ್ಕ್​: ಸಾಮಾಜಿಕ ಜಾಲತಾಣಗಳ ಪೋಸ್ಟ್​​ಗಳಿಗೆ ಬೀಳುವ 'ಲೈಕ್'​ಗಳು ಅದರ ಮೆಚ್ಚುಗೆಯ ಪ್ರತೀಕವಾಗಿದ್ದರೂ, ಕೆಲವೊಮ್ಮೆ ಇದು ಬಳಕೆದಾರರ ಖಾಸಗಿತನಕ್ಕೆ ಧಕ್ಕೆ ಉಂಟುಮಾಡುತ್ತದೆ. ಈ ಹಿನ್ನೆಲೆಯಲ್ಲಿ ಇದೀಗ ಮೈಕ್ರೋ ಬ್ಲಾಗಿಂಗ್​ ತಾಣ 'ಎಕ್ಸ್'ನಲ್ಲಿ ಲೈಕ್​ ಹೈಡ್​ ಮಾಡಲಾಗಿದೆ. ಇದಾದ ಕೆಲವೇ ಗಂಟೆಗಳ ಬಳಿಕ 'ಎಕ್ಸ್' ಉತ್ತಮ ಫಲಿತಾಂಶ ಕಂಡಿದೆ. ವಿಶ್ವಾದ್ಯಂತ ಲಕ್ಷಗಟ್ಟಲೆ ಬಳಕೆದಾರರು ಲೈಕ್ ಬಟನ್​ ಅನ್ನು ಹೆಚ್ಚೆಚ್ಚು ಬಳಸಲು ಮುಂದಾಗುತ್ತಿದ್ದಾರೆ. ಇದರಿಂದ ಲೈಕ್‌ಗಳ​ ಸಂಖ್ಯೆ​ ಹೆಚ್ಚಾಗಿದೆ ಎಂದು ಕಂಪನಿಯ​ ಸಿಇಒ ಎಲೋನ್​ ಮಸ್ಕ್​ ತಿಳಿಸಿದ್ದಾರೆ.

ಬಳಕೆದಾರರ ಖಾಸಗಿತನವನ್ನು ರಕ್ಷಿಸುವ ಉದ್ದೇಶದಿಂದ 'ಲೈಕ್'​ ಮರೆಮಾಚಲಾಗಿದೆ. ಇದೀಗ ಬಳಕೆದಾರರು ಮಾತ್ರ ತಾವು ಲೈಕ್​ ಮಾಡಿದ ಪೋಸ್ಟ್​ ನೋಡಬಹುದು. ಆದರೆ, ಇತರರು ನೋಡಲು ಸಾಧ್ಯವಿಲ್ಲ. ಬಳಕೆದಾರರ ಪ್ರೊಫೈಲ್​ ಪೇಜ್​ನಲ್ಲಿ ಮಾತ್ರ ಲೈಕ್​ ಟ್ಯಾಬ್ ಕಾಣಿಸುತ್ತದೆ.

ಮಸ್ಕ್​ ಅವರ ಈ ಹೊಸ ನಿಯಮ ಬುಧವಾರದಿಂದ ಜಾರಿಯಾಗಿದ್ದು, ಕೆಲವೇ ಗಂಟೆಗಳಲ್ಲಿ ಲೈಕ್ ಬಳಕೆಯಲ್ಲಿ ಭಾರೀ ಏರಿಕೆ ಕಂಡಿದೆ ಎಂದು ಮಸ್ಕ್​ ತಮ್ಮ ಹೊಸ ಪೋಸ್ಟ್​ನಲ್ಲಿ ತಿಳಿಸಿದ್ದಾರೆ. ಸಾರ್ವಜನಿಕವಾಗಿ ಯಾರು, ಯಾವ ಪೋಸ್ಟ್​​ಗೆ ಲೈಕ್​ ಮಾಡಿದರು ಎಂದು ತಿಳಿಯದ ಹಿನ್ನೆಲೆಯಲ್ಲಿ ಬಳಕೆದಾರರು ಮುಕ್ತವಾಗಿ ತಮ್ಮಿಷ್ಟದ ಪೋಸ್ಟ್​​ಗೆ ಲೈಕ್​ ಬಟನ್​ ಒತ್ತುತ್ತಿದ್ದಾರೆ.

'ಎಕ್ಸ್'​ನಲ್ಲಿ ಲೈಕ್​ ಮಾಡಿದಲ್ಲಿ, ಅದನ್ನು ನೀವು ಮತ್ತು ಲೇಖಕರೆಂದರೆ ಪೋಸ್ಟ್​ ಮಾಡಿದವರು ಮಾತ್ರ ಕಾಣಬಹುದಾಗಿದೆ. ಇದರಿಂದ ಬಳಕೆದಾರರು ಇತರರಿಂದ ಟ್ರೋಲ್​ಗೆ ಗುರಿಯಾಗುವುದು ಅಥವಾ ಖಾಸಗಿತನದ ಧಕ್ಕೆ ಉಂಟಾಗುವುದನ್ನು ತಡೆಯಬಹುದು ಎಂದು ಸಂಸ್ಥೆ ತಿಳಿಸಿದೆ.

ಸಂಸ್ಥೆಯ ಇಂಜಿನಿಯರಿಂಗ್​ ತಂಡದ ಪ್ರಕಾರ, ಲೈಕ್​ ಕೌಂಟ್​​ ಮತ್ತು ಇತರೆ ಅಂಕಿಅಂಶವನ್ನು​ ಬಳಕೆದಾರರು ತಮ್ಮದೇ ಪೋಸ್ಟ್​​ ಅಡಿಯಲ್ಲಿನ ನೋಟಿಫಿಕೇಶನ್​ ಕೆಳಗೆ ಕಾಣಬಹುದು. ಲೈಕ್​ ಕಾಣದಂತೆ ಮಾಡುವ ಆಯ್ಕೆ ಈ ಹಿಂದೆ ಹಣಪಾವತಿ ಮಾಡುವ ಪ್ರೀಮಿಯಂ ಚಂದಾದಾರರಿಗೆ ಮಾತ್ರ ಲಭ್ಯ ಇತ್ತು.

2022ರಲ್ಲಿ 'ಎಕ್ಸ್‌' ಮೈಕ್ರೋಬ್ಲಾಗಿಂಗ್​ ತಾಣ ಖರೀದಿಸಿದಾಗಿನಿಂದ ಎಲೋನ್​ ಮಸ್ಕ್​ ಅನೇಕ ಬದಲಾವಣೆಗಳನ್ನು ಮಾಡಿದ್ದಾರೆ. ಸಾಮಾಜಿಕ ಜಾಲತಾಣದ ಹೆಸರು, ಲೋಗೋ, ಬ್ಲೂ ಟಿಕ್​ ಸೇರಿದಂತೆ ಅನೇಕ ಮಾರ್ಪಾಡುಗಳಾಗಿವೆ.(ಐಎಎನ್​ಎಸ್​)

ಇದನ್ನೂ ಓದಿ: ಟ್ವಿಟರ್​ನಿಂದ ಸಂಪೂರ್ಣ ಹೊರಬಂದ X​​​​; ಡೊಮೈನ್​​ ಒಡೆತನ ಸಾಧಿಸಿದ ಮಸ್ಕ್