ಬಿಜೆಪಿ ವಿರುದ್ಧ ಲೋಕಲ್ ಅಸ್ತ್ರ ಎನ್ನುವುದಕ್ಕಿಂತ ಇದು ನಮ್ಮ ಸ್ವಾಭಿಮಾನದ ಪ್ರಶ್ನೆ: ಲಕ್ಷ್ಮೀ ಹೆಬ್ಬಾಳ್ಕರ್​​ - Lakshmi Hebbalkar Campaigning

ನಮ್ಮ ಮಕ್ಕಳು ವಿದೇಶದಲ್ಲೆ ಇರಬಹುದಾಗಿತ್ತು. ಇಲ್ಲವೇ ಆರು ತಿಂಗಳಿಗೊಮ್ಮೆ ವಿದೇಶಕ್ಕೆ ಪ್ರವಾಸಕ್ಕೆ ಹೋಗಬಹುದಿತ್ತು. ಆದರೆ, ಅದೆಲ್ಲವನ್ನು ತ್ಯಾಗ ಮಾಡಿ ನಮ್ಮಂತೆ ರಾಜಕಾರಣಕ್ಕೆ ಬಂದಿದ್ದಾರೆ ಎಂದು ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ತಿಳಿಸಿದರು.

ಬೆಳಗಾವಿ: ಮನೆ ಮಗನಿಗೆ ಮತ ನೀಡಿ ಎಂದು ಕೇಳುತ್ತಿದ್ದೇವೆ‌.‌ ಬೆಳಗಾವಿ ಮಕ್ಕಳ ಕೈ ಬಲಪಡಿಸಿ ಅಂತಾ ಎಲ್ಲ ಕಡೆ ಹೇಳುತ್ತಿದ್ದೇವೆ ಎಂದು ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ತಿಳಿಸಿದರು.

ನಗರದಲ್ಲಿ ಮಾಧ್ಯಮಗಳ ಮಾತನಾಡಿದ ಅವರು, ಬೆಳಗಾವಿಯಲ್ಲಿ ಮೃಣಾಲ್ ಹೆಬ್ಬಾಳ್ಕರ್, ಚಿಕ್ಕೋಡಿಯಲ್ಲಿ ಪ್ರಿಯಾಂಕಾ ಜಾರಕಿಹೊಳಿ ಜಯಭೇರಿ ಬಾರಿಸಲು ಆಶೀರ್ವಾದ ಮಾಡುವಂತೆ ಕೇಳಿಕೊಳ್ಳುತ್ತಿದ್ದೇವೆ. ಬಿಜೆಪಿ ವಿರುದ್ಧ ಲೋಕಲ್ ಅಸ್ತ್ರ ಎನ್ನುವುದಕ್ಕಿಂತ ಇದು ನಮ್ಮ ಸ್ವಾಭಿಮಾನದ ಪ್ರಶ್ನೆ. ನಮ್ಮ ನೆಲ, ಜಲ ಹೋರಾಟ ಮಾಡಬೇಕಾಗುತ್ತದೆ. ಅಭಿವೃದ್ಧಿ ಪರ ಚಿಂತನೆ ಬೇಕಾಗುತ್ತದೆ. ಬೆಳಗಾವಿಗೆ ಕೊಟ್ಟಂತ ಕೊಡುಗೆ ಬಗ್ಗೆ ಕೇಳುತ್ತಿದ್ದೇವೆ ಎಂದರು.

ತಮ್ಮ ಭವಿಷ್ಯ ತ್ಯಾಗ ಮಾಡಿ ಮಕ್ಕಳು ಚುನಾವಣೆಗೆ ನಿಂತಿದ್ದಾರೆ ಎಂಬ ಸತೀಶ ಜಾರಕಿಹೊಳಿ ಮಾತಿಗೆ, ಇದು ನೂರಕ್ಕೆ ನೂರು ಸತ್ಯ. ಈ ವೃತ್ತಿ ನಮಗೂ ಕೂಡ ಬಹಳ ಕಷ್ಟವಾಗುತ್ತದೆ. ಮಳೆ - ಚಳಿ ಇರಲಿ. ಮನೆಯಲ್ಲಿ ಸುಖ - ದುಃಖದ ಸಂದರ್ಭವೇ ಇರಲಿ. ನಮ್ಮ ವೃತ್ತಿ ಪಾಲನೆ ಮಾಡಬೇಕು. ಎಲ್ಲರಿಗೂ ರಾಜಕಾರಣ ಎಂದರೆ ಸುಲಿದ ಬಾಳೆ ಹಣ್ಣು ಎಂದು ತಿಳಿದುಕೊಂಡಿದ್ದಾರೆ. ಆದರೆ, ನಮ್ಮ ಕಷ್ಟ ನಮಗೆ ಗೊತ್ತು. ನನಗೆ ಒಬ್ಬನೆ ಮಗ, ಸತೀಶ ಅಣ್ಣನವರು ಅವರ ಮಗಳನ್ನು ಒಳ್ಳೆಯ ಹುಡುಗನಿಗೆ ಮದುವೆ ಮಾಡಿಕೊಟ್ಟು, ನೆಮ್ಮದಿಯಿಂದ ಇರುವಂತೆ ಮಾಡಬಹುದಿತ್ತು. ಹಗಲು ರಾತ್ರಿ ಎನ್ನದೇ ಜನರ ಕಷ್ಟ ಕಾರ್ಪಣ್ಯಗಳನ್ನು ಕೇಳಬೇಕಾಗುತ್ತದೆ. ಇನ್ನು ನಮ್ಮ ಮಕ್ಕಳು ವಿದೇಶದಲ್ಲೇ ಇರಬಹುದಾಗಿತ್ತು. ಇಲ್ಲವೇ ಆರು ತಿಂಗಳಿಗೊಮ್ಮೆ ವಿದೇಶಕ್ಕೆ ಪ್ರವಾಸಕ್ಕೆ ಹೋಗಬಹುದಿತ್ತು. ಆದರೆ, ಅದೆಲ್ಲವನ್ನು ತ್ಯಾಗ ಮಾಡಿ ನಮ್ಮಂತೆ ರಾಜಕಾರಣಕ್ಕೆ ಬಂದಿದ್ದಾರೆ ಎಂದರು.

ಲಕ್ಷ್ಮೀ ಹೆಬ್ಬಾಳ್ಕರ್ ಪಂಚಮಸಾಲಿನೇ ಅಲ್ಲ ಎಂಬ ಮಾಜಿ ಸಚಿವ ನಿರಾಣಿ ಹೇಳಿಕೆಗೆ ನನ್ನ ಮೈಯಲ್ಲಿ ರಾಣಿ ಚನ್ನಮ್ಮನ ರಕ್ತ ಹರಿಯುತ್ತಿದೆ. ನನ್ನ ಮಗನ ದೆಹದಲ್ಲಿ ಪಂಚಮಸಾಲಿ ರಕ್ತವಿದೆ. ಬಸವಣ್ಣನವರ ತತ್ವದಲ್ಲಿ ನಡೆಯುತ್ತಿದ್ದೇವೆ. ಬಾಬಾಸಾಹೇಬ ಅಂಬೇಡ್ಕರ್ ಅವರ ಸಂವಿಧಾನ ಒಪ್ಪಿಕೊಂಡವರು. ನನ್ನ ಬಗ್ಗೆ ಈ ರೀತಿ ಮಾತಾಡುವವರ ಬುದ್ಧಿ ಭ್ರಮಣೆಯಾಗಿದೆ. ಪಂಚಮಸಾಲಿ ಹೋರಾಟದಲ್ಲಿ ನಾನು ಮತ್ತು ನನ್ನ ತಮ್ಮ ಮತ್ತು ಮಗ ಮುಂಚೂಣಿಯಲ್ಲಿದ್ದು ಹೋರಾಟ ಮಾಡಿದ್ದು ನಿರಾಣಿ ಅವರಿಗೆ ಗೊತ್ತಿಲ್ಲವೇ..? ಹಾಗಾಗಿ, ನಿರಾಣಿ ಅಣ್ಣನವರಿಗೆ ಯಾಕೋ ನಿರಾಸೆಯಾಗುತ್ತಿದೆ ಎಂದು ವ್ಯಂಗ್ಯವಾಡಿದರು.

ಸಣ್ಣ ವಯಸ್ಸಿನ ಅಭ್ಯರ್ಥಿ ಅಂತಾ ಬಿಜೆಪಿ ಟೀಕೆ ವಿಚಾರಕ್ಕೆ ಪ್ರತಿಕ್ರಿಯಿಸಿ, 16ನೇ ವಯಸ್ಸಿನಲ್ಲಿ ಗಡಿ ಕಾಯಲು ಯುವಕರು ಸಂದರ್ಶನ ಕೊಡ್ತಾರೆ. ಈ ದೇಶ ಕಾಯಲು ಸುಭದ್ರತೆ ಕೊಡಲು ಸೈನಿಕರನ್ನು ತೆಗೆದುಕೊಳ್ಳುತ್ತೇವೆ. 18 ವಯಸ್ಸಿಗೆ ಮತದಾನದ ಹಕ್ಕು ಸಿಗುತ್ತದೆ. 29ನೇ ವರ್ಷಕ್ಕೆ ಯಾರಾದರೂ ಚಿಕ್ಕವನು ಎಂದರೆ ನಗ್ತಾರೆ. ಜನ ಬಹಳಷ್ಟು ಬುದ್ದಿವಂತರಿದ್ದು ಉತ್ತರ ಕೊಡ್ತಾರೆ. ಮುಂಬರುವ ದಿನಗಳಲ್ಲಿ ಹೊರಗಿನವರ ಎಫೆಕ್ಟ್ ಕಾಡುತ್ತದೆ. ಇದನ್ನ ನಾವು ಹೇಳ್ತಿಲ್ಲ ಅವರ ಪಕ್ಷದವರೇ ವಿರೋಧ ಮಾಡ್ತಿದ್ದಾರೆ ಎಂದು ತಿರುಗೇಟು ಕೊಟ್ಟರು.

ಮತ್ತೊಂದೆಡೆ ಮಾತನಾಡಿದ ಜಿಲ್ಲಾ ಉಸ್ತುವಾರಿ ಸಚಿವ ಸತೀಶ್ ಜಾರಕಿಹೊಳಿ‌, ಜನರ ನಾಡಿ ಮಿಡಿತ ತಿಳಿಯಲು ಇನ್ನೂ ಸಮಯ ತೆಗೆದುಕೊಳ್ಳುತ್ತದೆ. ಈ ಬಾರಿ ಗೆಲ್ಲಲು ವಾತಾವರಣ ಅನುಕೂಲಕರವಾಗಿದ್ದು, ಪಕ್ಷದ ಒತ್ತಡದಿಂದ ಮಕ್ಕಳನ್ನು ಚುನಾವಣೆಗೆ ನಿಲ್ಲಿಸುವ ಅನಿವಾರ್ಯತೆ ಸೃಷ್ಟಿಯಾಯಿತು ಎಂದು ತಿಳಿಸಿದರು.

ಬಿಜೆಪಿಯವರು ತಮ್ಮ ಮನೆಗೆ ತಾವೇ ಬೆಂಕಿ ಹಚ್ಚಿಕೊಳ್ಳುತ್ತಿದ್ದಾರೆ ಎಂಬ ತಮ್ಮ ಹೇಳಿಕೆ ಕುರಿತ ಪ್ರಶ್ನೆಗೆ, ಬಿಜೆಪಿಯವರೇ ಗೋ ಬ್ಯಾಕ್ ಅಂತಿದ್ದಾರೆ. ಅಷ್ಟರಲ್ಲಿ ನಾವು ಚುನಾವಣೆ ಮುಗಿಸುತ್ತೇವೆ. ಶೆಟ್ಟರ್ ಅವರು ಇಲ್ಲಿಗೆ ಬಂದಾಗ ಗೌರವದಿಂದ ನೋಡಿಕೊಂಡೆವು. ಅದು ಅವರ ಸ್ವತಂತ್ರ ನಿರ್ಧಾರ ಮೋಸ ಮಾಡಿದ್ರೂ ಎನ್ನಲು ಆಗುವುದಿಲ್ಲ. ಈಗ ಅಲ್ಲಿಗೆ ಹೋಗಿದ್ದಾರೆ ಅವರಿಗೆ ಬಿಟ್ಟಿದ್ದು ಎಂದರು.

ಲಕ್ಷ್ಮಣ ಸವದಿಗೆ ಚುನಾವಣೆ ಜವಾಬ್ದಾರಿ ನೀಡದಿರುವ ವಿಚಾರಕ್ಕೆ ಪ್ರತಿಕ್ರಿಯಿಸಿ, ಜವಾಬ್ದಾರಿ ಕೊಡುವ ಪ್ರಶ್ನೆ ಬರುವುದಿಲ್ಲ. ನಾವೇ ಹೋಗಿ ಮಾಡಬೇಕು. ನಾವು ಇಲ್ಲಿ ಬರ್ತೇವಿ, ಅಲ್ಲಿ ಹೋಗುತ್ತೇವೆ. ನಮ್ಮ ಜವಾಬ್ದಾರಿ ಕೂಡ ಇದೆ. ಎಲ್ಲಾ ಕಡೆ ಹೋಗ್ತಿದ್ದೇವೆ. ಇನ್ನೂ ಚುನಾವಣಾ ಉಸ್ತುವಾರಿ ಹಂಚಿಕೆ ಮಾಡಿಲ್ಲ ಎಂದರು. ಚಿಕ್ಕೋಡಿ ಕಾಂಗ್ರೆಸ್ ಕಚೇರಿಯಲ್ಲಿ ಸವದಿ ಭಾವಚಿತ್ರ ಹಾಕದಿರುವುದಕ್ಕೆ ಪ್ರತಿಕ್ರಿಯಿಸಿ, ಇದನ್ನು ಸ್ಥಳೀಯ ನಾಯಕರು ಮಾಡಬೇಕು. ಈ ವಿಷಯವನ್ನು ಚಿಕ್ಕೋಡಿ ಅಧ್ಯಕ್ಷರ ಗಮನಕ್ಕೆ ತರ್ತೇವಿ ಎಂದರು.

ಲೋಕಸಭೆಯಲ್ಲಿ ಹೆಚ್ಚಿನ ಸ್ಥಾನ ಗೆದ್ದರೆ ಡಿಕೆಶಿ ಮುಖ್ಯಮಂತ್ರಿ ಆಸೆ ವ್ಯಕ್ತಪಡಿಸಿರುವ ಬಗ್ಗೆ ಮಾಧ್ಯಮಗಳು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಸತೀಶ ಜಾರಕಿಹೊಳಿ, ಈಗ ಆ ವಿಷಯ ಉದ್ಭವ ಆಗುವುದಿಲ್ಲ. ಹೆಚ್ಚಿನ ಸ್ಥಾನ ಗೆಲ್ಲುವುದಷ್ಟೆ ನಮ್ಮ ಉದ್ದೇಶ. ಮುಖ್ಯಮಂತ್ರಿ ಆಗ್ತಾರೆ ಬಿಡ್ತಾರೆ ಅದು ಮುಂದೆ ಶಾಸಕರು, ಹೈಕಮಾಂಡ್ ತೀರ್ಮಾನ ಮಾಡುತ್ತದೆ. ಆ ವಿಷಯ ಬೇರೆ, ಇದಕ್ಕೂ ಅದಕ್ಕೂ ಸಂಬಂಧ ಇಲ್ಲ ಎಂದರು. ಶಂಭು ಕಲ್ಲೋಳ್ಕರ್, ಮಾಜಿ ಶಾಸಕ ರಮೇಶ ಕುಡಚಿ ಅಸಮಾಧಾನ ವಿಚಾರಕ್ಕೂ ಇದೇ ವೇಳೆ ಪ್ರತಿಕ್ರಿಯಿಸಿದರು.

ಇದನ್ನೂ ಓದಿ:ಮೃಣಾಲ್, ಪ್ರಿಯಾಂಕಾ ಎಂಪಿ‌ ಆಗುವುದರಲ್ಲಿ ಸಂಶಯವೇ ಇಲ್ಲ: ಸಚಿವ ಸತೀಶ್​ ಜಾರಕಿಹೊಳಿ‌ - Lokashaba Election