ದಾವಣಗೆರೆ: ಮಾಜಿ ಸಿಎಂ ಹೆಚ್.ಡಿ.ಕುಮಾರಸ್ವಾಮಿ ಅವರು ನನ್ನ ಸಹಕಾರ ಕೋರಿದ್ದರು. ಆದರೆ ಪ್ರಚಾರಕ್ಕೆ ಇಂತಹ ದಿನ, ಸ್ಥಳ ಹಾಗೂ ಸಮಯಕ್ಕೆ ಬನ್ನಿ ಎಂದು ಯಾರು ಸಮನ್ವಯತೆ ಮಾಡಿಲ್ಲ ಎಂದಷ್ಟೇ ಹೇಳಿದ್ದೇನೆ. ನನ್ನ ಬೆಂಬಲಿಗರು ಹಾಗೂ ಬಿಜೆಪಿ ಕಾರ್ಯಕರ್ತರು ಕುಮಾರಸ್ವಾಮಿಯವರ ಪರ ಕೆಲಸ ಮಾಡಿದ್ದಾರೆ, ಮಂಡ್ಯದಲ್ಲಿ ಅವರು ಖಂಡಿತ ಗೆಲ್ಲುತ್ತಾರೆ ಎಂದು ಸಂಸದೆ ಸುಮಲತಾ ಅಂಬರೀಶ್ ವಿಶ್ವಾಸ ವ್ಯಕ್ತಪಡಿಸಿದರು.
ನಗರದಲ್ಲಿಂದು ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಅಂಬರೀಶ್ ಅವರು ಪಕ್ಷಾತೀತ ವ್ಯಕ್ತಿ, ಅವರಿಗೆ ಎಲ್ಲರ ನಂಟು ಇತ್ತು. ಎಲ್ಲಾ ಪಕ್ಷದವರು ಅವರಿಗೆ ಸ್ನೇಹಿತರಾಗಿದ್ದರು. ಅವರಿಗೆ ಯಾರು ಶತ್ರುಗಳಿರಲಿಲ್ಲ. ಪ್ರಸ್ತುತ ನಮ್ಮ ಗುರಿ ಲೋಕಸಭಾ ಚುನಾವಣೆ. ಎಷ್ಟು ಸ್ಥಾನಗಳನ್ನು ಶ್ರಮವಹಿಸಿ ಗೆಲ್ಲಿಸಬೇಕು, ನರೇಂದ್ರ ಮೋದಿಯವರನ್ನು ಮತ್ತೆ ಪ್ರಧಾನಿಯಾಗಿ ನೋಡಬೇಕು. ಇದೇ ನಮ್ಮ ಗುರಿ ಎಂದರು. ಬಿಜೆಪಿಯಲ್ಲಿ ನಿಮಗೆ ಸ್ಥಾನಮಾನ ಸಿಗುತ್ತದೆಯೇ ಎಂಬ ಪ್ರಶ್ನೆಗೆ ಪ್ರತಿಕ್ರಿಯಿಸಿ, ಸುಮಲತಾಗೆ ಸ್ಥಾನಮಾನ ಜನರಲ್ಲಿ ಯಾವತ್ತೂ ಇದೆ. ರಾಜಕೀಯ ಬೇರೆ, ಜನರಲ್ಲಿ ಜನಪ್ರಿಯತೆ ಬೇರೆ. ಹೀಗಾಗಿ ನಾನು ಬೇರೆ ಯಾವುದರ ಬಗ್ಗೆ ತಲೆಕೆಡಿಸಿಕೊಳ್ಳುವುದಿಲ್ಲ ಎಂದು ಹೇಳಿದರು.