ಮಹಿಳಾ ಟಿ20 ವಿಶ್ವಕಪ್: ಆಸೀಸ್​ ವಿರುದ್ಧ ಭಾರತಕ್ಕೆ ಸೋಲು; ಕಿವೀಸ್​ ಜೊತೆ ಪಾಕ್​ ಗೆದ್ದರೆ ಸೆಮೀಸ್​ಗೆ​ ಲಗ್ಗೆ?

ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಆಸ್ಟ್ರೇಲಿಯಾ ವಿರುದ್ದ ಭಾರತದ ವನಿತೆಯರ ತಂಡ ಪರಾಭವಗೊಂಡಿದೆ. ಇದರಿಂದಾಗಿ ನ್ಯೂಜಿಲೆಂಡ್ ಹಾಗೂ ಪಾಕಿಸ್ತಾನದ ನಡುವಿನ ಇಂದಿನ ಪಂದ್ಯದ ಪ್ರಾಮುಖ್ಯತೆ ಪಡೆದಿದೆ. ಭಾರತದ ಸೆಮೀಸ್​ ಲೆಕ್ಕಾಚಾರದ ಮಾಹಿತಿ ಇಲ್ಲಿದೆ.

ಶಾರ್ಜಾ: ಮಹಿಳಾ ಟಿ20 ವಿಶ್ವಕಪ್​ ಟೂರ್ನಿಯ ಮಹತ್ವದ ಪಂದ್ಯದಲ್ಲಿ ನಾಯಕಿ ಹರ್ಮನ್​ಪ್ರೀತ್​ ಕೌರ್​ ಏಕಾಂಗಿ ಹೋರಾಟದ ನಡುವೆಯೂ ಕೂಡ ಆಸ್ಟ್ರೇಲಿಯಾದ ಬಿಗುವಿನ ಬೌಲಿಂಗ್​ ದಾಳಿಗೆ ಸಿಲುಕಿದ ಭಾರತ ತಂಡ 9 ರನ್​ಗಳ ಸೋಲು ಕಂಡಿದೆ. ಇದರೊಂದಿಗೆ ಭಾರತದ ವನಿತೆಯರ ಸೆಮಿಫೈನಲ್​ ಹಾದಿ ಇತರ ತಂಡಗಳ ಫಲಿತಾಂಶದ ಮೇಲೆ ಅವಲಂಬಿತವಾಗಿದೆ.

ಶಾರ್ಜಾ ಕ್ರಿಕೆಟ್ ಮೈದಾನದಲ್ಲಿ ಭಾನುವಾರ ನಡೆದ ಪಂದ್ಯ ಭಾರತ ತಂಡವು ಸೆಮಿಫೈನಲ್​ ತಲುಪಲು ಮಹತ್ವಪೂರ್ಣವಾಗಿತ್ತು. ಆದರೆ ಗೆಲ್ಲುವಲ್ಲಿ ಹರ್ಮನ್​ ಪಡೆ ವಿಫಲವಾಯಿತು. 152 ರನ್​ ಗುರಿ ಬೆನ್ನಟ್ಟಿದ ಟೀಂ ಇಂಡಿಯಾಕ್ಕೆ ಉತ್ತಮ ಆರಂಭ ಸಿಗಲಿಲ್ಲ. 26 ರನ್​ ಆಗುವಷ್ಟರಲ್ಲಿ 20 ರನ್​ಗಳೊಂದಿಗೆ ವೇಗದ ಆಟವಾಡುತ್ತಿದ್ದ ಶಫಾಲಿ ವರ್ಮಾ ಔಟಾದರು. ಆ ಬಳಿಕ 6 ರನ್​ ಗಳಿಸಿದ್ದ ಸ್ಮೃತಿ ಮಂಧಾನ ಹಾಗೂ ಜೆಮಿಮಾ ರೋಡ್ರಿಗಸ್​ (16) ಕೂಡ ವಿಕೆಟ್​ ಒಪ್ಪಿಸಿದರು. ಇದರೊಂದಿಗೆ ತಂಡ 47 ರನ್​ಗೆ 3 ವಿಕೆಟ್​ ಕಳೆದುಕೊಂಡಿತ್ತು.

ಹರ್ಮನ್​-ದೀಪ್ತಿ ಜೊತೆಯಾಟ:ಈ ವೇಳೆ ಒಂದಾದ ನಾಯಕಿ ಹರ್ಮನ್​ಪ್ರೀತ್​ ಕೌರ್ ಹಾಗೂ ದೀಪ್ತಿ ಶರ್ಮಾ ಸಮಯೋಚಿತ ಬ್ಯಾಟಿಂಗ್​ ನಡೆಸಿದರು. ಆದರೆ, ರನ್​ ವೇಗವನ್ನು ಹೆಚ್ಚಿಸುವಲ್ಲಿ ವಿಫಲರಾಗಿದ್ದು, ಗೆಲುವಿಗೆ ಹಿನ್ನಡೆಯಾಗಿ ಪರಿಣಮಿಸಿತು. ದೀಪ್ತಿ 25 ಬಾಲ್​ಗೆ 29 ರನ್​ ಗಳಿಸಿ ಔಟಾದರು. ಬಳಿಕ ಬಂದ ರಿಚಾ ಘೋಷ್ 1 ರನ್​ಗೆ​ ರನೌಟ್​ ಆಗುವ ಮೂಲಕ ತಂಡ ಒತ್ತಡಕ್ಕೆ ಸಿಲುಕಿತು. ಇನ್ನೊಂದೆಡೆ, ಹರ್ಮನ್​ ಅಜೇಯ ಅರ್ಧಶತಕ ಬಾರಿಸಿದರೂ ಕೂಡ ತಂಡವನ್ನು ಗೆಲುವಿನ ದಡ ಸೇರಿಸುವಲ್ಲಿ ಸಾಧ್ಯವಾಗಲಿಲ್ಲ.

ಕೊನೆಯ ಓವರ್​ನಲ್ಲಿ 4 ವಿಕೆಟ್​ ಪತನ:ಅಂತಿಮ ಓವರ್​ನಲ್ಲಿ ಭಾರತಕ್ಕೆ 14 ರನ್​ ಅಗತ್ಯವಿತ್ತು. ಆದರೆ, 4 ವಿಕೆಟ್ ಉರುಳಿದ್ದು ಸೋಲಿಗೆ ಕಾರಣವಾಯಿತು. ಸದರ್ಲ್ಯಾಂಡ್ ಎಸೆದ ಮೊದಲ ಬಾಲ್​ನಲ್ಲಿ ಹರ್ಮನ್​ ಒಂದು ರನ್​ ಪಡೆದರು. ಬಳಿಕ ಎರಡನೇ ಎಸೆತದಲ್ಲಿ ಪೂಜಾ ವಸ್ತ್ರೇಕರ್​(9) ಬೌಲ್ಡ್​ ಆದರು. ಬಳಿಕ ಬಂದ ಅರುಂಧತಿ ರೆಡ್ಡಿ ಹರ್ಮನ್​ಗೆ ಸ್ಟ್ರೈಕ್​ ಬಿಟ್ಟುಕೊಡುವ ಭರದಲ್ಲಿ ರನೌಟ್​ಗೆ ಬಲಿಯಾದರು. ಆ ಬಳಿಕ ಹರ್ಮನ್​ಗೆ ಬ್ಯಾಟಿಂಗ್​ ಸಿಕ್ಕರೂ ಕೂಡ ದೊಡ್ಡ ಹೊಡೆತ ಆಡುವಲ್ಲಿ ವಿಫಲರಾಗಿ ಕೇವಲ ಒಂದು ರನ್​ ಗಳಿಸಿದರು. ಬಳಿಕ 2 ಬಾಲ್​ಗೆ 12 ರನ್​ ಅಗತ್ಯವಿತ್ತು. 5ನೇ ಎಸೆತದಲ್ಲಿ ಶ್ರೇಯಾಂಕ ಪಾಟೀಲ್​ ರನೌಟ್​ ಆಗುವುದರೊಂದಿಗೆ ಭಾರತದ ಗೆಲುವಿನ ಕನಸು ಕಮರಿತು. ಅಂತಿಮ ಬಾಲ್​ಗೆ ರಾಧಾ ಯಾದವ್​ ಕೂಡ ಎಲ್​ಬಿ ಬಲೆಗೆ ಬಿದ್ದಿದ್ದರಿಂದ ಭಾರತ 9 ರನ್​ಗಳ ಸೋಲು ಅನುಭವಿಸಿತು.

ಆಸ್ಟ್ರೇಲಿಯಾ ಬ್ಯಾಟಿಂಗ್​​:ಇದಕ್ಕೂ ಮುನ್ನ ಟಾಸ್​ ಗೆದ್ದ ಆಸ್ಟ್ರೇಲಿಯಾ ಮೊದಲು ಬ್ಯಾಟಿಂಗ್​ ನಡೆಸಿ, 20 ಓವರ್​ಗಳಲ್ಲಿ 8 ವಿಕೆಟ್​ ನಷ್ಟಕ್ಕೆ 151 ರನ್​ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು. ಆರಂಭಿಕ ಆಟಗಾರ್ತಿ ಗ್ರೇಸ್ ಹ್ಯಾರಿಸ್ ತಂಡದ ಪರ ಸರ್ವಾಧಿಕ 40 ರನ್​ ಗಳಿಸಿ ನೆರವಾದರು. ಬೆತ್ ಮೂನಿ(2) ಹಾಗೂ ಜಾರ್ಜಿಯಾ ವೇರ್‌ಹ್ಯಾಮ್(0) ಹೆಚ್ಚು ಹೊತ್ತು ಕ್ರೀಸ್​ನಲ್ಲಿ ನಿಲ್ಲದೇ ನಿರಾಸೆ ಅನುಭವಿಸಿದರು. ಬಳಿಕ, ಎಲ್ಲಿಸ್ ಪೆರ್ರಿ (32) ಹಾಗೂ ನಾಯಕಿ ತಹ್ಲಿಯಾ ಮೆಕ್‌ಗ್ರಾತ್(32) ಆಕ್ರಮಣಕಾರಿ ಆಟದ ಮೂಲಕ ತಂಡದ ಮೊತ್ತವನ್ನು ಹಿಗ್ಗಿಸಿದರು.

ಕೊನೆಯ ಹಂತದಲ್ಲಿ ಫೋಬೆ ಲಿಚ್‌ಫೀಲ್ಡ್ 9 ಬಾಲ್​ಗೆ 15 ಹಾಗೂ ಅನ್ನಾಬೆಲ್ ಸದರ್ಲ್ಯಾಂಡ್ 6 ಎಸೆತಗಳಲ್ಲಿ 10 ರನ್​ ಬಾರಿಸುವ ಮೂಲಕ ತಂಡವನ್ನು 150ರ ಗಡಿಗೆ ಕೊಂಡೊಯ್ದರು. ಭಾರತದ ಪರ ರೇಣುಕಾ ಸಿಂಗ್​ ಹಾಗೂ ದೀಪ್ತಿ ಶರ್ಮಾ ತಲಾ 2 ವಿಕೆಟ್​ ಪಡೆದರು.

ಪಾಕ್ ​- ಕಿವೀಸ್​ ಪಂದ್ಯದ ಮೇಲೆ ಭಾರತದ ಸೆಮೀಸ್​ ಹಾದಿ:ಭಾರತ ತಂಡ ಸೆಮಿಫೈನಲ್​ ತಲುಪಬೇಕಾದರೆ ನ್ಯೂಜಿಲೆಂಡ್ ಹಾಗೂ ಪಾಕಿಸ್ತಾನದ ನಡುವಿನ ಇಂದಿನ ಪಂದ್ಯದ ಫಲಿತಾಂಶ ಪ್ರಾಮುಖ್ಯತೆ ಪಡೆದಿದೆ. ಒಂದು ವೇಳೆ ನ್ಯೂಜಿಲೆಂಡ್​ ಗೆಲುವು ಕಂಡರೆ, ಭಾರತ ತಂಡ ಟೂರ್ನಿಯಿಂದಲೇ ಹೊರಬೀಳಲಿದೆ. ಯಾಕೆಂದರೆ ಭಾರತ (+0.322) ಹಾಗೂ ಕಿವೀಸ್ (+0.282)​ ಸದ್ಯ ತಲಾ 4 ಅಂಕ ಹೊಂದಿವೆ. ಇನ್ನೊಂದೆಡೆ, ಎರಡು ಅಂಕ ಹೊಂದಿರುವ ಪಾಕಿಸ್ತಾನಕ್ಕೂ ಕೂಡ ಸೆಮಿಫೈನಲ್​ ಅವಕಾಶವಿದೆ. ಆದರೆ ನ್ಯೂಜಿಲೆಂಡ್​ ವಿರುದ್ಧ ದೊಡ್ಡ ಅಂತರದ ಗೆಲುವು ದಾಖಲಿಸಬೇಕಿದೆ. ಒಂದು ವೇಳೆ ನ್ಯೂಜಿಲೆಂಡ್ ಸೋತು, ಪಾಕ್​ ಅಲ್ಪ ಅಂತರದಲ್ಲಿ ಜಯ ಸಾಧಿಸಿದರೆ ರನ್​ರೇಟ್​ ಆಧಾರದ ಮೇಲೆ ಭಾರತ ತಂಡ ಸೆಮೀಸ್​ ತಲುಪಲಿದೆ.

ಇದನ್ನೂ ಓದಿ:ಕ್ರಿಕೆಟ್​ ಪಂದ್ಯ ರದ್ದಾದರೆ ಟಿಕೆಟ್​ ಹಣ ವಾಪಸ್​ ಪಡೆಯುವುದು ಹೇಗೆ: ಅದಕ್ಕಿರುವ ನಿಯಮಗಳೇನು?