ನಿತಿಶ್​ ರೆಡ್ಡಿ ಸ್ಫೋಟಕ ಆಟಕ್ಕೆ ಬಾಂಗ್ಲಾ ತತ್ತರ​: 2-0 ಅಂತರದಿಂದ ಸರಣಿ ಗೆದ್ದ ಭಾರತ

ಬಾಂಗ್ಲಾದೇಶ ವಿರುದ್ಧ ನಡೆದ 2ನೇ ಟಿ20 ಪಂದ್ಯದಲ್ಲಿ ಭಾರತ 86 ರನ್​ಗಳಿಂದ ಭರ್ಜರಿ ಜಯ ಸಾಧಿಸಿ ಸರಣಿಯನ್ನು 2-0 ಅಂತರದಿಂದ ವಶಪಡಿಸಿಕೊಂಡಿತು.

ನವದೆಹಲಿ:ಯುವ ಕ್ರಿಕೆಟಿಗ ನಿತಿಶ್​ ರೆಡ್ಡಿ ಆಲ್​ರೌಂಡರ್​​ ಆಟ, ರಿಂಕು ಸಿಂಗ್​ರ ಭರ್ಜರಿ ಬ್ಯಾಟಿಂಗ್​ ಎದುರು ಬಾಂಗ್ಲಾದೇಶ ನಿರುತ್ತರವಾಯಿತು. ಇದರಿಂದ 2ನೇ ಟಿ20 ಪಂದ್ಯದಲ್ಲೂ 86 ರನ್​ಗಳಿಂದ ಸೋಲು ಕಂಡಿತು. ಈ ಮೂಲಕ ಭಾರತ ಮೂರು ಪಂದ್ಯಗಳ ಸರಣಿಯನ್ನು ಒಂದು ಪಂದ್ಯ ಬಾಕಿ ಇರುವಂತೆಯೇ 2-0 ಅಂತರದಲ್ಲಿ ಜಯಿಸಿತು.

ದೆಹಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಎರಡನೇ ಟಿ20 ಪಂದ್ಯದಲ್ಲಿ ಭಾರತ ಸಂಪೂರ್ಣ ಪ್ರಾಬಲ್ಯ ಸಾಧಿಸಿತು. ಟಾಸ್​ ಗೆದ್ದರೂ ಭಾರತವನ್ನು ಮೊದಲು ಬ್ಯಾಟಿಂಗ್​ಗೆ ಆಹ್ವಾನಿಸಿದ ಬಾಂಗ್ಲಾ ದುಬಾರಿ ಬೆಲೆ ತೆತ್ತಿತು. ನಿತಿಶ್​​ ರೆಡ್ಡಿ, ರಿಂಕು ಸಿಂಗ್​ ಅರ್ಧಶತಕದ ಬಲದಿಂದ ನಿಗದಿತ 20 ಓವರ್​ಗಳಲ್ಲಿ 9 ವಿಕೆಟ್​ಗೆ 221 ರನ್​ ಗಳಿಸಿತು. ಬೆಟ್ಟದಂತಹ ಸ್ಕೋರ್​ ಕಂಡೇ ಬಾಂಗ್ಲಾ ಬೆದರಿ ನಿಗದಿತ ಓವರ್​ಗಳಲ್ಲಿ 9 ವಿಕೆಟ್​ ಕಳೆದುಕೊಂಡು 135 ರನ್​​ ಗಳಿಸಿ, 86 ರನ್​ಗಳ ಸೋಲುಂಡಿತು.

7 ಬೌಲರ್​ಗಳಿಗೂ ದಕ್ಕಿದ ವಿಕೆಟ್​​:ದೊಡ್ಡ ಸ್ಕೋರ್​ ಬೆನ್ನತ್ತಿದ ಹುಸೈನ್​ ಶ್ಯಾಂಟೊ ಪಡೆ ಆರಂಭಿದಿಂದಲೇ ಎಡವುತ್ತಾ ಸಾಗಿತು. ಯಾವೊಬ್ಬ ಬ್ಯಾಟರ್​ ಕೂಡ ಕ್ರೀಸ್​ನಲ್ಲಿ ನಿಲ್ಲದೇ ಬಂದಷ್ಟೇ ವೇಗವಾಗಿ ಹೊರನಡೆದರು. ಹಿರಿಯ ಆಟಗಾರ ಮಹಮದುಲ್ಲಾ ಮಾತ್ರ 39 ಎಸೆತಗಳಲ್ಲಿ 41 ರನ್​ ಗಳಿಸಿದರು. ನಿಖರ ದಾಳಿ ನಡೆಸಿದ ಭಾರತೀಯ ಬೌಲರ್​ಗಳು ಯಾವುದೇ ಹಂತದಲ್ಲಿ ಬಾಂಗ್ಲಾ ಪುಟಿಯದಂತೆ ನೋಡಿಕೊಂಡರು.

ಭಾರತ ತಂಡದ ನಾಯಕ ಸೂರ್ಯಕುಮಾರ್​​ ಯಾದವ್​ 7 ಜನರಿಂದ ಬೌಲಿಂಗ್​ ಮಾಡಿಸಿದರು. ವಿಶೇಷವೆಂದರೆ, ಬೌಲ್ ಮಾಡಿದ ಅಷ್ಟೂ ಆಟಗಾರರು ಕನಿಷ್ಠ ಒಂದು ವಿಕೆಟ್​​ ಕಿತ್ತರು. ನಿತಿಶ್​​ ರೆಡ್ಡಿ, ವರುಣ್​ ಚಕ್ರವರ್ತಿ ತಲಾ 2 ವಿಕೆಟ್​ ಪಡೆದರು. ಇದು ಬಾಂಗ್ಲಾಕ್ಕೆ ಭಾರಿ ದುಬಾರಿಯಾಯಿತು.

ನಿತಿಶ್​​ ರೆಡ್ಡಿ ಸ್ಫೋಟಕ ಬ್ಯಾಟಿಂಗ್​:ಇದಕ್ಕೂ ಮೊದಲು ಭಾರತ ಬ್ಯಾಟಿಂಗ್​​ನಲ್ಲಿ ಧೂಳೆಬ್ಬಿಸಿತು. ಸಂಜು ಸ್ಯಾಮ್ಸನ್​​, ಅಭಿಷೇಕ್​ ಶರ್ಮಾ, ಸೂರ್ಯಕುಮಾರ್​ ಔಟಾದ ಬಳಿಕ ಬಂದ ನಿತಿಶ್​ ರೆಡ್ಡಿ ಮೈದಾನದ ಮೂಲೆ ಮೂಲೆಯಲ್ಲಿ ಚೆಂಡನ್ನು ಅಟ್ಟಿದರು. ನಿತಿಶ್​ ಕೇವಲ 34 ಎಸೆತಗಳಲ್ಲಿ 74 ರನ್ ಸಿಡಿದರು. ಇದರಲ್ಲಿ 7 ಸಿಕ್ಸರ್​, ಬೌಂಡರಿ ಇದ್ದವು. ವೃತ್ತಿಜೀವನದ ಮೊದಲ ಅರ್ಧಶತಕ ಸಂಭ್ರಮವನ್ನೂ ಆಚರಿಸಿದರು. ಇನ್ನೊಂದೆಡೆ ರಿಂಕು ಸಿಂಗ್​ ಕೂಡ ಅಬ್ಬರಿಸಿ 29 ಎಸೆತಗಳಲ್ಲಿ 53 ರನ್ ಗಳಿಸಿದರು.

ಇದನ್ನೂ ಓದಿ:2ನೇ ಟಿ20: ಟೀಂ​ ಇಂಡಿಯಾದ ಈ ಆಟಗಾರ ಸಿಡಿದೆದ್ದರೆ ಬಾಂಗ್ಲಾ ಧೂಳೀಪಟ!