1983 ರಿಂದಲೂ ಟೀಂ ಇಂಡಿಯಾ ಪಾಲಿಗೆ ಶನಿವಾರ ಲಕ್ಕಿ ಡೇ: ಇಲ್ಲಿದೆ ನೋಡಿ ಕುತೂಹಲಕಾರಿ ಮಾಹಿತಿ - Lucky Saturday for Team India

ಶನಿವಾರ (ಜೂನ್​ 29, 2024) ಟೀಂ ಇಂಡಿಯಾ ಪಾಲಿಗೆ ಐತಿಹಾಸಿಕ ದಿನವಾಗಿ ಉಳಿಯಿತು. ಇದಕ್ಕೆ ಕಾರಣ ಶನಿವಾರ ಭಾರತ ತಂಡದ ಪಾಲಿಗೆ ಅದೃಷ್ಟದ ದಿನವಾಗಿದೆ. ಏಕೆಂದರೆ 1983 ರಿಂದಲೂ ಶನಿವಾರದಂದೇ ಭಾರತ 3 ಐಸಿಸಿ ಟ್ರೋಫಿಗಳನ್ನು ಗೆದ್ದುಕೊಂಡಿದೆ.

ಹೈದರಾಬಾದ್: ಶನಿವಾರ ಟೀಂ ಇಂಡಿಯಾ ಪಾಲಿಗೆ ಅದೃಷ್ಟದ ದಿನವಾಗಿದೆ. ಏಕೆಂದರೇ ಇದೇ ದಿನದಂದು ಈವರೆಗೆ ಭಾರತ 3 ಐಸಿಸಿ ಟ್ರೋಫಿಗಳನ್ನು ಗೆದ್ದುಕೊಂಡಿದೆ. 1983ರಲ್ಲಿ ಚೊಚ್ಚಲ ಏಕದಿನ ವಿಶ್ವಕಪ್, 2011ರಲ್ಲಿ ಎರಡನೇ ಏಕದಿನ ವಿಶ್ವಕಪ್​, ಇದೀಗ ನಿನ್ನೆ (ಜೂ.29) ಎರಡನೇ ಟಿ20 ವಿಶ್ವಕಪ್​ ಗೆದ್ದುಕೊಂಡಿದೆ. ಈ ಮೂರು ಟ್ರೋಫಿಗಳು ಶನಿವಾರದಂದೇ ಗೆದ್ದಿರುವುದರಿಂದ ಟೀಂ ಇಂಡಿಯಾಗೆ ಈ ದಿನ ವಿಶೇಷವಾಗಿದೆ ಎಂಬ ಚರ್ಚೆ ಶುರುವಾಗಿದೆ.

ಚೊಚ್ಚಲ ವಿಶ್ವಕಪ್​: 1983 ಜೂನ್​ 25ರಂದು ಭಾರತ ಚೊಚ್ಚಲ ವಿಶ್ವಕಪ್​ ಗೆದ್ದಿದ್ದ ವೇಳೆ ಆ ದಿನ ಶನಿವಾರ ಆಗಿತ್ತು. ಈ ವಿಶ್ವಕಪ್​ ಟೂರ್ನಿಯಲ್ಲಿ ಭಾರತ ಕಪ್​ ಗೆಲ್ಲುವ ಫೆವರೆಟ್​ ತಂಡವಾಗಿ ಗುರುತಿಸಿಕೊಂಡಿರಲಿಲ್ಲ. ಆದರೆ ನಾಯಕ ಕಪಿಲ್​ ದೇವ್​ ನೇತೃತ್ವದ ತಂಡ ಸತತ ಹೋರಾಟದ ಫಲವಾಗಿ ಫೈನಲ್​ಗೆ ತಲುಪಿತ್ತು.

ಈ ಫೈನಲ್ ಪಂದ್ಯ ಲಂಡನ್‌ನ ಲಾರ್ಡ್ಸ್‌ ಮೈದಾನದಲ್ಲಿ ನಡೆದಿತ್ತು. ಭಾರತ ಎರಡು ಬಾರಿ ವಿಶ್ವ ಚಾಂಪಿಯನ್ ಆಗಿದ್ದ ಮತ್ತ ಕಪ್​ ಗೆಲ್ಲುವ ಫೆವರೆಟ್​ ತಂಡ ಎನಿಸಿಕೊಂಡಿದ್ದ ವೆಸ್ಟ್ ಇಂಡೀಸ್ ವಿರುದ್ಧ ಫೈನಲ್​ ಕದನಕ್ಕಿಳಿದಿತ್ತು. ವೆಸ್ಟ್​ ಇಂಡೀಸ್​ ಈ ಪಂದ್ಯ ಸುಲಭವಾಗಿ ಗೆಲ್ಲಲಿದೆ ಎಂದೇ ಎಲ್ಲರೂ ನಿರೀಕ್ಷಿಸಿದ್ದರು. ಆದರೆ ಆ ನಿರೀಕ್ಷೆಯನ್ನು ಹುಸಿಗೊಳಿಸಿದ ಭಾರತ ಬಲಿಷ್ಠ ವೆಸ್ಟ್​ ಇಂಡೀಸ್​ ತಂಡವನ್ನು ಬಗ್ಗುಬಡಿದು ಚೊಚ್ಚಲ ವಿಶ್ವಕಪ್​ ಜಯಿಸಿತ್ತು.

ವೆಸ್ಟ್ ಇಂಡೀಸ್‌ನ ಬ್ಯಾಟಿಂಗ್ ಲೈನ್-ಅಪ್‌ನಲ್ಲಿ ವಿವಿಯನ್ ರಿಚರ್ಡ್ಸ್‌ನಂತಹ ದಿಗ್ಗಜ ಆಟಗಾರರಿದ್ದರು. ಭಾರತದ ಮೊಹಿಂದರ್ ಅಮರನಾಥ್ ಮತ್ತು ಮದನ್ ಲಾಲ್ ಅವರ ಮಾರಕ ಬೌಲಿಂಗ್ ದಾಳಿಗೆ ಇಡೀ ವಿಂಡೀಸ್ ತಂಡ ಶರಣಾಗಿತ್ತು. ಅದು ದಿನವೂ ಶನಿವಾರವೇ ಆಗಿತ್ತು.

ಎರಡನೇ ವಿಶ್ವಕಪ್​: ಇದಾದ ಬಳಿಕ ಏಪ್ರಿಲ್ 2, 2011ರಂದು ಶನಿವಾರದಂದೇ ಭಾರತ ಎರಡನೇ ಏಕದಿನ ವಿಶ್ವಕಪ್​ ಜಯಿಸಿತ್ತು. ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ಫೈನಲ್​ ಪಂದ್ಯದಲ್ಲಿ ಮಹೇಂದ್ರ ಸಿಂಗ್ ಧೋನಿ ನೇತೃತ್ವದ ಟೀಂ ಇಂಡಿಯಾ ಶ್ರೀಲಂಕಾವನ್ನು ಮಣಿಸುವ ಮೂಲಕ ಟ್ರೋಫಿಯನ್ನು ಎತ್ತಿ ಹಿಡಿದಿತ್ತು.

ಟಿ20 ವಿಶ್ವಕಪ್​:ಇದೀಗ ನಿನ್ನೆ ಅಂದರೆ ಶನಿವಾರವೇ ಟೀಂ ಇಂಡಿಯಾ ಎರಡನೇ ಟಿ20 ವಿಶ್ವಕಪ್ ಗೆದ್ದುಕೊಂಡಿದೆ.​ ಫೈನಲ್​ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 7 ರನ್​ಗಳಿಂದ ರೋಚಕ ಗೆಲುವು ಸಾಧಿಸುವ ಮೂಲಕ ಎರಡನೇ ಬಾರಿಗೆ ಕಪ್​ ಎತ್ತಿಹಿಡಿದಿದೆ.

ಇದನ್ನೂ ಓದಿ:ಕೊಹ್ಲಿ- ರೋಹಿತ್​ ಶರ್ಮಾ ಬೆನ್ನಲ್ಲೇ ಟಿ20ಗೆ ​ಆಲ್​ ರೌಂಡರ್ ರವೀಂದ್ರ​ ಜಡೇಜಾ ವಿದಾಯ - Ravindra Jadeja retires