14 ವರ್ಷಗಳ ನಂತರ ಲೇಬರ್​ ಪಕ್ಷದ ಗೆಲುವು: ಯುಕೆಯಲ್ಲಿ ರಾಜಕೀಯ ಬದಲಾವಣೆ ಅಲೆ - UK Elections

ಬ್ರಿಟನ್​ನಲ್ಲಿ ಇತ್ತೀಚೆಗೆ ಮುಕ್ತಾಯವಾದ ಚುನಾವಣಾ ಫಲಿತಾಂಶದ ಒಂದು ಅವಲೋಕನ ಇಲ್ಲಿದೆ.

ಯುನೈಟೆಡ್ ಕಿಂಗಡಮ್ (ಯುಕೆ)ನ ಸಾರ್ವತ್ರಿಕ ಚುನಾವಣೆಯಲ್ಲಿ ಲೇಬರ್ ಪಕ್ಷವು ಅದ್ಭುತ ಚುನಾವಣಾ ವಿಜಯ ದಾಖಲಿಸಿದೆ. ಹೌಸ್ ಆಫ್ ಕಾಮನ್ಸ್​ನ 650 ಸಂಸತ್ ಸದಸ್ಯ ಸ್ಥಾನಗಳಲ್ಲಿ, ಕೈರ್ ಸ್ಟಾರ್ಮರ್ ನೇತೃತ್ವದ ಲೇಬರ್ ಪಕ್ಷವು ಸುಮಾರು 412 ಸ್ಥಾನಗಳನ್ನು ಗೆದ್ದಿದೆ. ಲೇಬರ್ ಪಕ್ಷವು 14 ವರ್ಷಗಳ ಅಂತರದ ನಂತರ ಮತ್ತೆ ಅಧಿಕಾರಕ್ಕೆ ಬಂದಿದೆ ಮತ್ತು ಗೆಲುವಿನ ಗೌರವ ಕೈರ್ ಸ್ಟಾರ್ಮರ್ ಅವರ ನಾಯಕತ್ವಕ್ಕೆ ಸಲ್ಲುತ್ತದೆ.

ಲೇಬರ್ ಪಕ್ಷದ ನಾಯಕತ್ವವನ್ನು ವಹಿಸಿಕೊಳ್ಳುವ ಮೊದಲು, ಕೈರ್ ಸ್ಟಾರ್ಮರ್ ಮಾನವ ಹಕ್ಕುಗಳ ವಕೀಲರಾಗಿ ಮತ್ತು ಕ್ರೌನ್ ಪ್ರಾಸಿಕ್ಯೂಷನ್ ಸೇವೆಯಲ್ಲಿ ಮುಖ್ಯ ಪ್ರಾಸಿಕ್ಯೂಟರ್ ಆಗಿ ಕೆಲಸ ಮಾಡಿದ್ದಾರೆ. ಪ್ರಧಾನಿಯಾಗಿ ಅಧಿಕಾರ ವಹಿಸಿಕೊಂಡ ನಂತರ ತಮ್ಮ ಮೊದಲ ಭಾಷಣದಲ್ಲಿ, ಕೈರ್ ಸ್ಟಾರ್ಮರ್ "ರಾಷ್ಟ್ರದಲ್ಲಿ ಪರಿವರ್ತನೆ ಮತ್ತು ಸಾರ್ವಜನಿಕ ಸೇವೆಯ ರಾಜಕೀಯಕ್ಕೆ ಮರಳುವ" ಕಡೆಗೆ ಕೆಲಸ ಮಾಡುವುದಾಗಿ ಭರವಸೆ ನೀಡಿದರು.

ಪಕ್ಷಗಳು, ಮತ ಹಂಚಿಕೆ ಮತ್ತು ಸ್ಥಾನ ಹಂಚಿಕೆ : ಸಂಸತ್ತಿನಲ್ಲಿ ಲೇಬರ್ ಪಕ್ಷದ ಸಂಖ್ಯೆ ಗಮನಾರ್ಹವಾಗಿ ಸುಧಾರಿಸಿದ್ದರೂ, ಅನೇಕ ಕ್ಷೇತ್ರಗಳಲ್ಲಿ ಗೆಲುವಿನ ಅಂತರ ಕಡಿಮೆಯಾಗಿದೆ. 2019 ರಲ್ಲಿ ಲೇಬರ್ ಪಕ್ಷದ ಮತ ಹಂಚಿಕೆ ಶೇಕಡಾ 32 ರಷ್ಟಿತ್ತು. ಈ ಬಾರಿ, ಲೇಬರ್ ಪಕ್ಷದ ಮತ ಹಂಚಿಕೆ ಶೇಕಡಾ 33.8ಕ್ಕೆ ಏರಿಕೆಯಾಗಿದೆ. ಈ ಮೂಲಕ ಅದು ಸಂಸತ್ತಿನಲ್ಲಿ ಶೇಕಡಾ 63ರಷ್ಟು ಸ್ಥಾನಗಳನ್ನು ಗೆದ್ದುಕೊಂಡಿದೆ.

ಮತ್ತೊಂದೆಡೆ, ಕನ್ಸರ್ವೇಟಿವ್ ಪಕ್ಷದ ಮತಗಳ ಶೇಕಡಾವಾರು ಪ್ರಮಾಣ 2019 ರಲ್ಲಿ ಇದ್ದ ಸುಮಾರು 43 ಪ್ರತಿಶತದಿಂದ 23.7 ಪ್ರತಿಶತಕ್ಕೆ ದೊಡ್ಡ ಪ್ರಮಾಣದಲ್ಲಿ ಕುಸಿದಿದೆ. ಕನ್ಸರ್ವೇಟಿವ್ ಪಕ್ಷವು ಸುಮಾರು 121 ಸ್ಥಾನಗಳನ್ನು ಗೆದ್ದಿದ್ದು, ಅದು ಕಳೆದ ಬಾರಿ ಹೊಂದಿದ್ದ ಸುಮಾರು 244 ಸ್ಥಾನಗಳನ್ನು ಕಳೆದುಕೊಂಡಿದೆ. ಮಾಜಿ ಕನ್ಸರ್ವೇಟಿವ್ ಪ್ರಧಾನಿ ಲಿಜ್ ಟ್ರಸ್, ರಕ್ಷಣಾ ಕಾರ್ಯದರ್ಶಿ ಗ್ರಾಂಟ್ ಶಾಪ್ಸ್ ಮತ್ತು ಇತರ ಪ್ರಮುಖ ಸಚಿವರು ಚುನಾವಣೆಯಲ್ಲಿ ಸೋತಿದ್ದಾರೆ.

ಕನ್ಸರ್ವೇಟಿವ್ ಪಕ್ಷದ ಅನೇಕರು ಚುನಾವಣಾ ಸೋಲಿಗೆ ಒಳಜಗಳವೇ ಕಾರಣ ಎಂದು ಹೇಳಿದ್ದಾರೆ. ಕನ್ಸರ್ವೇಟಿವ್ ಪಕ್ಷದಿಂದ ಕಳೆದ ಎಂಟು ವರ್ಷಗಳಲ್ಲಿ ಐವರು ಪ್ರಧಾನ ಮಂತ್ರಿಗಳಾಗಿದ್ದು, ಈ ವಾದಕ್ಕೆ ಇಂಬು ನೀಡುವಂತಿದೆ. ಅಕ್ರಮ ವಲಸೆ ಮತ್ತು ಹಣದುಬ್ಬರದಂತಹ ಪ್ರಮುಖ ಸಮಸ್ಯೆಗಳನ್ನು ಪರಿಣಾಮಕಾರಿಯಾಗಿ ಪರಿಹರಿಸಲು ಸಾಧ್ಯವಾಗದ್ದರಿಂದ ಅನೇಕ ಸಂಪ್ರದಾಯವಾದಿ ಮತದಾರರು ಕನ್ಸರ್ವೇಟಿವ್ ಪಕ್ಷದಿಂದ ದೂರವಾಗಿದ್ದಾರೆ ಎನ್ನಲಾಗಿದೆ.

ದೊಡ್ಡ ಪ್ರಮಾಣದಲ್ಲಿ ತೆರಿಗೆ ಇಳಿಕೆ ಮಾಡುವ, ಅಕ್ರಮ ವಲಸೆ ತಡೆಗೆ ಕಟ್ಟುನಿಟ್ಟಾದ ಗಡಿ ನಿಯಂತ್ರಣ ಕಾನೂನು ಜಾರಿ ಮತ್ತು ಬ್ರಿಟಿಷ್ ಸಂಸ್ಕೃತಿ, ಗುರುತು ಮತ್ತು ಮೌಲ್ಯಗಳಿಗಾಗಿ ಹೋರಾಡುವುದಾಗಿ ಭರವಸೆ ನೀಡಿದ ರಿಫಾರ್ಮ್ ಯುಕೆ ಪಕ್ಷದತ್ತ (Reform UK Party) ಅನೇಕ ಕನ್ಸರ್ವೇಟಿವ್ ಪಕ್ಷದ ಮತದಾರರು ವಾಲಿದ್ದಾರೆ. ಈ ಪಕ್ಷವು ಶೇಕಡಾ 14.3 ರಷ್ಟು ಮತ ಗಳಿಕೆಯೊಂದಿಗೆ ಐದು ಸ್ಥಾನಗಳನ್ನು ಗೆದ್ದರೆ, ಸರಿಸುಮಾರು 103 ಕ್ಷೇತ್ರಗಳಲ್ಲಿ ಎರಡನೇ ಸ್ಥಾನದಲ್ಲಿದೆ. ರಿಫಾರ್ಮ್ ಯುಕೆ ಪಕ್ಷದ ಉತ್ತಮ ಸಾಧನೆಯು ಯುರೋಪಿಯನ್ ದೇಶಗಳಲ್ಲಿನ ಮನಸ್ಥಿತಿಗೆ ಅನುಗುಣವಾಗಿದೆ. ಇಲ್ಲಿ ವಲಸೆ ಸಮಸ್ಯೆಯ ಬಗ್ಗೆ ಆತಂಕಗೊಂಡ ಅನೇಕರು ಬಲಪಂಥೀಯ ಪಕ್ಷಗಳಿಗೆ ಮತ ಚಲಾಯಿಸುತ್ತಿದ್ದಾರೆ. ರಿಫಾರ್ಮ್ ಯುಕೆ ಪಕ್ಷವು ಚುನಾವಣೆಯಲ್ಲಿ ಸ್ಪರ್ಧಿಸದಿದ್ದರೆ ಕನ್ಸರ್ವೇಟಿವ್ ಪಕ್ಷದ ಸಾಧನೆ ಇನ್ನೂ ಉತ್ತಮವಾಗಿರುತ್ತಿತ್ತು ಎಂದು ಮಾಧ್ಯಮ ವರದಿಗಳು ಹೇಳಿವೆ.

ಲಿಬರಲ್ ಡೆಮಾಕ್ರಟಿಕ್ ಪಕ್ಷವು ಸಂಸತ್ತಿನ 71 ಸದಸ್ಯರೊಂದಿಗೆ ಮೂರನೇ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. 2019 ರಲ್ಲಿ ಲಿಬರಲ್ ಡೆಮಾಕ್ರಟಿಕ್ ಪಕ್ಷವು ಸುಮಾರು 11.5 ಪ್ರತಿಶತದಷ್ಟು ಮತ ಗಳಿಕೆಯೊಂದಿಗೆ 11 ಸ್ಥಾನಗಳನ್ನು ಗೆದ್ದಿತ್ತು ಎಂಬುದು ಗಮನಾರ್ಹ. 2024 ರಲ್ಲಿ, ಲಿಬರಲ್ ಡೆಮೋಕ್ರಾಟ್​ಗಳ ಮತ ಹಂಚಿಕೆ ಸುಮಾರು 12.2 ಪ್ರತಿಶತಕ್ಕೆ ಏರಿಕೆಯಾಗಿ, ಅದು 71 ಸ್ಥಾನಗಳನ್ನು ಗೆದ್ದಿದೆ. ಕನ್ಸರ್ವೇಟಿವ್ ಮತಗಳು ವಿಭಜನೆಯಾಗಿರುವುದು ಮತ್ತು ರಿಫಾರ್ಮ್ ಯುಕೆ ಪಕ್ಷವು ಕನ್ಸರ್ವೇಟಿವ್​ ಮತದಾರರ ಮತಗಳನ್ನು ಪಡೆದಿದ್ದರಿಂದಲೇ ಲಿಬರಲ್ ಡೆಮೋಕ್ರಾಟ್ ಅಭೂತಪೂರ್ವ ಜಯಗಳಿಸಲು ಸಾಧ್ಯವಾಗಿದೆ.

ಚುನಾವಣೆಯ ಪ್ರಾದೇಶಿಕ ಮಟ್ಟದ ವಿಶ್ಲೇಷಣೆಯು ಆಸಕ್ತಿದಾಯಕ ಫಲಿತಾಂಶಗಳನ್ನು ತೋರಿಸುತ್ತದೆ. ದೇಶದ ಉತ್ತರ ಭಾಗದಲ್ಲಿ, ಸ್ಕಾಟ್ಲೆಂಡ್​ನ ಸ್ವಾತಂತ್ರ್ಯಕ್ಕಾಗಿ ಕರೆ ನೀಡುವ ಸ್ಕಾಟಿಷ್ ನ್ಯಾಷನಲ್ ಪಾರ್ಟಿ (ಎಸ್ಎನ್​ಪಿ) ಸುಮಾರು 9 ಸಂಸತ್ ಸದಸ್ಯ ಸ್ಥಾನಗಳನ್ನು ಗೆದ್ದಿದೆ. 2019 ಕ್ಕೆ ಹೋಲಿಸಿದರೆ, ಎಸ್ಎನ್​ಪಿ ಸುಮಾರು 39 ಸ್ಥಾನಗಳನ್ನು ಕಳೆದುಕೊಂಡಿದೆ. ಸ್ಕಾಟ್ಲೆಂಡ್​ನ ಸ್ವಾತಂತ್ರ್ಯದ ಎಸ್ಎನ್​ಪಿಯ ಕಾರ್ಯಸೂಚಿಯು ಸದ್ಯಕ್ಕೆ ಹಿನ್ನೆಲೆಗೆ ಸರಿದಿದ್ದರೂ, ಸ್ಕಾಟಿಷ್ ಸಂಸತ್ತಿನ 2026 ರ ಚುನಾವಣೆಯಲ್ಲಿ ಅದು ಮತ್ತೊಮ್ಮೆ ಪರಿಶೀಲನೆಗೆ ಒಳಪಡಲಿದೆ. ಮತ್ತೊಂದೆಡೆ, 2019 ರಲ್ಲಿ ಕೇವಲ ಒಂದು ಸ್ಥಾನ ಗೆದ್ದ ಲೇಬರ್ ಪಕ್ಷವು ಈ ಬಾರಿ ಸ್ಕಾಟ್ಲೆಂಡ್​ನಲ್ಲಿ 37 ಸ್ಥಾನಗಳನ್ನು ಗೆದ್ದಿದೆ. ವೇಲ್ಸ್ ಪ್ರದೇಶದಲ್ಲಿ ಕನ್ಸರ್ವೇಟಿವ್ ಪಕ್ಷವು ಒಂದೇ ಒಂದು ಸ್ಥಾನವನ್ನು ಗೆದ್ದಿಲ್ಲ. ಉತ್ತರ ಐರ್ಲೆಂಡ್​ನಲ್ಲಿ, ಸಿನ್ ಫೆನ್ 7 ಸಂಸತ್ ಸದಸ್ಯ ಸ್ಥಾನಗಳನ್ನು ಗೆದ್ದರೆ, ಡೆಮಾಕ್ರಟಿಕ್ ಯೂನಿಯನಿಸ್ಟ್ ಪಕ್ಷವು 5 ಸ್ಥಾನಗಳನ್ನು ಗೆದ್ದಿದೆ.

ಭಾರತದ ಮೇಲಾಗಬಹುದಾದ ಪರಿಣಾಮಗಳು: ಹೊಸ ಹೌಸ್ ಆಫ್ ಕಾಮನ್ಸ್​ನಲ್ಲಿ ಸರಿಸುಮಾರು 28 ಸಂಸತ್ ಸದಸ್ಯರು ಭಾರತೀಯ ಮೂಲದವರಾಗಿದ್ದಾರೆ. ಅವರ ಆಯ್ಕೆ ಸ್ವಾಗತಾರ್ಹ ಬೆಳವಣಿಗೆಯಾಗಿದ್ದರೂ, ಯುಕೆ ಸಂಸತ್ತಿನಲ್ಲಿ ಭಾರತೀಯ ಮೂಲದ ಜನರ ಹೆಚ್ಚಿದ ಉಪಸ್ಥಿತಿಯು ಸ್ವಯಂಚಾಲಿತವಾಗಿ ಭಾರತದೊಂದಿಗೆ ಉತ್ತಮ ಸಂಬಂಧಕ್ಕೆ ಕಾರಣವಾಗುತ್ತದೆ ಎಂಬುದು ವಾಸ್ತವವಲ್ಲ. ಭಾರತೀಯ ಮೂಲದ ಸಂಸದರು ವಿಶ್ವದಾದ್ಯಂತ ಬ್ರಿಟಿಷ್ ಹಿತಾಸಕ್ತಿಗಳನ್ನು ಕಾಪಾಡಲು ಪ್ರಯತ್ನಿಸುವುದು ಇದಕ್ಕೆ ಕಾರಣವಾಗಿದೆ. ಇದಲ್ಲದೇ , ಅವರು ಭಾರತದೊಂದಿಗಿನ ಸಂವಹನದಲ್ಲಿ ತಮ್ಮ ಸ್ಥಳೀಯ ಮತ ಬ್ಯಾಂಕುಗಳ ಆದ್ಯತೆಗಳನ್ನು ಪರಿಗಣಿಸಬೇಕಾಗುತ್ತದೆ.

2019 ರಲ್ಲಿ, ಜೆರೆಮಿ ಕಾರ್ಬಿನ್ ನೇತೃತ್ವದ ಲೇಬರ್ ಪಕ್ಷವು ಕಾಶ್ಮೀರದಲ್ಲಿ ಅಂತಾರಾಷ್ಟ್ರೀಯ ಹಸ್ತಕ್ಷೇಪಕ್ಕೆ ಕರೆ ನೀಡಿತ್ತು. ಇದು ಭಾರತದಲ್ಲಿ ಸಾಕಷ್ಟು ನಿರಾಶೆ ಮೂಡಿಸಿತ್ತು. ಆದಾಗ್ಯೂ, ಲೇಬರ್ ಪಕ್ಷದ ನಾಯಕತ್ವವನ್ನು ವಹಿಸಿಕೊಂಡ ನಂತರ, ಕೈರ್ ಸ್ಟಾರ್ಮರ್ "ಭಾರತದಲ್ಲಿನ ಯಾವುದೇ ಸಾಂವಿಧಾನಿಕ ಸಮಸ್ಯೆಗಳು ಭಾರತೀಯ ಸಂಸತ್ತಿಗೆ ಸಂಬಂಧಿಸಿದ ವಿಷಯವಾಗಿದೆ, ಮತ್ತು ಕಾಶ್ಮೀರವು ಭಾರತ ಮತ್ತು ಪಾಕಿಸ್ತಾನದ ಮಧ್ಯದ ದ್ವಿಪಕ್ಷೀಯ ವಿಷಯವಾಗಿದೆ" ಎಂದು ಹೇಳಿದ್ದಾರೆ.

ಇದಲ್ಲದೇ, ಇತ್ತೀಚಿನ ಲೇಬರ್ ಪಕ್ಷದ ಪ್ರಣಾಳಿಕೆಯಲ್ಲಿ ಮುಕ್ತ ವ್ಯಾಪಾರ ಒಪ್ಪಂದ ಸೇರಿದಂತೆ ಭಾರತದೊಂದಿಗೆ ಹೊಸ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಪ್ರಸ್ತಾಪಿಸಲಾಗಿದೆ. ಜೊತೆಗೆ ಭದ್ರತೆ, ಶಿಕ್ಷಣ, ತಂತ್ರಜ್ಞಾನ ಮತ್ತು ಹವಾಮಾನ ಬದಲಾವಣೆಯಂತಹ ಕ್ಷೇತ್ರಗಳಲ್ಲಿ ಸಹಕಾರ ಹೆಚ್ಚಿಸುವ ಬಗ್ಗೆ ಪ್ರಣಾಳಿಕೆಯಲ್ಲಿ ಹೇಳಲಾಗಿದೆ. ಯುರೋಪಿಯನ್ ಒಕ್ಕೂಟದಿಂದ ಹೊರಬಂದ ಯುನೈಟೆಡ್ ಕಿಂಗ್ ಡಮ್​ಗೆ, ಭಾರತೀಯ ಮಾರುಕಟ್ಟೆಯನ್ನು ಪ್ರವೇಶಿಸುವುದು ತುರ್ತು ಅಗತ್ಯವಾಗಿದೆ.

ಲೇಬರ್ ಪಕ್ಷದ ಪ್ರಣಾಳಿಕೆಯು ಸಾಮಾನ್ಯ ಅಪಾಯಗಳನ್ನು ಎದುರಿಸಲು ಮತ್ತು ಮಿತ್ರರಾಷ್ಟ್ರಗಳು ಮತ್ತು ಸ್ನೇಹಿತರೊಂದಿಗೆ ಹೆಚ್ಚಿನ ಸಹಯೋಗ ಬೆಳೆಸಲು ಯುಕೆ - ಇಯು ಭದ್ರತಾ ಒಪ್ಪಂದವನ್ನು ಮಾಡಿಕೊಳ್ಳುವುದಾಗಿ ಭರವಸೆ ನೀಡಿತು. ಸಾಂಪ್ರದಾಯಿಕವಲ್ಲದ ಭದ್ರತೆಯ ಕ್ಷೇತ್ರದಲ್ಲಿ, ಲೇಬರ್ ಪ್ರಣಾಳಿಕೆಯು ಬಹುಪಕ್ಷೀಯ ಸಂಸ್ಥೆಗಳ ಸುಧಾರಣೆ, ಹೊಸ ಕ್ಲೀನ್ ಪವರ್ ಅಲೈಯನ್ಸ್ ಮತ್ತು ಅಂತಾರಾಷ್ಟ್ರೀಯ ಅಭಿವೃದ್ಧಿಗಾಗಿ ಗ್ಲೋಬಲ್ ಸೌತ್ ನೊಂದಿಗೆ ಪಾಲುದಾರಿಕೆಗೆ ಕರೆ ನೀಡಿದೆ.

ರಾಜಕೀಯದಲ್ಲಿ ಒಂದು ವಾರದ ಅವಧಿಯು ದೀರ್ಘ ಸಮಯವಾಗಬಹುದು ಎಂದು ಆಗಾಗ ಹೇಳಲಾಗುತ್ತದೆ. ಕನ್ಸರ್ವೇಟಿವ್ ಪಕ್ಷವು ಹೊಸ ನಾಯಕತ್ವ ಮತ್ತು ಕಾರ್ಯಸೂಚಿಯ ತಯಾರಿಕೆಗಾಗಿ ಒಳಜಗಳವನ್ನು ನಿವಾರಿಸಿಕೊಳ್ಳಬೇಕಿದೆ. ಅದು ಹಾಗೆ ಮಾಡಲು ವಿಫಲವಾದರೆ, ರಿಫಾರ್ಮ್ ಯುಕೆ ಪಾರ್ಟಿಯಂತಹ ಇತರರು ಕನ್ಸರ್ವೇಟಿವ್ ಪಕ್ಷದ ಮತಗಳ ಕಸಿಯುವಿಕೆಯನ್ನು ಮುಂದುವರಿಸುತ್ತಾರೆ.

ಯುರೋಪಿನಾದ್ಯಂತ, ಬಲಪಂಥೀಯ ಪಕ್ಷಗಳು ಚುನಾವಣೆಯಲ್ಲಿ ಉತ್ತಮ ಸಾಧನೆ ಮಾಡುತ್ತಿವೆ. ಯುನೈಟೆಡ್ ಕಿಂಗ್ ಡಮ್​ನಲ್ಲಿನ ಚುನಾವಣಾ ಫಲಿತಾಂಶಗಳು ದೇಶದಲ್ಲಿ ಇದೇ ರೀತಿಯ ಆಡಳಿತ ವಿರೋಧಿ ಮನಸ್ಥಿತಿಯನ್ನು ಸೂಚಿಸುತ್ತವೆ. ಆದಾಗ್ಯೂ, ಲೇಬರ್ ಪಕ್ಷ ಮತ್ತು ಲಿಬರಲ್ ಡೆಮಾಕ್ರಟಿಕ್ ಪಾರ್ಟಿಯಂತಹ ಇತರ ಪಕ್ಷಗಳ ಉಪಸ್ಥಿತಿಯು ಆಡಳಿತ ವಿರೋಧಿ ಮತಗಳು ಸಂಪೂರ್ಣವಾಗಿ ಬಲಪಂಥೀಯ ಪಕ್ಷಗಳಿಗೆ ಮತವಾಗಿ ವರ್ಗಾವಣೆಯಾಗದಂತೆ ನೋಡಿಕೊಂಡಿದೆ. ಅದೇನೇ ಇದ್ದರೂ, ರಿಫಾರ್ಮ್ ಯುಕೆ ಪಕ್ಷದ ಸಾಧನೆಯನ್ನು ಗಮನಿಸಬೇಕು. ಮುಂಬರುವ ವರ್ಷಗಳಲ್ಲಿ, ರಿಫಾರ್ಮ್ ಯುಕೆ ಪಕ್ಷದ ರಾಜಕೀಯವು ಸಾಕಷ್ಟು ಗಮನ ಸೆಳೆಯಲಿದೆ.

ಫಸ್ಟ್-ಪಾಸ್ಟ್-ದಿ-ಪೋಸ್ಟ್ ಚುನಾವಣಾ ವ್ಯವಸ್ಥೆಯನ್ನು ಹೊಂದಿರುವ ಅನೇಕ ದೇಶಗಳಲ್ಲಿರುವಂತೆ, ಇತ್ತೀಚಿನ ಯುಕೆ ಚುನಾವಣೆಯಲ್ಲಿ ರಾಜಕೀಯ ಪಕ್ಷಗಳ ಮತ ಹಂಚಿಕೆ ಮತ್ತು ಸ್ಥಾನ ಹಂಚಿಕೆಯ ನಡುವೆ ಸಂಪರ್ಕ ಕಡಿತ ಕಂಡು ಬಂದಿದೆ. ಇದು ಯುಕೆಯಲ್ಲಿ ಅನುಪಾತದ ಪ್ರಾತಿನಿಧ್ಯ ವ್ಯವಸ್ಥೆಯ ಅಗತ್ಯದ ಬಗ್ಗೆ ಮತ್ತೊಮ್ಮೆ ಸಾಕಷ್ಟು ಚರ್ಚೆಯನ್ನು ಹುಟ್ಟುಹಾಕುತ್ತದೆ. ರಾಯಿಟರ್ಸ್ ವರದಿಯ ಪ್ರಕಾರ, ಸಣ್ಣ ಪಕ್ಷಗಳು ಸರಿಸುಮಾರು 40 ಪ್ರತಿಶತದಷ್ಟು ಮತಗಳನ್ನು ಪಡೆದಿವೆ. ಆದರೆ, ಸಂಸತ್ತಿನಲ್ಲಿ ಕೇವಲ 17 ಪ್ರತಿಶತದಷ್ಟು ಸ್ಥಾನಗಳನ್ನು ಗೆದ್ದಿವೆ.

ಆದ್ದರಿಂದ, ರಿಫಾರ್ಮ್ ಯುಕೆ ಪಕ್ಷ ಮತ್ತು ಗ್ರೀನ್ ಪಾರ್ಟಿ ನಾಯಕರು ನ್ಯಾಯಯುತ ಚುನಾವಣಾ ವ್ಯವಸ್ಥೆಗೆ ಕರೆ ನೀಡಿರುವುದು ಆಶ್ಚರ್ಯವೇನಲ್ಲ. ಹಲವು ವರ್ಷಗಳಿಂದ, ಲಿಬರಲ್ ಡೆಮೋಕ್ರಾಟ್​ಗಳು ಸಂಸತ್ತಿನ ಸ್ಥಾನಗಳಿಗೆ ಉತ್ತಮ ಮತ ಹಂಚಿಕೆ ಪರಿವರ್ತನೆಯನ್ನು ಖಚಿತಪಡಿಸಿಕೊಳ್ಳಲು ಅನುಪಾತದ ಪ್ರಾತಿನಿಧ್ಯ ಮಾದರಿಗೆ ಪರಿವರ್ತನೆಗೊಳ್ಳಬೇಕೆಂದು ಒತ್ತಾಯಿಸುತ್ತಿದ್ದಾರೆ. ವಾಸ್ತವವಾಗಿ, ದೇಶವು ಪರ್ಯಾಯ ಮತ ವ್ಯವಸ್ಥೆಯನ್ನು ಅಳವಡಿಸಿಕೊಳ್ಳಬೇಕೇ ಎಂದು ನಿರ್ಧರಿಸಲು 2011 ರಲ್ಲಿ ಜನಾಭಿಪ್ರಾಯ ಸಂಗ್ರಹ ನಡೆಸಲಾಗಿತ್ತು. ಬಹುಸಂಖ್ಯಾತ ಮತದಾರರು ಅಸ್ತಿತ್ವದಲ್ಲಿರುವ ಫಸ್ಟ್-ಪಾಸ್ಟ್-ದಿ-ಪೋಸ್ಟ್ ಚುನಾವಣಾ ವ್ಯವಸ್ಥೆಯನ್ನು ಮುಂದುವರಿಸಲು ಆದ್ಯತೆ ನೀಡಿದರು. ಅನುಪಾತದ ಪ್ರಾತಿನಿಧ್ಯವನ್ನು ಪರಿಚಯಿಸುವುದರಿಂದ ಅಸ್ಮಿತೆಯ ರಾಜಕೀಯವನ್ನು ಪ್ರಚೋದಿಸಬಹುದು ಮತ್ತು ಸಾಮಾಜಿಕ ವಿಭಜನೆಗಳನ್ನು ಆಳಗೊಳಿಸಬಹುದು ಎಂಬ ಕಳವಳಗಳಿವೆ.

ಪಕ್ಷಗಳ ನಡುವಿನ ಸ್ಥಾನಗಳ ವ್ಯತ್ಯಾಸವನ್ನು ನಾವು ಪರಿಶೀಲಿಸಿದರೆ, ಯುನೈಟೆಡ್ ಕಿಂಗ್ ಡಮ್​ನಲ್ಲಿನ ಚುನಾವಣಾ ಫಲಿತಾಂಶಗಳನ್ನು ಚುನಾವಣಾ ಸುನಾಮಿ ಎಂದು ಕರೆಯಬಹುದು. ಆದಾಗ್ಯೂ, ಪಕ್ಷಗಳ ಮತ ಹಂಚಿಕೆಯನ್ನು ಪರಿಶೀಲಿಸಿದರೆ, ಯುನೈಟೆಡ್ ಕಿಂಗ್ ಡಮ್​ನಲ್ಲಿ ಬದಲಾವಣೆಯ ಸಣ್ಣ ಗಾಳಿಯೊಂದು ಬೀಸಿದೆ.

ಲೇಖನ : ಸಂಜಯ್ ಪುಲಿಪಾಕ, ಅಧ್ಯಕ್ಷರು, ಪೊಲಿಟಿಯಾ ರಿಸರ್ಚ್ ಫೌಂಡೇಶನ್.

(ಇಲ್ಲಿ ವ್ಯಕ್ತಪಡಿಸಿದ ಅಭಿಪ್ರಾಯಗಳು ಲೇಖಕರ ವೈಯಕ್ತಿಕ ಅಭಿಪ್ರಾಯಗಳಾಗಿವೆ.)

ಇದನ್ನೂ ಓದಿ : ಇರಾನ್​ ನೂತನ ಅಧ್ಯಕ್ಷರಾಗಿ ಪೆಜೆಶ್ಕಿಯಾನ್: ಆಂತರಿಕ, ಬಾಹ್ಯ ಪರಿಣಾಮಗಳೇನು? - New Iranian President