ನವದೆಹಲಿ: ಬಾಂಗ್ಲಾದೇಶದಲ್ಲಿ ಮತ್ತೆ ಹಿಂಸಾಚಾರ ಭುಗಿಲೆದ್ದಿದ್ದು, ಜನರ ಆಕ್ರೋಶಕ್ಕೆ ದೇಶದ ಸಂಸ್ಥಾಪಕರಾದ ಶೇಖ್ ಮುಜಿಬುರ್ ರೆಹಮಾನ್ ಅವರ ಮನೆ ಹೊತ್ತಿ ಉರಿದಿದೆ. ಇದಕ್ಕೆ ಕಾರಣ ದೇಶ ತೊರೆದು ಪಲಾಯನ ಮಾಡಿರುವ ಬಾಂಗ್ಲಾ ಮಾಜಿ ಪ್ರಧಾನಿ ಶೇಖ್ ಹಸೀನಾ ಮಾಡಿರುವ ಭಾಷಣವಾಗಿದೆ.
ಆನ್ಲೈನ್ ಮೂಲಕ ದೇಶವನ್ನು ಉದ್ದೇಶಿಸಿ ಶೇಖ್ ಹಸೀನಾ ಮಾತನಾಡುತ್ತಿದ್ದಂತೆ ಉದ್ರಿಕ್ತರಾದ ಪ್ರತಿಭಟನಾಕಾರರ ಗುಂಪು ಅವಾಮಿ ಲೀಗ್ ನಿಷೇಧಿಸುವಂತೆ ಒತ್ತಾಯಿಸಿ ಢಾಕಾದಲ್ಲಿ ಅವರ ತಂದೆ ಶೇಖ್ ಮುಜಿಬುರ್ ರೆಹಮಾನ್ ಸ್ಮಾರಣಾರ್ಥವಾಗಿ ಇರುವ ನಿವಾಸದ ಮೇಲೆ ದಾಳಿ ಮಾಡಿ ಬೆಂಕಿ ಹಚ್ಚಿದ್ದಾರೆ.
ಆಕ್ರೋಶಿತ ದಾಳಿಕೋರರ ಗುಂಪು ಧನ್ಮಂಡಿಯ 32ರಲ್ಲಿರುವ ರೆಹಮಾನ್ ಸ್ಮಾರಕ ನಿವಾಸದ ಗೇಟ್ ಮುರಿದು ಒಳ ಬಂದು ದಾಳಿಯನ್ನು ಆರಂಭಿಸಿದರು. ಕಟ್ಟಡದ ಮೇಲೆ ಹತ್ತಿ, ನಿವಾಸವನ್ನು ಧ್ವಂಸ ಮಾಡಿದ ಅವರು, ಮೇಲಿನ ಮಹಡಿಗೆ ಬೆಂಕಿ ಇಟ್ಟಿದ್ದಾರೆ.
ಅವಾಮಿ ಲೀಗ್‌ನಿಂದ ವಿಸರ್ಜಿಸಲ್ಪಟ್ಟ ವಿದ್ಯಾರ್ಥಿ ವಿಭಾಗ ಛತ್ರ ಲೀಗ್ ಆಯೋಜಿಸಿದ ಕಾರ್ಯಕ್ರಮದಲ್ಲಿ ಹಸೀನಾ ಅವರು ಭಾಷಣ ಮಾಡಿದ್ದರು. ಈ ವೇಳೆ ದೇಶದಲ್ಲಿರುವ ಪ್ರಸ್ತುತ ಆಡಳಿತದ ವಿರುದ್ಧ ಪ್ರತಿರೋಧಿಸಲು ಅವರು ದೇಶವಾಸಿಗಳಿಗೆ ಕರೆ ನೀಡಿದ್ದರು.
ಭಾಷಣದಲ್ಲಿ 'ಮುಹಮ್ಮದ್ ಯೂನಸ್ ಅವರ ಆಡಳಿತವೂ ವಿದ್ಯಾರ್ಥಿಗಳ ತಾರತಮ್ಯ ವಿರೋಧಿ ಚಳವಳಿಯಿಂದ ಸ್ಥಾಪನೆ ಮಾಡಲಾಗಿದೆ. ಅವರು ದೇಶದ ಧ್ವಜ, ಸಂವಿಧಾನ, ಲಕ್ಷಾಂತರ ಹುತಾತ್ಮರ ಜೀವನವನ್ನು ಬುಲ್ಡೋಜರ್ನಿಂದ ನಾಶ ಮಾಡುವ ಶಕ್ತಿ ಹೊಂದಿಲ್ಲ. ಅವರು ಕಟ್ಟಡಗಳನ್ನು ಧ್ವಂಸ ಮಾಡಬಹುದು. ಇತಿಹಾಸವನ್ನಲ್ಲ. ಆದರೆ, ಇತಿಹಾಸ ಇದರ ಪ್ರತೀಕಾರ ಪಡೆಯಲಿದೆ ಎಂಬುದು ನೆನಪಿರಲಿ' ಎಂದು ಹೇಳಿದ್ದರು.
ಬಾಂಗ್ಲಾದೇಶದ ಸ್ವಾತಂತ್ರ್ಯ ಪೂರ್ವದ ಚಳವಳಿಯಲ್ಲಿ ಶೇಖ್ ಮುಜಿಬುರ್ ರೆಹಮಾನ್ ಅವರು ದಶಕಗಳ ಕಾಲ ಚಳವಳಿಗೆ ಸಮಪರ್ಣೆಯ ಸಂಕೇತವಾಗಿ ಈ ನಿವಾಸವಿದೆ. ಆವಾಮಿ ಲೀಗ್ ಆಡಳಿತದಲ್ಲಿ ಈ ಮನೆಯನ್ನು ಮ್ಯೂಸಿಯಂ ಆಗಿ ಮಾರ್ಪಡಿಸಲಾಯಿತು. ದೇಶದ ವಿದೇಶಿ ಮುಖ್ಯಸ್ಥರು ಮತ್ತು ಗಣ್ಯರು ದೇಶದ ಶಿಷ್ಟಾಚಾರಕ್ಕೆ ಅನುಗುಣವಾಗಿ ಈ ಮನೆಗೆ ಭೇಟಿ ನೀಡುತ್ತಿದ್ದರು.
16 ವರ್ಷಗಳ ಶೇಖ್ ಹಸೀನಾ ಅವರ ಅವಾಮಿ ಲೀಗ್ ಆಡಳಿತದ ವಿರುದ್ಧ ಕಳೆದ ವರ್ಷ ಆಗಸ್ಟ್ನಲ್ಲಿ ಪ್ರತಿಭಟನೆಗಳು ಹೆಚ್ಚಾಗಿದ್ದರಿಂದ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿ, ಬಾಂಗ್ಲಾದೇಶದ ವಾಯುಪಡೆಯ ವಿಮಾನದ ಮೂಲಕ ಸಹೋದರಿ ಶೇಖ್ ರೆಹಾನಾ ಅವರೊಂದಿಗೆ ದೇಶ ತೊರೆದಿದ್ದರು. (ಐಎಎನ್ಎಸ್)
ಇದನ್ನೂ ಓದಿ: ಮಹಿಳಾ ಕ್ರೀಡೆಗಳಲ್ಲಿ ಟ್ರಾನ್ಸ್ಜೆಂಡರ್ಗಳು ಭಾಗವಹಿಸುವುದನ್ನು ನಿಷೇಧಿಸಿದ ಟ್ರಂಪ್: ಕಾರ್ಯಕಾರಿ ಆದೇಶಕ್ಕೆ ಸಹಿ
ಇದನ್ನೂ ಓದಿ:'ಅಮೆರಿಕ ಗಾಜಾ ಪಟ್ಟಿ ವಶಪಡಿಸಿಕೊಳ್ಳಲಿದೆ': ಮಧ್ಯಪ್ರಾಚ್ಯದಲ್ಲಿ ಸಂಚಲನ ಸೃಷ್ಟಿಸಿದ ಟ್ರಂಪ್ ಹೇಳಿಕೆ
