ಸುಮಾರು ಒಂಭತ್ತು ವರ್ಷಗಳ ಅಂತರದ ನಂತರ ಕನ್ನಡದ ಖ್ಯಾತ ನಟ-ನಿರ್ದೇಶಕ ಉಪೇಂದ್ರ ಡೈರೆಕ್ಷನ್ ಮತ್ತು ನಟನೆಯ ಹೊಸ ಸಿನಿಮಾ ಕಳೆದ ವಾರ ತೆರೆಗಪ್ಪಳಿಸಿತು. ತಮ್ಮ ಹಿಂದಿನ ಕೆಲಸಗಳಂತೆಯೇ ಅನಿರೀಕ್ಷಿತ ಕಥಾಹಂದರದೊಂದಿಗೆ ಉಪ್ಪಿ ಮರಳಿದ್ದಾರೆ. ಬುದ್ಧಿವಂತ ನಿರ್ದೇಶಿಸಿದ್ದಲ್ಲದೇ ಮುಖ್ಯಪಾತ್ರಕ್ಕೆ ಜೀವ ತುಂಬಿರುವ 'ಯುಐ' ಸಿನಿಮಾ ತನ್ನ ಕಥಾಹಂದರ, ಕಥೆ ಹೇಳುವಿಕೆ ಮತ್ತು ನೂತನ ಪ್ರಯೋಗದಿಂದಾಗಿ ಸಖತ್ ಸದ್ದು ಮಾಡಿದೆ. ವಿಭಿನ್ನ ಕಥೆಗಳುಳ್ಳ ಚಿತ್ರಗಳಿಗೆ ಹೆಸರುವಾಸಿಯಾಗಿರುವ ಉಪೇಂದ್ರ ಎಂದಿನಂತೆ ಈ ಪ್ರಾಜೆಕ್ಟ್ನಲ್ಲೂ ತಮ್ಮ ಸಿಗ್ನೇಚರ್ ಸ್ಟೈಲ್‌ಗೆ ಬದ್ಧರಾಗಿದ್ದಾರೆ. ನಿರೀಕ್ಷಿಸಿದಂತೆ 'ಯುಐ' ಪ್ರೇಕ್ಷಕರಿಗೆ ರೋಮಾಂಚನಕಾರಿ ಮತ್ತು ಅದ್ಭುತ ಸಿನಿಮೀಯ ಅನುಭವ ಒದಗಿಸುವಲ್ಲಿ ಯಶಸ್ಸು ಕಂಡಿದೆ.
'ಯುಐ'ಗೆ ಪ್ರೇಕ್ಷಕರ ಸಂಖ್ಯೆ ಇಳಿಕೆಯಾಗಿಲ್ಲ: ಪುಷ್ಪ 2: ದಿ ರೂಲ್, ಮುಫಾಸಾ: ದಿ ಲಯನ್ ಕಿಂಗ್ ಮತ್ತು ವಿದುತಲೈ 2ನಂತಹ ಸಿನಿಮಾಗಳು ಚಿತ್ರಮಂದಿರದಲ್ಲಿ ಪ್ರದರ್ಶನ ಮುಂದುವರಿಸಿವೆ. ಇಂದು ಅಭಿನಯ ಚಕ್ರವರ್ತಿ ಸುದೀಪ್ ಮುಖ್ಯಭೂಮಿಕೆಯ ಮ್ಯಾಕ್ಸ್, ಮತ್ತು ಬಾಲಿವುಡ್ ಸೂಪರ್ ಸ್ಟಾರ್ ವರುಣ್ ಧವನ್, ರಾಷ್ಟ್ರಪ್ರಶಸ್ತಿ ವಿಜೇತ ನಟಿ ಕೀರ್ತಿ ಸುರೇಶ್ ನಟನೆಯ ಬೇಬಿ ಜಾನ್ ಬಿಡುಗಡೆ ಆಗಿವೆ. ಈ ಎಲ್ಲಾ ಸಿನಿಮಾಗಳ ನಡುವೆ ಬುದ್ಧಿವಂತಹ ಯುಐ ಉತ್ತಮ ಪ್ರದರ್ಶನ ಮುಂದುವರಿಸಿದೆ. ಬಹುನಿರೀಕ್ಷಿತ ಚಿತ್ರಗಳ ಭಾರಿ ಸ್ಪರ್ಧೆಯ ಹೊರತಾಗಿಯೂ, ಯುಐ ಪ್ರೇಕ್ಷಕರ ಸಂಖ್ಯೆ ಇಳಿಕೆಯಾಗಿಲ್ಲ. ವಿಭಿನ್ನ ಸಿನಿಮಾದ ಬಾಕ್ಸ್ ಆಫೀಸ್ ಪ್ರಯಾಣ ಉತ್ತಮವಾಗಿದೆ.
ಯುಐ ಬಾಕ್ಸ್ ಆಫೀಸ್ ಕಲೆಕ್ಷನ್: ಉಪೇಂದ್ರ ಅವರು ನಟಿಸಿ, ನಿರ್ದೇಶಿಸಿರುವ 'ಯುಐ' ಸಿನಿಮಾದ ಒಟ್ಟು ಇಂಡಿಯಾ ನೆಟ್ ಕಲೆಕ್ಷನ್ 23.33 ಕೋಟಿ ರೂಪಾಯಿ ಆಗಿದೆ. ಕಳೆದ ಶುಕ್ರವಾರ, ಡಿಸೆಂಬರ್ 20ರಂದು ಅದ್ಧೂರಿಯಾಗಿ ಚಿತ್ರಮಂದಿರ ಪ್ರವೇಶಿಸಿದ ಸಿನಿಮಾ 6.95 ಕೋಟಿ ರೂಪಾಯಿ ಕಲೆಕ್ಷನ್ನೊಂದಿಗೆ ತನ್ನ ಬಾಕ್ಸ್ ಆಫೀಸ್ ಪ್ರಯಾಣ ಪ್ರಾರಂಭಿಸಿತು. ನಂತರ, ತನ್ನ ಮೊದಲ ವಾರಾಂತ್ಯ ಶನಿವಾರದಂದು 5.6 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿತು. ಮೊದಲ ಭಾನುವಾರದ ವ್ಯವಹಾರ 5.95 ಕೋಟಿ ರೂಪಾಯಿ. ನಂತರ, ಚಿತ್ರ ತನ್ನ ಮೊದಲ ಸೋಮವಾರದಂದು 2.3 ಕೋಟಿ ರೂಪಾಯಿ, ಕಳೆದ ದಿನ ಮಂಗಳವಾರ 1.99 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಇಂದಿನ ಕಲೆಕ್ಷನ್ ಪೂರ್ಣ ಮಾಹಿತಿ ಸಿಗಬೇಕಿದೆ. ಈ ಅಂಕಿಅಂಶ ಸಿನಿಮಾ ಇಂಡಸ್ಟ್ರಿ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ವರದಿಯನ್ನು ಆಧರಿಸಿದ್ದು, ಸಿನಿಪ್ರಿಯರು ಚಿತ್ರತಂಡದಿಂದ ಮಾಹಿತಿ ನಿರೀಕ್ಷಿಸಿದ್ದಾರೆ.