ರಾಜ್ಕುಮಾರ್ ರಾವ್ ಹಾಗೂ ಶ್ರದ್ಧಾ ಕಪೂರ್ ಮುಖ್ಯಭೂಮಿಕೆಯ ಹಾರರ್ - ಕಾಮಿಡಿ ಸಿನಿಮಾ ಸ್ತ್ರೀ ಸೀಕ್ವೆಲ್ ಬಿಡುಗಡೆಗೆ ಸಜ್ಜಾಗಿದೆ. ಈ ಸಾಲಿನ ಬಹು ನಿರೀಕ್ಷಿತ ಚಿತ್ರಗಳಲ್ಲಿ ಒಂದಾದ 'ಸ್ತ್ರೀ 2'ರ ಟ್ರೇಲರ್ ಅನ್ನು ಇಂದು ಅನಾವರಣಗೊಳಿಸಲಾಗಿದೆ. ಮಧ್ಯಪ್ರದೇಶದ ಚಂದೇರಿಯಲ್ಲಿ ಸ್ತ್ರೀ ಸ್ಟೋರಿ ಸಾಗಲಿದ್ದು, ಪ್ರೇಕ್ಷಕರು ಸಿನಿಮಾ ವೀಕ್ಷಿಸುವ ಕಾತರ ವ್ಯಕ್ತಪಡಿಸಿದ್ದಾರೆ.
ಸ್ತ್ರೀ ಪುರುಷರನ್ನು ಹೆದರಿಸೋದನ್ನು ಮುಂದುವರಿಸಿದ್ದು, ಇದೊಂದು ಹಾರರ್ ಕಾಮಿಡಿ ಸಿನಿಮಾವಾಗಿದೆ. ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ನಲ್ಲಿ ಟ್ರೇಲರ್ ಹಂಚಿಕೊಂಡ ನಾಯಕ ನಟಿ ಶ್ರದ್ಧಾ ಕಪೂರ್, "ಯೇ ರಹಾ ಟ್ರೇಲರ್, ಭಾರತದ ಬಹು ನಿರೀಕ್ಷಿತ ಗ್ಯಾಂಗ್ ಚಂದೇರಿಯ ಆತಂಕದ ವಿರುದ್ಧ ಹೋರಾಡಲು ಮರಳಿದೆ. ಈ ವರ್ಷದ ಅತಿದೊಡ್ಡ ಹಾರರ್-ಕಾಮಿಡಿ ಸಿನಿಮಾ ವೀಕ್ಷಿಸಲು ಸಿದ್ಧರಾಗಿ. ಸ್ತ್ರೀ 2 ಟ್ರೇಲರ್ ರಿಲೀಸ್ ಆಗಿದೆ. 2024ರ ಆಗಸ್ಟ್ 15ರ ಸ್ವಾತಂತ್ರ್ಯ ದಿನದಂದು ಲೆಜೆಂಡ್ ಹಿಂತಿರುಗಲಿದ್ದಾರೆ'' ಎಂದು ಬರೆದುಕೊಂಡಿದ್ದಾರೆ.
ಚಿತ್ರದ ಮೊದಲ ಭಾಗದ ಕೊನೆ ಕ್ಷಣದ ವಿಚಾರದಿಂದ ಸೀಕ್ವೆಲ್ನ ಟ್ರೇಲರ್ ಶುರುವಾಗಲಿದೆ. ಮೊದಲ ಭಾಗ ಯಶ ಕಂಡಿದ್ದ ಹಿನ್ನೆಲೆ ಮತ್ತೊಂದು ಭಾಗದ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ. ಅದಕ್ಕೆ ತಕ್ಕಂತೆ ಟ್ರೇಲರ್ ಮೂಡಿ ಬಂದಿದೆ.
ಚಿತ್ರ ನಿರ್ಮಾಪಕರು ಈವರೆಗೆ ಪೋಸ್ಟರ್‌ಗಳ ಮೂಲಕ ಅಭಿಮಾನಿಗಳ ಕುತೂಹಲ ಕೆರಳಿಸಿದ್ದರು. ಸೀಕ್ವೆಲ್ನ ಒಂದು ನೋಟಕ್ಕಾಗಿ ಅಭಿಮಾನಿಗಳು ಚಿತ್ರದ ಟ್ರೇಲರ್ ಬಿಡುಗಡೆಗಾಗಿ ಎದುರು ನೋಡುತ್ತಿದ್ದರು. ಫೈನಲಿ ಟ್ರೇಲರ್ ಇಂದು ಅನಾವರಣಗೊಂಡಿದೆ. ಟ್ರೇಲರ್ಗೆ ಪ್ರತಿಕ್ರಿಯಿಸಿದ ಅಭಿಮಾನಿಯೊಬ್ಬರು, "ಓ ಸ್ತ್ರೀ ಆಗಸ್ಟ್ 15ರ ವರೆಗೆ ಕಾಯಲು ಸಾಧ್ಯವಿಲ್ಲ" ಎಂದು ತಿಳಿಸಿದ್ದಾರೆ. ಮತ್ತೊಬ್ಬರು ಕಾಮೆಂಟ್ ಮಾಡಿ "ಈ ಸಿನಿಮಾ ನಮ್ಮ ನಿರೀಕ್ಷೆಗಳನ್ನು ಮೀರಲಿದೆ" ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಉಳಿದಂತೆ ಟ್ರೇಲರ್ಗೆ ಬಹುತೇಕ ಮೆಚ್ಚುಗೆ ವ್ಯಕ್ತವಾಗಿದೆ.
ಇದನ್ನೂ ಓದಿ:76ನೇ ಎಮ್ಮಿ ಅವಾರ್ಡ್ಸ್: ದಿನಾಂಕ, ಸ್ಥಳ, ನಾಮನಿರ್ದೇಶನದ ಪಟ್ಟಿ ಬಿಡುಗಡೆ - Emmy Awards 2024
ಶ್ರದ್ಧಾ ಕಪೂರ್ ಮತ್ತು ರಾಜ್ಕುಮಾರ್ ರಾವ್ ಜೊತೆಗೆ, ಅಭಿಷೇಕ್ ಬ್ಯಾನರ್ಜಿ, ಪಂಕಜ್ ತ್ರಿಪಾಠಿ, ಅಪರಶಕ್ತಿ ಖುರಾನಾ ಸೇರಿದಂತೆ ಹಲವರು ಚಿತ್ರದಲ್ಲಿ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಅಮರ್ ಕೌಶಿಕ್ ಆ್ಯಕ್ಷನ್ ಕಟ್ ಹೇಳಿರುವ ಈ ಬಹುನಿರೀಕ್ಷಿತ ಸಿನಿಮಾ ಈ ಸಾಲಿನ ಸ್ವಾತಂತ್ರ್ಯ ದಿನ - ಆಗಸ್ಟ್ 15 ರಂದು ತೆರೆ ಕಾಣಲಿದೆ. 2018ರಲ್ಲಿ ಬಂದ ಮೊದಲ ಭಾಗದಲ್ಲೂ ರಾಜ್ಕುಮಾರ್ ಮತ್ತು ಶ್ರದ್ಧಾ ಪ್ರಮುಖ ಪಾತ್ರ ನಿರ್ವಹಿಸಿದ್ದರು. ಈ ಚಿತ್ರವನ್ನು ದಿನೇಶ್ ವಿಜನ್ ಒಡೆತನದ ಮ್ಯಾಡಾಕ್ ಫಿಲ್ಮ್ಸ್ ನಿರ್ಮಾಣ ಮಾಡಿದೆ.
ಇದನ್ನೂ ಓದಿ:ಆರೋಗ್ಯದಲ್ಲಿ ಏರುಪೇರು: ಆಸ್ಪತ್ರೆಗೆ ದಾಖಲಾದ ಬಾಲಿವುಡ್ ನಟಿ ಜಾಹ್ನವಿ ಕಪೂರ್ - Janhvi Kapoor Hospitalised
