ಶೀಘ್ರದಲ್ಲೇ ಹಸೆಮಣೆ ಏರಲಿರುವ ನಟಿ ರಾಕುಲ್ ಪ್ರೀತ್ ಸಿಂಗ್ ಮತ್ತು ನಿರ್ಮಾಪಕ ಜಾಕಿ ಭಗ್ನಾನಿ ಇಂದು ಮುಂಬೈನ ಸಿದ್ಧಿವಿನಾಯಕ ದೇವಸ್ಥಾನದಲ್ಲಿ ಕಾಣಿಸಿಕೊಂಡರು. ಫೆಬ್ರವರಿ 21 ರಂದು ಗೋವಾದಲ್ಲಿ ಅದ್ಧೂರಿ ವಿವಾಹ ಸಮಾರಂಭ ನಡೆಯಲಿದ್ದು, ಅದಕ್ಕೂ ಮುನ್ನ ಮುಂಬೈನ ಪ್ರಸಿದ್ಧ ಗಣೇಶ ದೇವಸ್ಥಾನಕ್ಕೆ ಭೇಟಿ ಕೊಟ್ಟು, ಪೂಜೆ ಸಲ್ಲಿಸಿದ್ದಾರೆ.
ಇನ್‌ಸ್ಟಾಗ್ರಾಮ್‌ನಲ್ಲಿ ಪಾಪರಾಜಿಗಳು ಹಂಚಿಕೊಂಡ ವಿಡಿಯೋಗಳಲ್ಲಿ, ರಾಕುಲ್ ಪ್ರೀತ್ ಸಿಂಗ್ ಮತ್ತು ಜಾಕಿ ಭಗ್ನಾನಿ ಸಾಂಪ್ರದಾಯಿಕ ಉಡುಗೆ ಧರಿಸಿ ಸಿದ್ಧಿವಿನಾಯಕ ದೇವಾಲಯಕ್ಕೆ ಆಗಮಿಸುತ್ತಿರುವುದನ್ನು ಕಾಣಬಹುದು. ರಾಕುಲ್ ಪಿಂಕ್ ಅನಾರ್ಕಲಿ ಸೂಟ್ ಧರಿಸಿದ್ದರೆ, ಜಾಕಿ ಹಸಿರು ಕುರ್ತಾದಲ್ಲಿ ಕಾಣಿಸಿಕೊಂಡರು. ಪಾಪರಾಜಿಗಳ ಕ್ಯಾಮರಾಗಳಿಗೆ ಪೋಸ್ ಕೊಟ್ಟು ಮುನ್ನಡೆದರು.
ಈ ವಾರದ ಆರಂಭದಲ್ಲಿ ರಾಕುಲ್ ಮತ್ತು ಜಾಕಿ ಅವರ ವಿವಾಹ ಪೂರ್ವ ಕಾರ್ಯಕ್ರಮಗಳು ಆರಂಭಗೊಂಡವು. ಮದುವೆ ಮುನ್ನದ ಸಂಭ್ರಮಾಚರಣೆಗೆ, ಮುಂಬೈನಲ್ಲಿರುವ ಜಾಕಿ ಭಗ್ನಾನಿ ಅವರ ಮನೆಯಲ್ಲಿ ವಧು-ವರರು ತಮ್ಮ ಕುಟುಂಬದೊಂದಿಗೆ ಸಾಕ್ಷಿಯಾದರು. ವರದಿಗಳ ಪ್ರಕಾರ, ಬಾಲಿವುಡ್ನ ಈ ಪ್ರೇಮಪಕ್ಷಿಗಳು ಪರಿಸರ ಸ್ನೇಹಿ ವಿವಾಹ ಆಚರಣೆಯ ಗುರಿಯನ್ನು ಹೊಂದಿದ್ದಾರೆ. ಅದರ ಭಾಗವಾಗಿ, ಕಾಗದ ತ್ಯಾಜ್ಯವನ್ನು ನಿಯಂತ್ರಿಸಲು ಡಿಜಿಟಲ್ ಇನ್ವಿಟೇಶನ್, ಪಟಾಕಿಗಳ ನಿಷೇಧ ಮತ್ತು ಮರಗಳನ್ನು ನೆಡುವ ಯೋಜನೆ ಹಾಕಿಕೊಂಡಿದ್ದಾರೆ. ಫೆಬ್ರವರಿ 19 ರಂದು ಪ್ರಾರಂಭವಾಗುವ ಮೂರು ದಿನಗಳ ವಿವಾಹ ಸಮಾರಂಭ ಫೆಬ್ರವರಿ 21 ರಂದು ಮುಕ್ತಾಯಗೊಳ್ಳಲಿದೆ. ಬುಧವಾರ ವಿವಾಹದ ಮುಖ್ಯ ಶಾಸ್ತ್ರ ನಿರವೇರಲಿದೆ. ಮದುವೆಯ ನಂತರ, ದಂಪತಿ ಮರ ನೆಡುವ ಪ್ರಯತ್ನದಲ್ಲಿ ಕೈ ಜೋಡಿಸಲಿದ್ದಾರೆ.