ಸೌತ್ ಸೂಪರ್ ಸ್ಟಾರ್ ಕಮಲ್ ಹಾಸನ್ ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಚಿತ್ರ 'ಇಂಡಿಯನ್ 2'. ಮುಂದಿನ ತಿಂಗಳು ಚಿತ್ರಮಂದಿರಗಳಲ್ಲಿ ಅದ್ಧೂರಿಯಾಗಿ ಬಿಡುಗಡೆಯಾಗಲಿದ್ದು, ಈ ಸೀಕ್ವೆಲ್ ಬ್ಲಾಕ್ ಬಸ್ಟರ್ ಹಿಟ್ ಆಗುವ ನಿರೀಕ್ಷೆಯಿದೆ. ಸಿನಿಪ್ರಿಯರ ಗಮನ ಸೆಳೆಯೋ ನಿಟ್ಟಿನಲ್ಲಿ, ಚಿತ್ರದ ಪ್ರಚಾರ ಸಾಗಿದೆ. ಚಿತ್ರತಂಡ ಈವರೆಗೆ ನಿಯಮಿತ ಅಪ್ಡೇಟ್ಸ್ ಒದಗಿಸಿತ್ತು.
ಇಂದು, ಅದ್ಧೂರಿ ಪ್ರಮೋಶನ್ ಸಲುವಾಗಿ ಇಂಡಿಯನ್ 2 ಟ್ರೇಲರ್ ಅನ್ನು ಚೆನ್ನೈನ ಥಿಯೇಟರ್ನಲ್ಲಿ ಪ್ರದರ್ಶಿಸಲಾಯಿತು. ಟ್ರೇಲರ್ ಬಹುತೇಕ ಉತ್ತಮ ಪ್ರತಿಕ್ರಿಯೆ ಸ್ವೀಕರಿಸಿದೆ. ಚಿತ್ರಮಂದಿರದಲ್ಲಿ ಟ್ರೇಲರ್ ವೀಕ್ಷಿಸಿದವರು ಎಕ್ಸ್ ಸೇರಿದಂತೆ ವಿವಿಧ ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ನಲ್ಲಿ ತಮ್ಮ ಅಭಿಪ್ರಾಯ ಹಂಚಿಕೊಳ್ಳುತ್ತಿದ್ದಾರೆ.
ಇಂಡಿಯನ್ 2 ಟ್ರೇಲರ್ ಭಾಗಶಃ ಬಿಡುಗಡೆಯಾಗಿದೆ. ಸೋಷಿಯಲ್ ಮೀಡಿಯಾದಲ್ಲಿ ಇನ್ನಷ್ಟೇ ತೆರೆಗಪ್ಪಳಿಸಬೇಕಿದೆ. ಚಿತ್ರಮಂದಿರದಲ್ಲಿ ಟ್ರೇಲರ್ ವೀಕ್ಷಿಸಿದವರ ಪೈಕಿ ಹೆಚ್ಚಿನವರು ತಮ್ಮ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಎರಡು ನಿಮಿಷಗಳ ವಿಡಿಯೋದಲ್ಲಿ ಕೆಲ ಸರ್ಕಾರಿ ಅಧಿಕಾರಿಗಳು ಸಾರ್ವಜನಿಕರಲ್ಲಿ ಹೇಗೆ ಲಂಚ ಕೇಳುತ್ತಾರೆ ಎಂಬುದನ್ನು ತೋರಿಸಲಾಗಿದೆ.
ಟ್ರೇಲರ್ ಸೋಷಿಯಲ್ ಮೀಡಿಯಾದಲ್ಲಿ ಇಂದು ಸಂಜೆ 7 ಗಂಟೆಗೆ ಬಿಡುಗಡೆಯಾಗಲಿದೆ. ಸಿನಿಮಾ ಬಿಡುಗಡೆಗೆ ಇನ್ನೆರಡು ವಾರಗಳಿದ್ದು, ಪ್ರಚಾರದ ವಿಡಿಯೋಗೆ ಸಿಕ್ಕಿರುವ ಸಕಾರಾತ್ಮಕ ಪ್ರತಿಕ್ರಿಯೆ ಸಿನಿಮಾಗೆ ಪ್ಲಸ್ ಪಾಯಿಂಟ್ ಆಗಿ ಕೆಲಸ ಮಾಡಲಿದೆ ಅನ್ನೋ ಭರವಸೆ ಚಿತ್ರತಂಡದ್ದು.
'ಇಂಡಿಯನ್ 2', 1996ರ 'ಇಂಡಿಯನ್' ಚಿತ್ರದ ಮುಂದುವರಿದ ಭಾಗ. ಲೈಕಾ ಪ್ರೊಡಕ್ಷನ್ಸ್ ಮತ್ತು ರೆಡ್ ಜೈಂಟ್ ಮೂವೀಸ್ ಬಂಡವಾಳ ಹೂಡಿರೋ ಈ ಚಿತ್ರದಲ್ಲಿ ಕಮಲ್ ಹಾಸನ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಭ್ರಷ್ಟಾಚಾರದ ವಿರುದ್ಧ ಹೋರಾಡುವ ಸೇನಾಪತಿಯಾಗಿ ಮರಳಲಿದ್ದಾರೆ. ಎರಡು ದಶಕಗಳ ನಂತರ ನಿರ್ದೇಶಕ ಶಂಕರ್ ಮತ್ತು ನಟ ಕಮಲ್ ಹಾಸನ್ ಮತ್ತೆ ಒಂದಾಗಿರುವ ಈ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ.
ಇದನ್ನೂ ಓದಿ:ಪ್ರಭಾಸ್ 'ಕಲ್ಕಿ' ಚಿತ್ರದ 'ಬುಜ್ಜಿ' ವಾಹನವನ್ನೇರಿದ ಡಿವೈನ್ ಸ್ಟಾರ್ ರಿಷಬ್ ಶೆಟ್ಟಿ - Rishab Shetty rides Bujji
ಕಥೆ ಮತ್ತು ನಾಯಕ ನಟ ಕಮಲ್ ಹಾಸನ್ ಅವರ ನೋಟ ಚಿತ್ರದ ಹೈಲೈಟ್ಸ್ ಎಂದೇ ಹೇಳಬಹುದು. ಬರೋಬ್ಬರಿ 28 ವರ್ಷಗಳ ಬಳಿಕ ಸೀಕ್ವೆಲ್ ಬರುತ್ತಿದ್ದು, ಗುರುತು ಸಿಗಲಾರದಷ್ಟು ವಿಭಿನ್ನ ನೋಟದಲ್ಲಿ, ವಯಸ್ಸಾದ ಪಾತ್ರದಲ್ಲಿ ಕಮಲ್ ಹಾಸನ್ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಸುಳಿವನ್ನು ಈಗಾಗಲೇ ಅನಾವರಣಗೊಂಡಿರುವ ಪೋಸ್ಟರ್ಗಳು ಬಿಟ್ಟುಕೊಟ್ಟಿವೆ.
ಇದನ್ನೂ ಓದಿ:'ಭಾರತದ ಕರಾಳ ಅಧ್ಯಾಯ': 'ಎಮರ್ಜೆನ್ಸಿ'ಗಿಲ್ಲ ಶೀಘ್ರ ಬಿಡುಗಡೆ ಭಾಗ್ಯ, ಮತ್ತೆ ಸಿನಿಮಾ ಮುಂದೂಡಿದ ಕಂಗನಾ - Emergency New Release Date
ಬಹುನಿರೀಕ್ಷಿತ ಸೀಕ್ವೆಲ್ ಶೂಟಿಂಗ್ಗೆ ಬಹಳ ಸಮಯ ಹಿಡಿದಿದೆ. ಅಂತಿಮವಾಗಿ ಚಿತ್ರಮಂದಿರಗಳಲ್ಲಿ ತೆರೆಕಾಣಲು ಸಜ್ಜಾಗಿದ್ದು, ಬಾಕ್ಸ್ ಆಫೀಸ್ ದಾಖಲೆಗಳನ್ನು ಪುಡಿಗಟ್ಟುವ ನಿರೀಕ್ಷೆಯಿದೆ. ಚಿತ್ರ ತಮಿಳು, ತೆಲುಗು ಮತ್ತು ಹಿಂದಿಯಲ್ಲಿ ಬಿಡುಗಡೆಯಾಗಲಿದೆ. ಮೂರನೇ ಭಾಗ ಕೆಲ ತಿಂಗಳುಗಳ ನಂತರ ತೆರೆಗಪ್ಪಳಿಸಲಿದೆ.
