ಭಾರತೀಯ ಚಿತ್ರರಂಗದ ಅತ್ಯಂತ ಜನಪ್ರಿಯ ನಟ ಕಮಲ್ ಹಾಸನ್ ಹಾಗೂ ಹೆಸರಾಂತ ನಿರ್ದೇಶಕ ಮಣಿರತ್ನಂ ಕಾಂಬಿನೇಶನ್ನ ಬಹುನಿರೀಕ್ಷಿತ ಚಿತ್ರ 'ಥಗ್ ಲೈಫ್‌'. ಚಿತ್ರದಲ್ಲಿ ಜಯಂ ರವಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗಿತ್ತು. ಆದ್ರೀಗ ಈ ಪಾತ್ರಕ್ಕೆ ಅರವಿಂದ್ ಸ್ವಾಮಿ ಬರುವ ಸಾಧ್ಯತೆಗಳಿವೆ.
ಬಹುನಿರೀಕ್ಷಿತ 'ಥಗ್ ಲೈಫ್‌'ನ ಚಿತ್ರೀಕರಣ ಜನವರಿಯಲ್ಲಿ ಪ್ರಾರಂಭವಾಯಿತು. ಆದ್ರೆ, ಕಮಲ್ ಹಾಸನ್ ಅವರ ರಾಜಕೀಯ ಬದ್ಧತೆ ಹಿನ್ನೆಲೆ ಹಿನ್ನೆಡೆಯಾಗಿದೆ. ಚಿತ್ರೀಕರಣ ವಿಳಂಬ ಪರಿಣಾಮ, ದುಲ್ಕರ್ ಸಲ್ಮಾನ್ ಮತ್ತು ಜಯಂ ರವಿ ಚಿತ್ರದಿಂದ ಹೊರಬಂದಿದ್ದಾರೆ.
ಮಣಿರತ್ನಂ ನಿರ್ದೇಶನದ ಸಿನಿಮಾ ಸುತ್ತಲಿರುವ ಸದ್ಯದ ಮಾಹಿತಿ ಪ್ರಕಾರ, ಥಗ್ ಲೈಫ್‌ನಲ್ಲಿನ ಜಯಂ ರವಿ ಸ್ಥಾನಕ್ಕೆ ಅರವಿಂದ್ ಸ್ವಾಮಿ ಅವರನ್ನು ಕರೆತರಲಾಗಿದೆ. ಆರಂಭದಲ್ಲಿ, ಅರುಣ್ ವಿಜಯ್ ಈ ಚಿತ್ರದ ಭಾಗವಾಗಲಿದ್ದಾರೆ ಎಂದು ಊಹಿಸಲಾಯ್ತು. ಆದ್ರೆ ಲೇಟೆಸ್ಟ್ ಅಪ್ಟೇಟ್ಸ್ ಬೇರೆಯದ್ದೇ ಸೂಚಿಸಿದೆ. ಆದಾಗ್ಯೂ, ಚಿತ್ರತಂಡದಿಂದ ಅಧಿಕೃತ ಮಾಹಿತಿ ನಿರೀಕ್ಷಿಸಲಾಗಿದೆ.
ಥಗ್ ಲೈಫ್‌ನ ಮುಂದಿನ ಶೂಟಿಂಗ್ ಸೆರ್ಬಿಯಾದಲ್ಲಿ ನಡೆಯಲಿದೆ. ಇದೇ ಏಪ್ರಿಲ್ ಅಂತ್ಯದ ವೇಳೆಗೆ ಚಿತ್ರೀಕರಣದ ಮುಂದಿನ ಹಂತ ಪ್ರಾರಂಭವಾಗಲಿದೆ. ಈ ನಿರ್ಣಾಯಕ ಹಂತದಲ್ಲಿ ಪ್ರಮುಖ ನಟರು ಭಾಗಿಯಾಗಲಿದ್ದಾರೆ. ಇಲ್ಲಿ ಚಿತ್ರದ ನಟರು ಅಂತಿಮವಾಗೋ ಸಾಧ್ಯತೆ ಇದೆ. ಥಗ್ ಲೈಫ್‌ ಪೀರಿಯಾಡಿಕಲ್ ಆ್ಯಕ್ಷನ್ ಡ್ರಾಮಾ ಎಂದು ಹೇಳಲಾಗಿದೆ. ಕಮಲ್ ಹಾಸನ್ ಮೂರು ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ವರದಿಯಾಗಿದೆ.
ಅರವಿಂದ್ ಸ್ವಾಮಿ ಅವರು ಮಣಿರತ್ನಂ ಅವರ 1991ರ ಚಿತ್ರ 'ದಳಪತಿ'ಯಲ್ಲಿ ನಟಿಸಿದ್ದರು. ರಜನಿಕಾಂತ್ ಮುಖ್ಯಭೂಮಿಕೆಯ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ನಂತರ ಬಾಂಬೆ ಮತ್ತು ರೋಜಾದಂತಹ ಹಿಟ್ ಸಿನಿಮಾದಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು. ಇದೀಗ ಕಮಲ್ ಹಾಸನ್ ಮುಖ್ಯಭೂಮಿಕೆಯ 'ಥಗ್ ಲೈಫ್‌' ಚಿತ್ರದ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ:ಕಮಲ್ ಹಾಸನ್ರ 'ಥಗ್ ಲೈಫ್‌'ನಿಂದ ಹೊರಬಂದ ದುಲ್ಕರ್ ಸಲ್ಮಾನ್!
ಮತ್ತೊಂದೆಡೆ, ಸಿಲಂಬರಸನ್ ಅವರು ದುಲ್ಕರ್ ಸಲ್ಮಾನ್ ಅವರ ಪಾತ್ರಕ್ಕೆ ಬರಲಿದ್ದಾರೆ ಎಂದು ಕೂಡ ಹೇಳಲಾಗಿದೆ. ಆದಾಗ್ಯೂ, ಯಾವುದನ್ನೂ ಇನ್ನೂ ಅಂತಿಮಗೊಳಿಸಲಾಗಿಲ್ಲ. ಪಾತ್ರವರ್ಗದಲ್ಲಿನ ಸಂಭಾವ್ಯ ಬದಲಾವಣೆ ಪ್ರಕ್ರಿಯೆ ಮುಂದುವರಿದಿದೆ. ಅಭಿಮಾನಿಗಳು ಅಧಿಕೃತ ಮಾಹಿತಿಗಾಗಿ ಕಾಯುತ್ತಿದ್ದಾರೆ.
ಇದನ್ನೂ ಓದಿ:ಅಜಯ್ ದೇವ್ಗನ್ ಜನ್ಮದಿನ: 'ಮೈದಾನ್' ಟ್ರೇಲರ್ ರಿಲೀಸ್; ಮುಂದಿನ ಚಿತ್ರಗಳಾವುವು ಗೊತ್ತೇ? - Maidaan Trailer
ಈಗಾಗಲೇ ಒಂದಿಷ್ಟು ಚಿತ್ರೀಕರಣ ನಡೆದಿದೆ. ಕಮಲ್ ಹಾಸನ್ ಜೊತೆ ಜೋಜು ಜಾರ್ಜ್, ಅಭಿರಾಮಿ ಸಾಹಸ ದೃಶ್ಯಗಳಲ್ಲಿ ಭಾಗಿಯಾಗಿದ್ದಾರೆ. ಚಿತ್ರದಲ್ಲಿ ತ್ರಿಶಾ, ಐಶ್ವರ್ಯ ಲಕ್ಷ್ಮಿ, ಗೌತಮ್ ಕಾರ್ತಿಕ್ ಸೇರಿ ಅನೇಕರು ಕಾಣಿಸಿಕೊಳ್ಳಲಿದ್ದಾರೆ. ಮಣಿರತ್ನಂ ಬರೆದು ನಿರ್ದೇಶಿಸುತ್ತಿರುವ ಈ ಚಿತ್ರಕ್ಕೆ ಎ.ಆರ್.ರೆಹಮಾನ್ ಸಂಗೀತ ಸಂಯೋಜಿಸುತ್ತಿದ್ದಾರೆ. ರವಿ ಕೆ.ಚಂದ್ರನ್ ಕ್ಯಾಮರಾ ಕೈಚಳಕವಿರಲಿದೆ. ಶ್ರೀಕರ್ ಪ್ರಸಾದ್ ಸಂಕಲನ ನಿರ್ವಹಿಸಲಿದ್ದಾರೆ.
