ಜುಕರ್​ಬರ್ಗ್​ ಈಗ ವಿಶ್ವದ ಐದನೇ ಶ್ರೀಮಂತ.. ಹೇಗೆ ಗೊತ್ತಾ?

ಮೆಟಾ ಕಂಪನಿ ಷೇರುಗಳ ಬೆಲೆಯಲ್ಲಿ ಭಾರಿ ಏರಿಕೆ ಕಂಡು ಬಂದಿರುವ ಹಿನ್ನೆಲೆಯಲ್ಲಿ ಜುಕರ್​ಬರ್ಗ್​ ಅವರ ಸಂಪತ್ತಿನಲ್ಲಿ ಭಾರಿ ಏರಿಕೆ ಕಂಡು ಬಂದಿದೆ. ಹೀಗಾಗಿ ಅವರು ಈಗ ವಿಶ್ವದ 5ನೇ ಶ್ರೀಮಂತ ಎಂಬ ಗರಿಮೆಗೂ ಪಾತ್ರರಾಗಿದ್ದಾರೆ.

ನ್ಯೂಯಾರ್ಕ್( ಅಮೆರಿಕ): ಮೆಟಾ ಪ್ಲಾಟ್‌ಫಾರ್ಮ್‌ಗಳ ಸಿಇಒ ಮಾರ್ಕ್ ಜುಕರ್‌ಬರ್ಗ್ ಈಗ ವಿಶ್ವದ ಐದನೇ ಶ್ರೀಮಂತ ವ್ಯಕ್ತಿಯಾಗಿದ್ದಾರೆ. ಮೆಟಾ ಷೇರು ಬೆಲೆಯಲ್ಲಿ ಭಾರಿ ಏರಿಕೆ ಕಂಡು ಬಂದಿರುವುದರಿಂದ ಅವರ ಕಂಪನಿಯ ಸಂಪತ್ತು ವೃದ್ದಿಯಾಗಲು ಕಾರಣವಾಗಿದೆ. ಈ ವರ್ಷ ಇತರ ವ್ಯಕ್ತಿಗಳಿಗಿಂತ ಅವರ ನಿವ್ವಳ ಮೌಲ್ಯವು ಹೆಚ್ಚಾಗಿದೆ ಎಂದು ಮಾರ್ಕೆಟ್‌ವಾಚ್ ವರದಿ ಮಾಡಿದೆ.

2024 ರಲ್ಲಿ ಇಲ್ಲಿಯವರೆಗೆ ಜುಕರ್‌ಬರ್ಗ್ ಈಗಾಗಲೇ ತಮ್ಮ ನಿವ್ವಳ ಮೌಲ್ಯವನ್ನು $14.3 ಬಿಲಿಯನ್‌ಗಳಷ್ಟು ಹೆಚ್ಚಿಸಿಕೊಂಡಿದ್ದಾರೆ ಎಂದು ಮಾರ್ಕೆಟ್​ ವಾಚ್​ ಹೇಳಿದೆ. ಬ್ಲೂಮ್‌ಬರ್ಗ್‌ನ ಬಿಲಿಯನೇರ್ ಇಂಡೆಕ್ಸ್‌ನಲ್ಲಿ ಈ ಮೂಲಕ ಅವರು ಐದನೇ ಸ್ಥಾನಕ್ಕೆ ಏರಿಕೆ ಕಂಡಿದ್ದಾರೆ. ಮೈಕ್ರೋಸಾಫ್ಟ್ ಮಾಜಿ ಸಿಇಒ ಸ್ಟೀವ್ ಬಾಲ್ಮರ್‌ಗಿಂತ ಮೇಲಿರುವ ಜುಕರ್​ ಬರ್ಗ್​​, ಮೈಕ್ರೋಸಾಫ್ಟ್ ಸಹ-ಸಂಸ್ಥಾಪಕ ಬಿಲ್ ಗೇಟ್ಸ್ ಅವರ ನಂತರದ ಸ್ಥಾನದಲ್ಲಿದ್ದಾರೆ.

ಮೆಟಾದಲ್ಲಿ ಶೇಕಡಾ 13 ರಷ್ಟು ಪಾಲನ್ನು ಹೊಂದಿರುವ ಜುಕರ್‌ಬರ್ಗ್, 2004ರಲ್ಲಿ ಕಂಪನಿ ಸ್ಥಾಪನೆ ಮಾಡಿದಾಗಿನಿಂದ ಅವರ ಕಂಪನಿ ಷೇರುಗಳ ಬೆಲೆ ಹೆಚ್ಚುತ್ತಲೇ ಸಾಗಿದೆ. ಮುಂಬರುವ ದಿನಗಳಲ್ಲಿ ಕಂಪನಿ ಇನ್ನಷ್ಟು ಉತ್ಕರ್ಷಕ್ಕೆ ಹೋಗುವ ಸಾಧ್ಯತೆಗಳಿವೆ. ಹಾರ್ವರ್ಡ್​​ ವಿವಿ ವಿದ್ಯಾರ್ಥಿಯಾಗಿದ್ದಾಗಲೇ ಜುಕರ್​ಬರ್ಗ್​ ಸಾಮಾಜಿಕ ಜಾಲತಾಣವನ್ನು ಪ್ರವೇಶಿಸಿದ್ದರು ಎಂದು ಮಾರ್ಕೆಟ್‌ವಾಚ್ ವರದಿ ಮಾಡಿದೆ.

ಕಂಪನಿಯ ಆದಾಯದಲ್ಲಿ ತೀವ್ರ ಹೆಚ್ಚಳದ ಹಿನ್ನೆಲೆಯಲ್ಲಿ ಇದೇ ಮೊದಲ ಬಾರಿಗೆ ಮೆಟಾ ತನ್ನ ಹೂಡಿಕೆದಾರರಿಗೆ ಡಿವಿಡೆಂಡ್​ ಘೋಷಣೆ ಮಾಡಿದೆ. ಕಂಪನಿಯ ಈ ಘೋಷಣೆಯಿಂದಾಗಿ ಗುರುವಾರದ ಷೇರು ಮಾರುಕಟ್ಟೆ ವ್ಯವಹಾರದಲ್ಲಿ ಮೆಟಾ ಷೇರುಗಳ ಬೆಲೆ ಶೇ 15 ರಷ್ಟು ಏರಿಕೆ ಕಂಡಿದೆ. ಈ ಹಿನ್ನೆಲೆಯಲ್ಲಿ ಜುಕರ್​ಬರ್ಗ್​ ಸಂಪತ್ತು ಏರಿಕೆ ಆಗಿದ್ದು, ವಿಶ್ವದ 5ನೇ ಶ್ರೀಮಂತ ಎಂಬ ಗರಿಮೆಗೂ ಪಾತ್ರರಾಗಿದ್ದಾರೆ.

ಗುರುವಾರದ ವಹಿವಾಟಿನಲ್ಲಿ ಮೆಟಾದ ಷೇರು ಬೆಲೆಯ ಹೆಚ್ಚಳದಿಂದ ಕಂಪನಿಯ ಮಾರುಕಟ್ಟೆ ಬಂಡವಾಳ $ 140 ಶತಕೋಟಿಯಿಂದ $ 1.17 ಟ್ರಿಲಿಯನ್‌ಗೆ ಏರಿಕೆಯಾಗಿದೆ ಎಂದು ಮಾರ್ಕೆಟ್‌ವಾಚ್ ವರದಿ ಮಾಡಿದೆ. ಮೆಟಾ ಷೇರುಗಳು 2024 ರಲ್ಲಿ ಶೇಕಡಾ 14 ರಷ್ಟು ಮತ್ತು ಹಿಂದಿನ 12 ತಿಂಗಳುಗಳಲ್ಲಿ ಶೇಕಡಾ 109 ರಷ್ಟು ಹೆಚ್ಚಾಗಿದೆ. ಅಕ್ಟೋಬರ್ 2021 ರಲ್ಲಿ ಫೇಸ್‌ಬುಕ್ ತನ್ನ ಹೆಸರನ್ನು ಮೆಟಾ ಪ್ಲಾಟ್‌ಫಾರ್ಮ್‌ಗಳಿಗೆ ಬದಲಾಯಿಸಿ ಕೊಂಡಿತ್ತು. ಕಳೆದ 12 ವರ್ಷಗಳಲ್ಲಿ ಕಂಪನಿ ಷೇರುಗಳ ಮೌಲ್ಯ 933ಕ್ಕೂ ಹೆಚ್ಚು ಪಟ್ಟು ಏರಿಕೆ ಕಂಡಿದೆ.

ಇದನ್ನು ಓದಿ:ಸೆನ್ಸೆಕ್ಸ್​ 440 ಪಾಯಿಂಟ್​ ಜಿಗಿತ, 21,853ಕ್ಕೆ ತಲುಪಿದ ನಿಫ್ಟಿ