ನವದೆಹಲಿ: ದೇವಾಲಯಗಳಲ್ಲಿ ಆನೆಗಳ ಬಳಕೆಗೆ ಕೇರಳ ಹೈಕೋರ್ಟ್ ವಿಧಿಸಿದ್ದ ನಿರ್ಬಂಧಗಳಿಗೆ ಸುಪ್ರೀಂ ಕೋರ್ಟ್ ಗುರುವಾರ ತಡೆ ನೀಡಿದೆ. ತ್ರಿಶೂರ್ ಪೂರಂನಲ್ಲಿ ಆನೆಗಳ ಮೆರವಣಿಗೆಯ ವಿಚಾರದಲ್ಲಿ ಕೇರಳ ಹೈಕೋರ್ಟ್ ವಿಧಿಸಿದ ನಿರ್ಬಂಧಗಳನ್ನು ಪ್ರಶ್ನಿಸಿ ತಿರುವಂಬಾಡಿ ಮತ್ತು ಪರಮೆಕ್ಕಾವು ದೇವಸ್ವಂ ದೇವಾಲಯದ ಟ್ರಸ್ಟ್ಗಳು ಸುಪ್ರೀಂ ಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದವು. ನ್ಯಾಯಮೂರ್ತಿಗಳಾದ ಬಿ.ವಿ.ನಾಗರತ್ನ ಮತ್ತು ಎನ್.ಕೆ.ಸಿಂಗ್ ಅವರ ಸುಪ್ರೀಂ ಕೋರ್ಟ್ ನ್ಯಾಯಪೀಠ ಹೈಕೋರ್ಟ್ ನಿರ್ದೇಶನಗಳಿಗೆ ತಡೆ ನೀಡಿ ಆದೇಶಿಸಿದೆ.
ಹೈಕೋರ್ಟ್ ವಿಧಿಸಿದ್ದ ನಿರ್ಬಂಧಗಳನ್ನು ಅಪ್ರಾಯೋಗಿಕ ಮತ್ತು ಅವು ನ್ಯಾಯಾಂಗದ ಅಧಿಕಾರವನ್ನು ಮೀರಿವೆ ಎಂದು ಹೇಳಿದೆ. ಎರಡು ಆನೆಗಳ ನಡುವೆ ಕನಿಷ್ಠ 3 ಮೀಟರ್ ಅಂತರ ಕಾಯ್ದುಕೊಳ್ಳಬೇಕು, ಆನೆಗಳು ಮತ್ತು ಸಾರ್ವಜನಿಕರ ನಡುವೆ 8 ಮೀಟರ್ ಅಂತರವಿರಬೇಕು ಮತ್ತು ಪಟಾಕಿ ಬಳಸುವ ಪ್ರದೇಶಗಳಿಂದ ಆನೆಗಳನ್ನು 100 ಮೀಟರ್ ದೂರದಲ್ಲಿಡಬೇಕು ಎಂಬ ನಿರ್ಬಂಧಗಳನ್ನು ಹೈಕೋರ್ಟ್ ವಿಧಿಸಿತ್ತು. ಇದಲ್ಲದೆ ಎರಡು ಮೆರವಣಿಗೆಗಳ ಮಧ್ಯೆ ಆನೆಗಳಿಗೆ ಕನಿಷ್ಠ ಮೂರು ದಿನ ವಿಶ್ರಾಂತಿ ನೀಡಬೇಕು ಎಂದು ಹೈಕೋರ್ಟ್ ಆದೇಶಿಸಿತ್ತು.
"ಕೇರಳ ಸೆರೆಹಿಡಿದ ಆನೆಗಳ (ನಿರ್ವಹಣೆ ಮತ್ತು ನಿರ್ವಹಣೆ) ನಿಯಮಗಳು, 2012ಕ್ಕೆ ವಿರುದ್ಧವಾಗಿ ಹೈಕೋರ್ಟ್ ಹೊರಡಿಸಿದ ಯಾವುದೇ ನಿರ್ದೇಶನವನ್ನು ತಡೆಹಿಡಿಯಲಾಗಿದೆ" ಎಂದು ನ್ಯಾಯಪೀಠ ಆದೇಶಿಸಿದೆ.
ಹೈಕೋರ್ಟ್ನ ನಿರ್ದೇಶನಗಳು ನಿಯಮ ರೂಪಿಸುವ ವ್ಯಾಪ್ತಿಯನ್ನು ಮೀರಿವೆ. ನಿಯಮಗಳನ್ನು ರೂಪಿಸುವುದು ಶಾಸಕಾಂಗ ಮತ್ತು ಕಾರ್ಯನಿರ್ವಾಹಕ ಅಧಿಕಾರಿಗಳ ವಿಶೇಷಾಧಿಕಾರವಾಗಿದೆ ಎಂದು ನ್ಯಾಯಪೀಠ ಹೇಳಿದೆ.
ವಕೀಲ ಎಂ.ಆರ್.ಅಭಿಲಾಷ್ ಅವರ ಮೂಲಕ ಸುಪ್ರೀಂ ಕೋರ್ಟ್ಗೆ ಸಲ್ಲಿಸಿದ ಮೇಲ್ಮನವಿಯಲ್ಲಿ, ಆನೆಗಳ ನಡುವೆ ಕನಿಷ್ಠ 3 ಮೀಟರ್ ಅಂತರವನ್ನು ಕಡ್ಡಾಯಗೊಳಿಸುವ ನಿಯಮದಿಂದ ಐತಿಹಾಸಿಕ ಉತ್ಸವವನ್ನೇ ಸ್ಥಗಿತಗೊಳಿಸಲಿದೆ. ಆದರೆ ಸಾವಿರ ವರ್ಷಗಳಷ್ಟು ಹಳೆಯ ತ್ರಿಶೂರ್ ಪೂರಂನ ಅವಿಭಾಜ್ಯ ಅಂಗವಾದ ವಡಕ್ಕುಂನಾಥನ್ ದೇವಾಲಯದ ಸಂಪ್ರದಾಯವನ್ನು ನಿಲ್ಲಿಸಲಾಗದು. ಸಾಂಪ್ರದಾಯಿಕ ವಿನ್ಯಾಸದೊಂದಿಗೆ ಈ ಸ್ಥಳವು ಶತಮಾನಗಳಿಂದ ಪೂರಂನ ಕೇಂದ್ರಬಿಂದುವಾಗಿದೆ ಮತ್ತು ಕೇರಳ ಹೈಕೋರ್ಟ್ ನಿರ್ದೇಶನವು ಐತಿಹಾಸಿಕ ಮತ್ತು ಯುನೆಸ್ಕೋ-ಮಾನ್ಯತೆ ಪಡೆದ ಸಂಪ್ರದಾಯದ ಮಹತ್ವವನ್ನು ನಿರ್ಲಕ್ಷಿಸಿದೆ ಎಂದು ತಿಳಿಸಲಾಗಿತ್ತು.
ಹೈಕೋರ್ಟ್ ಆದೇಶಕ್ಕೆ ಸದ್ಯಕ್ಕೆ ತಡೆ ನೀಡಿದ ಸುಪ್ರೀಂ ಕೋರ್ಟ್ ಪೀಠ, ತನ್ನ ಮಧ್ಯಪ್ರವೇಶವು ಸುರಕ್ಷತೆಯೊಂದಿಗೆ ರಾಜಿ ಮಾಡಿದಂತಲ್ಲ. ಬದಲಾಗಿ ನ್ಯಾಯಾಂಗದ ನಿರ್ದೇಶನಗಳು 2012 ರ ನಿಯಮಗಳಿಗೆ ವಿರುದ್ಧವಾಗಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ಮಾತ್ರ ಎಂದು ಸ್ಪಷ್ಟಪಡಿಸಿದೆ. ನವೆಂಬರ್ ಅಂತ್ಯದಲ್ಲಿ ತ್ರಿಪುನಿಥುರಾ ಪೂರ್ಣತ್ರಯೀಸ ಉತ್ಸವದೊಂದಿಗೆ ಮಧ್ಯ ಕೇರಳದಲ್ಲಿ ವಾರ್ಷಿಕ ಹಬ್ಬದ ಋತು ಆರಂಭವಾಗುವುದರಿಂದ ನ್ಯಾಯಾಲಯದ ತಡೆಯಾಜ್ಞೆಯು ದೇವಾಲಯದ ಆಡಳಿತ ಮಂಡಳಿಗಳಿಗೆ ನಿರಾಳತೆ ತಂದಿದೆ.
