ನವದೆಹಲಿ: ಯಾವುದೇ ಸಮಾಲೋಚನೆ ನಡೆಸದೇ ನ್ಯಾಯಾಲಯದ ಲಾಂಛನ ಮತ್ತು ನ್ಯಾಯದೇವತೆಯ ಪ್ರತಿಮೆಯಲ್ಲಿ ಬದಲಾವಣೆ ಮಾಡಿರುವುದನ್ನು ಆಕ್ಷೇಪಿಸಿ ಸುಪ್ರೀಂ ಕೋರ್ಟ್ ಬಾರ್ ಅಸೋಸಿಯೇಷನ್ (ಎಸ್ಸಿಬಿಎ) ನಿರ್ಣಯ ಪಾಸ್ ಮಾಡಿದೆ.
ನ್ಯಾಯಾಲಯದ ಆಡಳಿತದಲ್ಲಿ ನಾವೂ ಕೂಡ ಸಮಾನ ಭಾಗಿದಾರರು. ಆದರೆ, ನಮ್ಮ ಗಮನಕ್ಕೆ ತಾರದೇ ಮಹತ್ವದ ಬದಲಾವಣೆ ಮಾಡಲಾಗಿದೆ. ಈ ಕುರಿತು ನಮಗೆ ಯಾವುದೇ ಸೂಚನೆಯನ್ನೂ ನೀಡಿಲ್ಲ ಎಂದು ನಿರ್ಣಯದಲ್ಲಿ ಆಕ್ಷೇಪಿಸಿದೆ.
ಕೋರ್ಟ್‌ನ ಅತಿ ಭದ್ರತಾ ವಲಯದಲ್ಲಿ ಮ್ಯೂಸಿಯಂ ಮತ್ತು ವಕೀಲರಿಗೆ ಕೆಫೆ ಕಂ ಲೌಂಜ್ ನಿರ್ಮಾಣ ಮಾಡುವುದಕ್ಕೂ ವಿರೋಧ ವ್ಯಕ್ತಪಡಿಸಿದೆ. ನಾವು ಲೈಬ್ರೆರಿಗೆ ಬೇಡಿಕೆ ಇಟ್ಟಿದ್ದೆವು. ಇದೀಗ ಅಲ್ಲಿ ಮ್ಯೂಸಿಯಂ ಸ್ಥಾಪಿಸಲು ಪ್ರಸ್ತಾಪಿಸಲಾಗಿದೆ. ಈಗಿರುವ ಕೆಫೆಟಿರಿಯಾದಲ್ಲಿ ಬಾರ್ ಸದಸ್ಯರಿಗೆ ಕೆಫೆ ಕಂ ಲೌಂಜ್ ನಿರ್ಮಾಣಕ್ಕೆ ನಿರ್ಧರಿಸಿದ್ದಾರೆ. ಇದಕ್ಕೆ ನಮ್ಮ ವಿರೋಧವಿದೆ ಎಂದು ಹೇಳಿದೆ.