ಉಚಿತ ಹಲೀಮ್​ ತಿನ್ನಲು ಹೋದವರಿಗೆ ಲಾಠಿ ರುಚಿ ತೋರಿಸಿದ ಪೊಲೀಸರು​ - ವಿಡಿಯೋ

ಹೈದರಾಬಾದ್​ನ ಮಲಕ್​ಪೇಟೆಯ ಹೋಟೆಲೊಂದು ಉಚಿತ ಹಲೀಮ್​ ನೀಡುವುದಾಗಿ ಘೋಷಿಸಿದ್ದು, ಹಲೀಮ್ ತಿನ್ನಲು ಜನಸಾಗರವೇ ಹರಿದು ಬಂದ ಕಾರಣ ಪೊಲೀಸರು ಅವರನ್ನು ನಿಯಂತ್ರಿಸಲು ಲಾಠಿ ಏಟು ನೀಡಿ ಚದುರಿಸಿದ್ದಾರೆ.

ಹೈದರಾಬಾದ್​:ಉಚಿತ ಹಲೀಮ್​ನಿಂದ ಇಲ್ಲಿನ ನಗರವೊಂದರಲ್ಲಿ ಪೊಲೀಸರು ಲಾಠಿ ಚಾರ್ಜ್​ ಮಾಡಿರುವ ಘಟನೆ ನಡೆದಿದೆ. ಹಲೀಮ್​ ಪದಾರ್ಥದ ಹೆಸರು ಕೇಳಿದರೆ ಎಂಥವರ ಬಾಯಲ್ಲೂ ನೀರೂರುತ್ತದೆ. ಒಂದು ಕಾಲದಲ್ಲಿ ನವಾಬರ ಡೈನಿಂಗ್​ ಟೇಬಲ್​ ಮೇಲೆ ರಾಜಮರ್ಯಾದೆಯಿಂದ ಇರುತ್ತಿದ್ದ ಹಲೀಮ್ ಇಂದು ಬಡವರ ಅಚ್ಚುಮೆಚ್ಚಿನ ಖಾದ್ಯವಾಗಿ ಮಾರ್ಪಟ್ಟಿದೆ. ಈಗ ಇದೇ ಹಲೀಮ್​ನ ರುಚಿ ಸವಿಯಲು ಹೋದ ಹೈದರಾಬಾದ್​ ಮಂದಿ ಪೊಲೀಸರಿಂದ ಲಾಠಿ ಏಟು ತಿಂದಿದ್ದಾರೆ.

ಹೈದರಾಬಾದ್​ನ ಮಲಕ್​ಪೇಟೆಯ ಹಾಜಿಬೋ ಹೋಟೆಲ್ ರಂಜಾನ್ ಹಿನ್ನೆಲೆ ಮಂಗಳವಾರ ಒಂದು ದಿನ ಉಚಿತ ಹಲೀಮ್ ನೀಡುವುದಾಗಿ ಘೋಷಿಸಿತ್ತು. ಉಚಿತ ಅಂದರೆ ಜನರು ಬಿಟ್ಟಾರೆಯೇ ಜಾತ್ರೆಗೆ ಸೇರುವಷ್ಟು ಮಂದಿ ಉಚಿತ ಹಲೀಮ್​ ಸವಿಯಲು ಪೇಟೆಯಲ್ಲೇ ಸಾಲುಗಟ್ಟಿ ನಿಂತಿದ್ದರು. ಮಂಗಳವಾರ ಸಂಜೆ 7ರಿಂದ 8ರ ವರೆಗೆ ನೀಡುವುದಾಗಿ ಹೋಟೆಲ್​ ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿತ್ತು. ಇದರಿಂದ ಹೋಟೆಲ್​ ಮುಂದೆ ಜನಸಾಗರವೇ ಹರಿದು ಬಂದು ಟ್ರಾಫಿಕ್‌ ಜಾಮ್‌ ಉಂಟಾಗಿತ್ತು.

ಪೊಲೀಸರ ಲಾಠಿ ಏಟು

ಈ ಜನಸಂದಣಿಯನ್ನು ನಿಯಂತ್ರಿಸಲು ಸಾಧ್ಯವಾಗದೆ ಹೋಟೆಲ್ ಆಡಳಿತ ಮಂಡಳಿಯವರು ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕೆ ಆಗಮಿಸಿದ ಪೊಲೀಸ್​ ಪಡೆ ನೂರಾರು ಜನರನ್ನು ನಿಯಂತ್ರಿಸಲು ಲಾಠಿ ಚಾರ್ಜ್ ಮಾಡಿದರು. ಕ್ಯೂನಲ್ಲಿ ನಿಂತ ಜನಕ್ಕೆ ಹಲೀಮ್ ದೊರಕಿದೆಯಾ ಇಲ್ವಾ ಅನ್ನೋದು ಗೊತ್ತಿಲ್ಲಾ. ಆದರೆ ಪೊಲೀಸರ ಲಾಠಿ ಏಟು ಮಾತ್ರ ಬಿದ್ದಿದೆ.

ಇದನ್ನೂ ಓದಿ:ಮುಂಬೈನ ಪಂಚತಾರಾ ಹೋಟೆಲ್​ನಲ್ಲಿ ಅಮೆರಿಕ ಪ್ರಜೆ ಸಾವು​