ನಾಪತ್ತೆಯಾಗಿದ್ದ ಪತ್ರಕರ್ತನ ಶವ ಸೆಪ್ಟಿಕ್​ ಟ್ಯಾಂಕ್​ನಲ್ಲಿ ಪತ್ತೆ: ಪ್ರಕರಣದಲ್ಲಿ ಮೂವರ ಬಂಧನ

ನಾಪತ್ತೆಯಾಗಿದ್ದ ಛತ್ತೀಸ್​ಗಢದ ಪತ್ರಕರ್ತನ ಶವ ಸೆಪ್ಟಿಕ್​ ಟ್ಯಾಂಕ್​ನಲ್ಲಿ ಪತ್ತೆಯಾಗಿದೆ. ಪ್ರಕರಣದಲ್ಲಿ ಮೂವರನ್ನು ಬಂಧಿಸಿ ವಿಚಾರಣೆ ನಡೆಸಲಾಗುತ್ತಿದೆ.

ಬಿಜಾಪುರ (ಛತ್ತೀಸ್‌ಗಢ) :ಹೊಸ ವರ್ಷದ ಮೊದಲ ದಿನದಂದು ನಾಪತ್ತೆಯಾಗಿದ್ದ ಪತ್ರಕರ್ತ ಸೆಪ್ಟಿಕ್​ ಟ್ಯಾಂಕ್​​ನಲ್ಲಿ ಶವವಾಗಿ ಶುಕ್ರವಾರ ಪತ್ತೆಯಾಗಿದ್ದಾನೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಛತ್ತೀಸ್​ಗಢ ಪೊಲೀಸರು ಮೂವರು ಶಂಕಿತರನ್ನು ಬಂಧಿಸಿದ್ದು, ವಿಚಾರಣೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮುಖೇಶ್​​ ಚಂದ್ರಾಕರ್​ (32) ಮೃತ ಪತ್ರಕರ್ತ. ಈತ ಹಲವು ಮಾಧ್ಯಮಗಳಿಗೆ ವರದಿಗಾರಿಕೆ ಮಾಡಿದ್ದಾರೆ. ನಕ್ಸಲ್​​ವಾದದ ಬಗ್ಗೆ ವರದಿ ಮಾಡುತ್ತಿದ್ದ ಈತನಿಗೆ ಜೀವ ಬೆದರಿಕೆಗಳು ಬರುತ್ತಿದ್ದವು. ಜನವರಿ 1ನೇ ತಾರೀಖಿನಿಂದ ಅವರು ನಾಪತ್ತೆಯಾಗಿದ್ದರು. ಈ ಬಗ್ಗೆ ದೂರು ದಾಖಲಾಗಿ, ಪೊಲೀಸರು ಹುಡುಕಾಟ ನಡೆಸಿದಾಗ ಬಿಜಾಪುರ ರಸ್ತೆಯ ಗುತ್ತಿಗೆದಾರರೊಬ್ಬರ ಮನೆಯ ಆವರಣದಲ್ಲಿನ ಸೆಪ್ಟಿಕ್​ ಟ್ಯಾಂಕ್​​ನಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ.

ಜನವರಿ 1 ರಂದು ಸ್ಥಳೀಯ ಗುತ್ತಿಗೆದಾರನ ಸೋದರ ಸಂಬಂಧಿಯಿಂದ ಕರೆ ಬಂದ ನಂತರ ಅವರು ನಾಪತ್ತೆಯಾಗಿದ್ದರು. ತಮ್ಮನ್ನು ಗುತ್ತಿಗೆದಾರನ ಸಹೋದರ ಭೇಟಿ ಮಾಡುವ ಬಗ್ಗೆ ಮುಕೇಶ್​ ಇನ್ನೊಬ್ಬ ಪತ್ರಕರ್ತನಿಗೆ ಮಾಹಿತಿ ನೀಡಿದ್ದ. ಹೊಸ ವರ್ಷದ ದಿನದಂದು ಮಧ್ಯರಾತ್ರಿ 12.30 ಕ್ಕೆ ಆತನ ಫೋನ್​ ಸ್ವಿಚ್​ ಆಫ್​ ಆಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪತ್ರಕರ್ತರೂ ಆಗಿರುವ ಮುಕೇಶ್​ ಅವರ ಸಹೋದರ ಯುಕೇಶ್​​ ಅವರು ಜನವರಿ 2 ರಂದು ಸಹೋದರ ಕಾಣೆಯಾಗಿದ್ದಾನೆ ಎಂದು ಪೊಲೀಸರಿಗೆ ದೂರು ನೀಡಿದ್ದರು. ಪತ್ರಕರ್ತನ ಪತ್ತೆಗಾಗಿ ಬಸ್ತಾರ್​ ಐಜಿ ಪಿ.ಸುಂದರರಾಜ್​ ವಿಶೇಷ ತಂಡವನ್ನು ರಚಿಸಿದ್ದರು.

ಗುತ್ತಿಗೆದಾರನ ಮೇಲೆ ಶಂಕೆ:ಪತ್ರಕರ್ತ ಮುಕೇಶ್​ ಅವರು ಜಿಲ್ಲೆಯ ರಸ್ತೆ ನಿರ್ಮಾಣ ಕಾಮಗಾರಿಯಲ್ಲಿನ ಅವ್ಯವಹಾರಗಳ ಬಗ್ಗೆ ಇತ್ತೀಚಿನ ಸರಣಿ ವರದಿ ಮಾಡಿದ್ದರು. ಇದಕ್ಕೂ ಕೊಲೆಗೂ ಸಂಬಂಧವಿದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ಗುತ್ತಿಗೆದಾರ ಸುರೇಶ್ ಚಂದ್ರಕರ್ ಅವರು ಈ ರಸ್ತೆ ನಿರ್ಮಾಣವನ್ನು ಪಡೆದುಕೊಂಡಿದ್ದಾರೆ.

ಬಿಜಾಪುರ ಸೇರಿದಂತೆ ಬಸ್ತಾರ್ ವಿಭಾಗದ ಗುತ್ತಿಗೆದಾರರ ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಂಡು ಅವರ ವಿರುದ್ಧ ಪ್ರಕರಣ ದಾಖಲಿಸಬೇಕು ಎಂದು ಒತ್ತಾಯಿಸಿ ಪತ್ರಕರ್ತರು ನಗರದ ರಾಷ್ಟ್ರೀಯ ಹೆದ್ದಾರಿ 36ರ ಆಸ್ಪತ್ರೆ ಚೌಕ್​​ನಲ್ಲಿ ಸಾಂಕೇತಿಕ ರಸ್ತೆ ತಡೆ ನಡೆಸಿದರು. ಜೊತೆಗೆ ಬಿಜಾಪುರ ಪೊಲೀಸ್ ವರಿಷ್ಠಾಧಿಕಾರಿಯನ್ನು ಅಮಾನತುಗೊಳಿಸಬೇಕು ಅಥವಾ ವರ್ಗಾವಣೆ ಮಾಡಬೇಕು ಎಂದು ಒತ್ತಾಯಿಸಿದರು.( PTI)

ಇದನ್ನೂ ಓದಿ:32 ವರ್ಷದಿಂದ ಸ್ನಾನ ಮಾಡದ ಚೋಟು ಬಾಬಾ; ತಲೆ ಮೇಲೆ ಧನವಾಲೆ ಬಾಬಾರಿಂದ ಬಾರ್ಲಿ ಕೊಯ್ಲು!