ಪೊಲೀಸರು - ಲಾರೆನ್ಸ್ ಬಿಷ್ಣೋಯ್ ಸಹಚರರ ನಡುವೆ ಗುಂಡಿನ ಚಕಮಕಿ: ಮೂವರ ಬಂಧನ

ಪಂಜಾಬ್​ನಲ್ಲಿ ಪೊಲೀಸರು ಹಾಗೂ ಗ್ಯಾಂಗ್​ಸ್ಟರ್​ ಲಾರೆನ್ಸ್ ಬಿಷ್ಣೋಯ್ ಸಹಚರರ ನಡುವೆ ಗುಂಡಿನ ಚಕಮಕಿ ನಡೆದಿದ್ದು, ಮೂವರನ್ನು ಬಂಧಿಸಲಾಗಿದೆ.

ಶ್ರೀ ಮುಕ್ತಸರ ಸಾಹಿಬ್ (ಪಂಜಾಬ್​):ಭರ್ಜರಿ ಕಾರ್ಯಾಚರಣೆ ನಡೆಸಿರುವ ಶ್ರೀ ಮುಕ್ತಸರ್ ಸಾಹಿಬ್ ಪೊಲೀಸರು ಶನಿವಾರ ತಡರಾತ್ರಿ ಲುಬಾನಿಯಾವಾಲಿ ಗ್ರಾಮದ ಬಳಿ ಗುಂಡು ಹಾರಿಸಿ ಗ್ಯಾಂಗ್​ಸ್ಟರ್​ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ನ ಮೂವರನ್ನು ಬಂಧಿಸಿದ್ದಾರೆ.

ಗುತ್ತಿಗೆದಾರರಿಗೆ ₹1ಕೋಟಿ ಬೇಡಿಕೆ: ಆರೋಪಿಗಳು ಬಿಷ್ಣೋಯ್ ಗ್ಯಾಂಗ್‌ನ ಸದಸ್ಯರೆಂದು ಹೇಳಿಕೊಂಡು, ಗುತ್ತಿಗೆದಾರರಿಗೆ ಒಂದು ಕೋಟಿ ರೂಪಾಯಿಗೆ ಬೇಡಿಕೆ ಇಟ್ಟಿದ್ದರು. ಈ ಬಗ್ಗೆ ದೂರು ಸ್ವೀಕರಿಸಿದ ಪೊಲೀಸರು ತಡರಾತ್ರಿ ಕಾರ್ಯಾಚರಣೆ ನಡೆಸಿದ್ದಾರೆ.

ಬಲೆ ಬೀಸಿ ಬಂಧಿಸಿದ ಪೊಲೀಸರು: ಶ್ರೀ ಮುಕ್ತಸರ ಸಾಹೇಬ ಸಮೀಪದ ರೂಪಾನ ಗ್ರಾಮದಲ್ಲಿರುವ ಗಿರಣಿ ಗುತ್ತಿಗೆದಾರನಿಗೆ ಲಾರೆನ್ಸ್ ಗ್ಯಾಂಗ್‌ನ ಸದಸ್ಯರೆಂದು ಹೇಳಿಕೊಂಡು ದೂರವಾಣಿ ಮೂಲಕ ಒಂದು ಕೋಟಿ ರೂಪಾಯಿ ಸುಲಿಗೆಗೆ ಬೇಡಿಕೆ ಇಟ್ಟಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಬಗ್ಗೆ ಶ್ರೀ ಮುಕ್ತಸರ್ ಸಾಹಿಬ್ ಎಸ್‌ಎಸ್‌ಪಿ ತುಷಾರ್ ಗುಪ್ತಾ ಮಾತನಾಡಿ, 'ಸುಲಿಗೆಕೋರರು ಗುತ್ತಿಗೆದಾರನಿಂದ ಹಣ ಪಡೆಯಲು ಲುಬಾನಿಯಾವಾಲಿ ಗ್ರಾಮಕ್ಕೆ ಹೋಗಿದ್ದರು. ಈ ಬಗ್ಗೆ ಮಾಹಿತಿ ಅರಿತು ಸೂಕ್ತ ಪ್ಲಾನ್​ನೊಂದಿಗೆ ಪೊಲೀಸರು ಸ್ಥಳಕ್ಕೆ ತೆರಳಿದ್ದರು. ಆಗ ಹಣ ತೆಗೆದುಕೊಂಡು ಹೋಗಲು ಅಲ್ಲಿಗೆ ಮೂವರು ಬೈಕ್​ನಲ್ಲಿ ಬಂದಿದ್ದಾರೆ. ಹಣವನ್ನು ಪಡೆದ ಬಳಿಕ ಪೊಲೀಸರು ಸುತ್ತುವರಿದಿದ್ದಾರೆ ಎಂಬುದನ್ನು ಅರಿತ ಅವರಲ್ಲಿನ ಒಬ್ಬ ಸಿಬ್ಬಂದಿ ಮೇಲೆ ಗುಂಡು ಹಾರಿಸಿದ್ದಾನೆ. ಇದಕ್ಕೆ ಪ್ರತಿಯಾಗಿ ಪೊಲೀಸರೂ ಅವರ ಮೇಲೆ ಗುಂಡು ಹಾರಿಸಿದ್ದಾರೆ. ಫೈರಿಂಗ್​ನಲ್ಲಿ ಆರೋಪಿಯ ಸಹಚರರಲ್ಲಿ ಒಬ್ಬನಾದ ಸುಖ್ಮಂದರ್ ಸಿಂಗ್‌ ಎಂಬಾತ ಗುಂಡು ತಗುಲಿ ಕೆಳಗೆ ಬಿದ್ದಿದ್ದಾನೆ. ಈ ವೇಳೆ ಪರಾರಿಯಾಗಲು ಯತ್ನಿಸುತ್ತಿದ್ದ ಸುಖ್ಮಂದರ್ ಸಿಂಗ್, ಲಖ್ವೀರ್ ಸಿಂಗ್ ಮತ್ತು ಸರ್ವಾನ್ ಸಿಂಗ್ ಅವರನ್ನು ಪೊಲೀಸರು ಬಂಧಿಸಿದ್ದಾರೆ. ಗಾಯಾಳುವನ್ನು ಚಿಕಿತ್ಸೆಗಾಗಿ ಸರ್ಕಾರಿ ಆಸ್ಪತ್ರೆಗೆ ರವಾನಿಸಲಾಗಿದೆ. ಘಟನೆಗೆ ಸಂಬಂಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ'' ಎಂದು ಮಾಹಿತಿ ನೀಡಿದರು.

ಇದನ್ನೂ ಓದಿ :ಕುಲ್ಗಾಮ್​ನಲ್ಲಿ ಮೂವರು ಭಯೋತ್ಪಾದಕರು ಸೆರೆ: ಶಸ್ತ್ರಾಸ್ತ್ರ, ಮದ್ದುಗುಂಡು ವಶಕ್ಕೆ - THREE TERRORIST ARRESTED