Watch: ತಾಯಿ ಬಳಿ ತೆರಳದೇ ಅರಣ್ಯ ಸಿಬ್ಬಂದಿ ಜೊತೆ ಮರಿಯಾನೆಯ ತುಂಟಾಟ

ಅಸ್ಸಾಂನಲ್ಲಿ ತಾಯಿಯಿಂದ ಬೇರ್ಪಟ್ಟ ಆನೆ ಮರಿ ಕಾಡಿಗೆ ಕಳುಹಿಸಿದರೂ ಹೋಗದೇ ತನ್ನನ್ನು ರಕ್ಷಿಸಿದ ಅರಣ್ಯ ಇಲಾಖೆ ಸಿಬ್ಬಂದಿಯೊಂದಿಗೆ ಆಟವಾಡಿತು.

ಅಸ್ಸಾಂ:ಇಲ್ಲಿನಮಜುಲಿ ಜಿಲ್ಲೆಯ ಸಮೀಪದ ಲಾಸನ್​ ಚಾಪ್ರಿ ಎಂಬಲ್ಲಿ ತನ್ನ ತಾಯಿಯಿಂದ ಬೇರ್ಪಟ್ಟ ಮರಿಯಾನೆಯನ್ನು ಅರಣ್ಯ ಸಿಬ್ಬಂದಿ ಆರೈಕೆ ಮಾಡಿದ್ದಾರೆ. ತಮ್ಮ ಮಕ್ಕಳಂತೆ ಕಾಳಜಿ ವಹಿಸಿರುವ ಸಿಬ್ಬಂದಿಯೊಂದಿಗೆ ಆನೆಮರಿ ಆಟವಾಡುತ್ತಾ ತನ್ನ ತಾಯಿಯನ್ನೇ ಮರೆತಿದೆ. ಇವರ ಆಟದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.

ಕಳೆದ ಕೆಲವು ದಿನಗಳಿಂದ ಮಜುಲಿ ಹಾಗು ಸುತ್ತಮುತ್ತಲ ಪ್ರದೇಶಗಳಲ್ಲಿ ಕಾಡಾನೆಗಳ ಹಿಂಡು ಸುತ್ತಾಡುತ್ತಿದ್ದವು. ಇದನ್ನು ಸ್ಥಳೀಯರು ನೋಡಿದ್ದರು. ಶುಕ್ರವಾರ ಆನೆ ಮರಿ ತನ್ನ ತಾಯಿಯಿಂದ ಬೇರ್ಪಟ್ಟು ಮುಂದೆ ಸಾಗಿದೆ. ತಾಯಿಯ ಹುಡುಕಾಟದಲ್ಲಿ ದಣಿದಿದ್ದ ಆನೆ ಮರಿಯನ್ನು ಗಮನಿಸಿದ ಗ್ರಾಮಸ್ಥರು, ಅರಣ್ಯ ಇಲಾಖೆ ಸಿಬ್ಬಂದಿಗೆ ಮಾಹಿತಿ ನೀಡಿದ್ದಾರೆ.

ಲಸನ್ ಚಾಪ್ರಿ ಅರಣ್ಯ ಸಿಬ್ಬಂದಿಗಳು ಆನೆಮರಿಯನ್ನು ರಕ್ಷಿಸಿ, ಮರಳಿ ಕಾಡಿಗೆ ಕಳುಹಿಸಲು ಸಾಕಷ್ಟು ಪ್ರಯತ್ನಿಸಿದ್ದಾರೆ. ಆದರೆ ಮರಿಯಾನೆ ತನ್ನ ತಾಯಿಯ ಬಳಿ ಹೋಗುವ ಬದಲಾಗಿ ಸಿಬ್ಬಂದಿಯೊಂದಿಗೇ ಆಡವಾಡುತ್ತಾ ಖುಷಿಯಾಗಿದೆ. ಅದು ತನ್ನ ಕುಟುಂಬದ ಬಳಿ ಹೋಗದೇ ಇದ್ದಲ್ಲಿ ವನ್ಯಜೀವಿ ಪುನರ್ವಸತಿ ಕೇಂದ್ರಕ್ಕೆ ಸ್ಥಳಾಂತರಿಸಲಾಗುವುದು ಎಂದು ಅರಣ್ಯ ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ:ಮಧ್ಯ ಪ್ರದೇಶದಲ್ಲಿ 10 ಆನೆಗಳ ನಿಗೂಢ ಸಾವು: ರಾಜ್ಯ, ಕೇಂದ್ರ ಸರ್ಕಾರದಿಂದ ತನಿಖೆ