ತನ್ನ ಕಾಲ್ಚಳಕದಿಂದಲೇ ಬೆರಗು ಮೂಡಿಸುವ ತಾರಾ ಫುಟ್ಬಾಲ್ ಆಟಗಾರ ಕ್ರಿಸ್ಟಿಯಾನೋ ರೊನಾಲ್ಡೊಗೆ ವಿಶ್ವಾದ್ಯಂತ ಕೋಟ್ಯಂತರ ಅಭಿಮಾನಿಗಳಿದ್ದಾರೆ. ಆತನ ಫ್ಯಾನ್ ಫಾಲೋವಿಂಗ್ ಎಲ್ಲರಿಗಿಂತ ಮಿಗಿಲು. ಆತನನ್ನು ನೋಡಲು ಅದೆಷ್ಟೋ ಅಭಿಮಾನಿಗಳು ಚಾತಕ ಪಕ್ಷಿಯಂತೆ ಕಾಯುತ್ತಿರುತ್ತಾರೆ. ಅಂಥದ್ದೇ ಅಪ್ಪಟ ಅಭಿಮಾನಿಯೊಬ್ಬನ ಆಸೆ ತೀರಿದೆ. ಅದೆಷ್ಟೋ ದಿನಗಳಿಂದ ಭೇಟಿಗಾಗಿ ಕಾದಿದ್ದ ಯೂಟ್ಯೂಬ್ ಸ್ಟಾರ್ ಸ್ಪೀಡ್ ಎಂಬಾತ ರೊನಾಲ್ಡೊರನ್ನು ಕೊನೆಗೂ ದರ್ಶಿಸಿದ್ದಾರೆ.
ರೊನಾಲ್ಡೊರನ್ನು ಭೇಟಿ ಮಾಡುವುದಕ್ಕಾಗಿ ಕಾದಿದ್ದ ಸ್ಪೀಡ್ ಬೋಸ್ನಿಯಾ ಫುಟ್ಬಾಲ್ ತಂಡದ ಅಭಿಮಾನಿಯೂ ಹೌದು. ಭೇಟಿಗೂ ಇದಕ್ಕೂ ಮೊದಲು ಪೋರ್ಚುಗಲ್ ತಂಡ ಬೋಸ್ನಿಯಾ ವಿರುದ್ಧ 3-0 ಅಂತರದಲ್ಲಿ ಗೆಲುವು ಸಾಧಿಸಿತ್ತು. ಎದುರಾಳಿ ತಂಡದ ಅಭಿಮಾನಿಯಾಗಿದ್ದರೂ ರೊನಾಲ್ಡೊರನ್ನು ಭೇಟಿ ಮಾಡುವ ಮಹದಾಸೆಯನ್ನು ಸ್ಪೀಡ್ ಹೊಂದಿದ್ದ.
ಇದಕ್ಕಾಗಿ ಕ್ರೀಡಾಂಗಣದ ಹೊರಗೆ ಕಾದಿದ್ದ ಸ್ಪೀಡ್, ಕಾರಿನಿಂದ ಇಳಿದು ಬಂದ ರೊನಾಲ್ಡೊರನ್ನು ಕಂಡು ಪುಳಕಿತರಾದರು. ನೆಲಕ್ಕೆ ಬಾಗಿದ ಆತ 'ಓ ಮೈ ಗಾಡ್ ಐ ಲವ್ ಯೂ' ಎಂದು ಕೂಗಲಾರಂಭಿಸಿದ. ಸೆಲ್ಫಿ ತೆಗೆದುಕೊಂಡು ಸಂಭ್ರಮಿಸಿದ. ಬಳಿಕ ಫಾರ್ವರ್ಡ್ ಆಟಗಾರನ ಟ್ರೇಡ್ಮಾರ್ಕ್ ಆಗಿರುವ ಮೇಲಕ್ಕೆ ಜಿಗಿದು ಕೈಗಳೆರಡನ್ನು ಹಿಂದಕ್ಕೆ ಮಾಡುವ ಭಂಗಿಯನ್ನು ಮಾಡುವ ಮೂಲಕ ಸಂಭ್ರಮಿಸಿದ್ದಾನೆ.
ಅಭಿಮಾನಿಯ ಈ ಮಿತಿಯಿಲ್ಲದ ಸಂಭ್ರಮ ಕಂಡು ಅಂಗರಕ್ಷಕರು ತುಸು ಆತಂಕಕ್ಕೆ ಒಳಗಾಗಿದ್ದರು. ಆದರೂ, ಆತನ ಬಯಕೆಯನ್ನು ಈಡೇರಿಸುವ ಸಲುವಾಗಿ ಯಾವುದೇ ನಿರ್ಬಂಧ ವಿಧಿಸಲಿಲ್ಲ. ರೊನಾಲ್ಡೊ ಕೂಡ ಅಭಿಮಾನಿಯನ್ನು ತಬ್ಬಿಕೊಂಡರು. 'ತಿಂಗಳುಗಳ ಪ್ರಯತ್ನದ ನಂತರ ನನ್ನ ಆರಾಧ್ಯದೈವ ಆಟಗಾರನನ್ನು ಭೇಟಿಯಾದೆ' ಎಂದು ಆತ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾನೆ.