અમદાવાદ: કેન્દ્ર સરકાર વકફ સુધારો અધિનિયમ 2024 લાવવાની તૈયારી કરી રહી છે. જેપીસીને વકફમાં સુધારો કરવો જોઈએ કે નહીં તેની જવાબદારી સોંપવામાં આવી છે. વકફને લઈને અનેક ગેરમાન્યતાઓ અને અફવાઓ સમાજમાં ફરી રહી છે અને લોકોને એ પણ ખબર નથી કે વકફ શું છે. વકફની વાસ્તવિકતા શું છે અને અફવાઓ પાછળનું સત્ય શું છે? અંગે ગુજરાત હાઈકોર્ટના વકીલ અને પૂર્વ સેન્ટ્રલ વક્ફ કાઉન્સિલના સભ્ય ઈકબાલ શેખે ETV ભારત સંવાદદાતા રોશન આરા સાથે ખાસ વાતચીત કરી હતી.
વક્ફ બોર્ડ એ ચેરીટી કમિશનર જેવી સુપરવાઇઝર ઓથોરિટી: આ અંગે એડવોકેટ ઈકબાલ શેખે જણાવ્યું હતું કે, વક્ષ એ મિલકતનો પ્રકાર છે અને વકફ બોર્ડ એ ચેરીટી કમિશનર જેવી સુપરવાઇઝરી ઓથોરિટી છે. ઈસ્લામી કાયદામાં મન હોય એવા ધાર્મિક પવિત્ર અથવા સખાવતી હેતુ માટે વાંકીફે પોતાની માલિકીની મિલકત આવા હેતુઓ માટે કાર્ય કરતી કોઈ રજીસ્ટર કે અનરજીસ્ટર સંસ્થાઓને અથવા કોઈ વ્યક્તિ કે વ્યક્તિઓને વખત બનાવીને અથવા મૌખિક રીતે કાયમી માટે અર્પણ કરી હોય એવી મિલકતો વક્ફ મિલકતો છે. અને કોઈ મિલકત એકવાર વફ થઈ જાય પછી કાયમી વક્ફ જ રહે છે.
વક્ફ બોર્ડ મુસ્લિમ મિલ્કતોની નોંધણીનું કાર્ય કરે છે: તેમણે વધુમાં જણાવ્યું કે, લોકોમાં એવી અફવાઓ ફેલાવવામાં આવે છે કે આર્મી અને રેલ્વે પછી ત્રીજા નંબરે બોર્ડની મિલકતો છે. એની વાસ્તવિકતા કંઈક જુદી છે. આર્મી અને રેલવે કેન્દ્ર સરકારના વિભાગ છે. એની મિલકતો કેન્દ્ર સરકારની છે. જ્યારે વક્ફ બોર્ડ એ અલગ અલગ રાજ્ય સરકારના નિયંત્રણ હેઠળની ઓથોરિટીઝ છે. જે મુસ્લિમ ટ્રસ્ટો અને મુસ્લિમની મિલકતો અંગે નોંધણી, દેખરેખ અને નિયંત્રણ રાખે છે. બોર્ડ પાસે એક ચોરસ મીટર કે એક રૂપિયાની એક પણ મિલકત નથી.