Published : Aug 17, 2024, 10:36 PM IST
અમદાવાદઃગણેશ મૂર્તિની સ્થાપના માટે પરમીટ સ્થાનિક પોલીસ સ્ટેશન તરફથી અપાશે. આ અંગે કમિશનર કચેરી દ્વારા જાહેરનામુ બહાર પાડવામાં આવ્યું છે. ઉલ્લેખનીય છે કે આ દિવસો દરમિયાન લોકોની ભીડ પણ ઉમટતી હોય છે અને તહેવારના સમયે લોકોની સુરક્ષા પણ પોલીસ માટે અગ્રીમ મહત્વની જવાબદારી બની જતી હોય છે.
શું કહ્યું છે આ જાહેરનામામાં?
ગણેશ મહોત્સવને લઈને જાહેરનામામાં કહેવાયું છે કે, ગણેશ વિસર્જન શોભાયાત્રા/સરઘસ એક કરતા વધારે ઝોન વિસ્તારમાંથી પસાર થનાર હોય તો સરઘસ અંગેની પરમીટ પોલીસ કમિશનરની કચેરી, વિશેષશાખા તરફથી આપવામાં આવશે. ગણેશ મૂર્તિની સ્થાપના માટે પરમીટ સ્થાનિક પોલીસ સ્ટેશન તરફથી આપવામાં આવશે.
સ્થાપનાની જગ્યાએ લાઉડ સ્પીકર વગાડવા માટેની પરમીટ પણ જે-તે પોલીસ સ્ટેશન તરફથી આપવામાં આવશે. ગણેશ વિસર્જન માટે સરઘસ કાઢવા માટેની અરજી પણ ફરજિયાત આપવાની રહેશે. ગણેશ સ્થાપના તથા વિસર્જનની પરમીટ મેળવવા આયોજકો જ્યારે પોલીસ સ્ટેશને જાય ત્યારે આયોજકો તથા સાથે જે તે વિસ્તારનાં વર્ચસ્વ ધરાવતી ૧૫ થી ૨૦ વ્યક્તિના નામ- સરનામાં આપવાના રહેશે. ગણેશ વિસર્જન કઈ તારીખે તથા કયા સ્થળે કરવામાં આવનાર છે તથા સરઘસના રૂટની વિગતો ફરજિયાતપણે આપવાની રહેશે.
