Published : Sep 18, 2024, 9:50 PM IST
જુનાગઢ:જમજીર ધોધ પર સેલ્ફી લેવી રાજકોટના એક દંપતીની સાથે જમજીર નજીક આવેલા જમજીર રિટ્રીટ હોમ સ્ટેના માલિક પર જાહેરનામાં ભંગનો ગુનો કોડીનાર પોલીસ મથકમાં નોંધાયો છે. ગત 16 મી તારીખે અહીં રાજકોટનુ દંપતી જન્મદિવસની ઉજવણી કરવા આવ્યું હતું ત્યારે સેલ્ફી લેવામાં આવી હતી. જમજીર ધોધને ખૂબ જ ખતરનાક માનવામાં આવે છે. જેથી અહીં જિલ્લા વહીવટી તંત્ર દ્વારા પ્રતિબંધાત્મક આદેશો મુકવામાં આવ્યા છે. તેમ છતાં રાજકોટના દંપતીએ સેલ્ફી લેતા પોલીસ ફરિયાદ નોંધાઈ છે.
જન્મદિવસની ઉજવણી મોંઘી પડી પોલીસ મથકમાં નોંધાઈ ફરિયાદ
રાજકોટના કુવાડવામાં રહેતા એક દંપતીને ગીરમાં આવેલા જમજીર ધોધ પર જન્મદિવસની ઉજવણી બાદ સેલ્ફી લેવી ભારે પડી છે. રાજકોટના દંપતીની સાથે જમજીર ધોધ નજીક આવેલા જમજીર રિટ્રીટ હોમ સ્ટેના માલિક સામે સરકારના જાહેરનામાના ભંગ કરવાનો ગુનો કોડીનાર પોલીસ મથકમાં નોંધાયો છે. પ્રતિબંધ હોવા છતાં અહીં સેલ્ફી લઈને હોટેલના સંચાલકે તેને સોશિયલ મીડિયામાં અપલોડ કરતા રાજકોટના દંપતીની સાથે હોટેલ સંચાલક સામે ગુનો નોંધીને કોડીનાર પોલીસે તપાસ શરૂ કરી છે.
જમજીર ધોધ સુરક્ષાની દ્રષ્ટિએ ખતરનાક
મધ્ય ગીરમાં આવેલો જમજીર ધોધ કોઈપણ પ્રવાસીને તેના તરફ આકર્ષી રહ્યો છે. એકદમ રમણીય લાગતો આ ધોધ એટલો જ ખતરનાક પણ માનવામાં આવે છે ભૂતકાળમાં અહીં અનેક કિસ્સાઓ અકસ્માતના બન્યા છે, જેમાં પ્રવાસીઓએ પોતાનો જીવ ગુમાવ્યો છે. જેને ધ્યાને રાખીને જિલ્લા વહીવટી તંત્ર દ્વારા જમજીર ધોધમાં નાહવા ઊંડા પાણીમાં જવા કે ધોધની કોતરો પર સેલ્ફી લેવી કાયમી ધોરણે પ્રતિબંધિત કરી છે. તેમ છતાં રાજકોટનું એક દંપતી સરકારી પ્રતિબંધનો ઉલાળીયો કરીને જન્મદિવસની ઉજવણી કર્યા બાદ તેની તસવીરો સોશિયલ મીડિયામાં વાયરલ કરતા સમગ્ર મામલો પોલીસ મથક સુધી પહોંચ્યો અને હાલ પોલીસે રાજકોટના દંપતી અને હોટેલના સંચાલક સામે ગુનો નોંધીને વધુ તપાસ શરૂ કરી છે.