જામનગર: રાજ્યના જામનગરમાંથી કોંગો ફીવરનો એક કેસ નોંધાયો છે. 21 તારીખે 50 વર્ષના દર્દીને જી.જી હોસ્પિટલમાં દાખલ કરવામાં આવ્યા હતા. દર્દીની છેલ્લા 7 દિવસથી સારવાર ચાલી રહી હતી. આ દર્દીમાં શંકાસ્પદ કોંગો ફીવરના લક્ષણો જણાઈ રહ્યા હતા. જોકે સારવાર દરમિયાન તેમનું મોત નિપજ્યું છે. જે બાદ હવે આરોગ્ય વિભાગની ટીમ દ્વારા વિસ્તારમાં ચકાસણી કરવામાં આવી હતી.
આધેડને આઈસોલેશન વોર્ડમાં રખાયા હતા
વિગતો મુજબ, જામનગરમાં પંચેશ્વર ટાવર વિસ્તારમાં રબારી પાડામાં રહેતા 51 વર્ષીય મોહનભાઈનું કોંગોથી મોત નિપજ્યું હોવાની પુષ્ટિ થઈ છે. જામનગરની જી.જી હોસ્પિટલમાં કોંગોગ્રસ્ત વ્યક્તિને દાખલ કરવામાં આવ્યા હતા અને અહીં સારવાર દરમિયાન તેમનું મોત નિપજ્યું હતું. પુણેની લેબોરેટરીમાં તેમના સેમ્પલ મોકલવામાં આવ્યા હતા અને મૃતકના સેમ્પલ કોંગો પોઝિટિવ આવ્યા છે. કોંગો રોગ પશુઓમાં રહેલી ઇતરડીથી ફેલાય છે. જામનગરની જી.જી હોસ્પિટલ અને જામનગર મહાનગરપાલિકાની આરોગ્ય ટીમ દ્વારા સમગ્ર વિસ્તારમાં તપાસ કરવામાં આવી છે.