Surat New Civil Hospital : નવી સિવિલ હોસ્પિટલના બીમાર પંખા, દર્દીની માતા સાથે બન્યો દુર્ભાગ્યપૂર્ણ બનાવ

સુરત નવી સિવિલ હોસ્પિટલમાં એક દુર્ભાગ્યપૂર્ણ ઘટના બની છે. અહીં સારવાર અર્થે આવેલા દર્દીના માતા ઉપર પંખો પડતા તેમને ઈજા પહોંચી હતી. મહિલાને સારવાર આપવામાં આવી રહી છે. બીજી તરફ હોસ્પિટલ તંત્રએ તાત્કાલિક તમામ લાઈટ-પંખા ચેક કરવાના આદેશ આપ્યા છે.

સુરત :નવી સિવિલ હોસ્પિટલમાં માત્ર દર્દી જ બીમાર નથી, પરંતુ હોસ્પિટલમાં પંખો પણ બિમાર હાલતમાં જોવા મળી રહ્યો છે. એક દર્દીની માતા ઉપર અચાનક જ પંખો પડતા તેમના માથાના ભાગે ગંભીર ઈજા થઈ હતી. પુત્રની સાથે તેમને પણ હોસ્પિટલમાં સારવાર અર્થે દાખલ થવું પડ્યું હતું. આ ઘટના બાદ નવી સિવિલ હોસ્પિટલ તંત્ર હરકતમાં આવ્યું છે. સંબંધિત વિભાગને જાણ કરી હોસ્પિટલના તમામ પંખા-ટ્યુબલાઈટ સહિતની વસ્તુ તાત્કાલિક રીપેર કરવા માટે આદેશ આપ્યા છે.

દુર્ભાગ્યપૂર્ણ ઘટના :સિવિલ હોસ્પિટલના ચોથા માળે J4 વોર્ડમાં 25 વર્ષીય જીગ્નેશ રાઠોડને ટીબીની સારવાર અર્થે દાખલ કરવામાં આવ્યો હતો. જીગ્નેશની સંભાળ કરવા માટે હોસ્પિટલમાં તેની માતા હતી. ગુરુવારે બપોરે જ્યારે તેઓ વોર્ડમાં આરામ કરી રહ્યા હતા ત્યારે અચાનક બોર્ડના સીલીંગ પર લાગેલો પંખા તૂટીને 55 વર્ષીય વર્ષાબેન ઉપર પડ્યો હતો. જેના કારણે તેમના માથાના ભાગે ઈજા થઈ હતી. તેઓને તાત્કાલિક હોસ્પિટલમાં સારવાર આપવામાં આવી હતી. અગાઉ પણ સિવિલ હોસ્પિટલમાં આવી ઘટના બની હતી, જ્યાં પંખો તૂટી પડ્યો હતો. પરંતુ સદનસીબે કોઈને ઇજા થઈ નહોતી.

મહિલાના માથે પંખો પડ્યો :ઇજાગ્રસ્ત થયેલ વર્ષાબેને જણાવ્યું હતું કે, તેઓ કડોદરાના ચલથાણ વિસ્તારમાં આવેલા હળપતિ નિવાસમાં રહે છે. દીકરાને ટીબી થતાં તેને હોસ્પિટલ સારવાર માટે લાવ્યા છે અને તેની સંભાળ માટે તેઓ અહીંયા આવ્યા હતા. તેઓ આરામ કરવા માટે બાજુના પલંગ પર બેઠા ત્યારે અચાનક જ ઉપરથી પંખો પડ્યો હતો. પંખો મહિલાને માથાના ભાગે વાગતા ઈજા પહોંચી હતી.

હોસ્પિટલ સંચાલનની કાર્યવાહી :આ સમગ્ર મામલે સુપ્રિટેન્ડ ગણેશ ગોવેકરે જણાવ્યું હતું કે, આ ખૂબ જ દુર્ભાગ્યપૂર્ણ ઘટના છે. અમે આ ઘટના બાદ તાત્કાલિક પીઆઈયુના ઇલેક્ટ્રીક વિભાગને સૂચના આપી છે, હોસ્પિટલના તમામ પંખા-લાઈટ અને એસીના રીપેરીંગ માટે આદેશ આપવામાં આવ્યા છે.