ભુજના પતંગ બજારમાં બરેલી દોરીની ડિમાન્ડ, બજારમાં અછતઃ માર્કેટમાં શું છે અવનવું, જાણો

ભુજની પતંગ બજારમાં બરેલીની દોર ડિમાન્ડમાં પરંતુ બજારમાં માળની અછત, નાના બાળકો માટે આવી અવનવા પતંગની નવી વેરાયટીઓ

કચ્છઃઉતરાયણને હવે માત્ર બે જ દિવસ બાકી રહ્યા છે ત્યારે ભુજમાં પતંગ અને દોરીના વેચાણમાં ઉતાર ચડાવ જોવા મળી રહ્યો છે. કચ્છમાં પડી રહેલી કાતિલ ઠંડીના કારણે ગામડાની ઘરાકીમાં થોડો ઘટાડો જોવા મળી રહ્યો છે. બપોર બાદ ઘરાકી વધારે જોવા મળે છે. ભુજના વેપારીઓએ વિશ્વાસ વ્યક્ત કર્યો છે કે શનિવાર સાંજથી સોમવાર સુધીમાં સારી ઘરાકી મળશે તેમજ આ વર્ષે નાના બાળકો માટે પણ ઢીંગલા જેવા પતંગની નવી વેરાયટી આવી છે. તો બજારમાં બરેલીની દોરીની અછત જોવા મળી રહી છે.

ભુજના બજારો રંગબેરંગી પતંગ અને ફીરકીઓથી સજજ

ભુજની પતંગ બજારમાં હાલમાં અવનવા પતંગ અને દોરીની પતંગ રસિયાઓ દ્વારા મનભરીને ખરીદી કરવામાં આવી રહી છે. તો ખંભાતિયા, ચિલ પતંગની ભારે ડિમાન્ડ જોવા મળી રહી છે. તો દોરીમાં બરેલી અને લાલ કિલ્લાની દોરની માંગ વધારે છે. કચ્છની કાતિલ ઠંડીના કારણે ગામડાના લોકો ખરીદી કરવા ઓછા આવી રહ્યા છે. આ વર્ષે લોકો ચીલ, ફુમ્મક, ઘેરા, ચાંદ, અડદિયા નાના બાળકો માટે કાર્ટૂન વાળા સહિતનાં પતંગોની પણ પતંગ રસિયાઓ ખરીદી કરી રહ્યા છે.

ગત વર્ષ કરતા 5થી 10 ટકા જેટલો ભાવ વધારો

શહેરી વિસ્તારોમાં સામાન્ય રીતે પતંગ રસિયાઓ કાગળના પતંગ ઉડાડવાનું વધારે પસંદ કરતા હોય છે પરંતુ ભેજ વાળા વાતાવરણના કારણે આ વખતે માલની અછત વર્તાઈ રહી હોવાનું વેપારીઓ જણાવી રહ્યા છે. જ્યારે ગ્રામ્ય વિસ્તારોના લોકો આજે પણ પ્લાસ્ટિકનાં તેમજ ઝાલર વાળા પતંગની વધારે માગ કરતા હોય છે. જેમાં મુખ્યત્વે કાર્ટૂન પ્રિન્ટ જેમાં છોટા ભીમ, બેન ટેન, ટોમ એન્ડ ઝેરી, ઇગલ, ખંભાત, જોધપુર અને જેતપુરની પતંગની માગ વધુ જોવા મળી રહી છે. ફીરકીની દોરીમાં લાલ કિલ્લા, ગ્લાઇન્ડર, કમાન્ડો, સુરતી, બરેલી જેવી દોરીની માગ વધુ જોવા મળી રહી છે. હાલમાં પતંગ-દોરાના ભાવમાં ગત વર્ષ કરતા 5 થી 10 ટકા જેટલો વધારો જોવા મળી રહ્યો છે. તેમ છતા પણ ભાવને અગવણીને પણ ભુજની પતંગ બજારમાં સારી એવી ઘરાકી જોવા મળશે તો ભેજ વાળા વાતાવરણના કારણે કાચો માલ ઓછો આવી રહ્યો છે. જેથી આ વર્ષે માલની ખુબ અછત વર્તાઈ રહી છે, તો 37 વર્ષના વેપારના અનુભવમાં આવી માલની અછત પ્રથમ વાર જોઈ છે તેવું વેપારીઓએ જણાવ્યું હતું.

ઉત્તરાયણના પતંગો (Etv Bharat Gujarat)

નાના બાળકો માટે ખાસ પતંગો: 3 KGનો ફીરકો

ઉતરાયણના પર્વની ઉજવણી માટે ભુજની બજાર રંગબેરંગી પતંગોથી સજ્જ થઈ ચૂકી છે. ગુજરાતીઓના માનીતા તહેવાર ઉત્તરાયણના પર્વને લઇને ભુજની બજારોમાં ઠે૨ ઠેર રંગબેરંગી પતંગો,નાની ફીરકીઓ, નાના પતંગો, ફેન્સી માસ્ક, સોલાર કેપ, બ્યુગ્લ, ગુબ્બારા, કાપડના પતંગો, લાઈટ વાળા માસ્ક, ફટાકડા, ફુગ્ગાઓ સહિતની વસ્તુઓની ડિમાન્ડ પણ વધતી જઈ રહી છે. નવી વેરાયટીમાં આ વખતે મોટા ઝરી વાળા કાગળના અને પ્લાસ્ટિકના પતંગો આવ્યા છે તો નાના બાળકો માટે ઢીંગલા વાળા પતંગો તો કાના (કિન્ના) બાંધેલા પતંગોની માગ પણ વધી છે. ભુજના પતંગ બજારમાં 3 કિલોના વજનનો મોટો ફીરકો પણ આવ્યો છે.

બાળકો માટે અવનવા પતંગો (Etv Bharat Gujarat)

આ વર્ષે પણ ઠંડીના હિસાબે બરેલીની દોરની માંગ અપૂર્ણ

છેલ્લાં 37 વર્ષોથી પતંગ અને દોરનો વેપાર કરતા પરેશભાઈ ઠકકરે જણાવ્યું હતું કે, 37 વર્ષોનો અનુભવમાં માલની અછત જે આ વર્ષે છે તેવી અછત ક્યારે પણ નથી જોઈ. ખાસ કરીને ભુજની જનતા ઉતરાયણના બે દિવસોમાં પેહલા જ ખરીદી કરવા ઉમટે છે. ખાસ કરીને બરેલીની દોરની માગ વધારે રહેતી હોય છે પરંતુ આ વખતે પણ ઠંડીના કારણે ઝાકળ પડવાના હિસાબે દોરનો જથ્થો પૂરતા પ્રમાણમાં નથી આવ્યો અને તેની જગ્યાએ નવતર પાંડા તેમજ લાલ કિલ્લા જેવી દોરની માગ પણ વધી છે અને આ વખતે ગત વર્ષની સરખામણીએ 5 થી 10 ટકા જેટલો ભાવ વધારો આવ્યો છે. તો પતંગના ભાવ 2 રૂપિયાથી 20 રૂપિયા સુધી છે તો દોરીના ભાવ 10 રૂપિયાથી લઈને 1500 રૂપિયા સુધીના છે.

ભારેખમ ફીરકી (Etv Bharat Gujarat)

કિન્ના બાંધેલા પતંગોની માંગ વધારે

અન્ય વેપારી જુબેર લોઢિયાએ જણાવ્યું હતું કે, આ વર્ષે ખંભાતના, જોધપુરના પતંગોની માંગ વધારે છે અને નવી વેરાયટીમાં નાના બાળકો માટે ઢીંગલાવાળા પતંગો આવ્યા છે જેથી કરીને બાળકો પણ આ તહેવારનો આનંદ માણે અને નાના નાના પતંગો અને ફિરકી પણ આકર્ષક આવ્યા છે. ઇલેક્ટ્રિક ફિરકી પણ આ વખતે સારી ડિમાન્ડમાં છે.તો ચાઇનીઝ દોરનું વેંચાણ અમે કરતા પણ નથી અને અન્ય વેપારીઓને પણ તેનું વેંચાણ ના કરવા અપીલ કરીએ છીએ અને ખાસ કરીને ભારતની દોર જ ઉપયોગમાં લેવી જોઈએ.

પ્લાસ્ટિકના પતંગો (Etv Bharat Gujarat)

દર વર્ષે 500થી 600 પતંગોની લેવાલી

પતંગની ખરીદી કરવા આવેલા કેયુર મકવાણાએ જણાવ્યું હતું કે, દર વખતે મિત્રો અને પરિવારજનો સાથે અમે ઉતરાયણની ઉજવણી કરતા હોઈએ છીએ અને દર વર્ષે 500થી 600 પતંગો અને 4થી 5 ફિરકી અને લેતા હોઇએ છીએ. તો ઉંધીયું, તલસાકડી ખાઈને તેમજ રાત્રે ફટાકડા ફોડી અને ગુબ્બારા ઉડાવીને અમે ઉતરાયણની ઉજવણી કરતા હોઈએ છીએ અને ખાસ કરીને ભગવાન પતંગ ભંડાર, નવ તારની દોર તેમજ ખાસ કરીને પતંગમાં ચિલ પતંગ ચગાવવાની વધુ મજા આવતી હોય છે.

મોજ મસ્તીની વિવિધ વેરાયટીઝ (Etv Bharat Gujarat)

શાળામાં બાળકો માટે પતંગની ખરીદી

સરકારી શાળામાં પતંગોત્સવ સ્પર્ધામાં બાળકો માટે દર વર્ષે અહીંથી 500 જેટલા પતંગો અને 100 જેટલી ફિરકીઓની ખરીદી કરતા હોય છે અને બરેલીની દોર અને ખાસ કરીને બાળકો માટે કાર્ટૂન વાળા પતંગોની ખરીદી કરવા માટે આવ્યા છીએ.

ભુજ પતંગ બજારની સ્થિતિ (Etv Bharat Gujarat)

અવનવા પતંગો (Etv Bharat Gujarat)