અમદાવાદ: દેશના સૌથી મોટા સંગીત ઉત્સવમાં સ્થાન ધરાવનાર સપ્તક વાર્ષિક સંગીત સમારોહ 2025નું આયોજન થવા જઇ રહ્યું છે. જે 1 થી 13 જાન્યુઆરી દરમિયાન એલ.ડી.આર્ટ્સ કોલેજ કેમ્પસમાં કરવામાં આવશે. આ સંગીત સમારોહમાં 150 થી વધુ સંગીત માર્તંડ અને યુવા સંગીતકારો એક મંચ પર 13 દિવસ સુધી સંગીત સાધના કરશે.
સપ્તક વાર્ષિક સંગીત ઉત્સવ યોજાશે: 45માં સપ્તક વાર્ષિક સંગીત ઉત્સવની જાહેરાત કરતા સપ્તકના ટ્રસ્ટી હેતલ મહેતા જોષી જણાવે છે કે, દર વર્ષની જેમ આ વર્ષે પણ તા. 1 જાન્યુઆરીથી 13 જાન્યુઆરી દરમ્યાન સપ્તક વાર્ષિક સંગીત ઉત્સવ થવા જઈ રહ્યો છે. નંદન મહેતા અને મંજુ મહેતાના પગલે ચાલતા સપ્તક આ વખતે 45મો વાર્ષિક સંગીત ઉત્સવ ઉજવવા જઈ રહ્યું છે.
ઉત્તર અને દક્ષિણ સંગીતની જુગલબંધી આકર્ષણ બનશે: વધુમાં સપ્તકના હેતલબેન એ જણાવ્યું કે, આ વખતે સપ્તકમાં ખાસ વાત એ છે કે, 43થી વધુ સેશન્સમાં 150થી વધુ શાસ્ત્રીય સંગીતના માર્તંડ અને યુવા સંગીત કલાકારો સંગીત સાધના કરશે, મહત્વની વાત એ છે કે, આ વખતે ખાસ ઉત્તર અને દક્ષિણની જુગલબંધી સપ્તકમાં જોવા મળશે.